Judíos tiku lakatsu wilakgo kxkilhpan pupunu xalak Galilea, max lakatsu kCapernaúm, katsikgo pi Jesús kitaspitnit kDecápolis. Max lhuwa katsikgolh pi Jesús makaksalh unisen chu pupunu chu makgapitsi katsikgo pi kamapaksalh lakchixkuwin tiku xkgalhikgo demonio. Wa xlakata «lhuwa latamanin» tamakxtumikgo kxkilhpan pupunu, max lakatsu kCapernaúm, xlakata namakgamakglhtinankgo Jesús (Marcos 5:21). Putum akxilhputunkgo tuku natlawa akxni nachin.

Kxlakgstipan lhuwa latamanin wi chatum chixku tiku lu akxilhputun Jesús. Wanikan Jairo chu pulalin sinagoga, max lakatsu kCapernaúm. Akxni akxilha Jesús, lakgtatsokgosta chu makglhuwa wani: «Aktsu kintsumat lu tatatla. Katlawa litlan katat chu kawili mimakan kxʼakgxakga xlakata natatlani chu nalatama» (Marcos 5:23). ¿Tuku natlawa Jesús xlakata tuku tasaskinimaka? Xtsumat Jairo kaj 12 kata kgalhi chu xla lu paxki (Lucas 8:42).

Akxni Jesús ama kxchik Jairo, lay atanu milagro. Stalanikgo lhuwa latamanin tiku paxuwamakgo xlakata akxilhputumparakgo la natlawa atanu milagro. Anta na wi chatum puskat tiku paksputun.

Uma puskat judía, 12 kata lata lakgstajma. Kakilakglanita lhuwa makuchinanin chu laktlawakgonita putum xtumin, pero ni paksnit. Wata “tlakg snunanit” (Marcos 5:26).

Uma tajatat max lu maxlajwani chu na lu mamaxani. Putum tiku xkgalhilh uma tajatat ni xlichuwinalh tuku kgalhi. Limapakgsin nema maxkika Moisés xwan pi puskat tiku xkgalhilh uma tajatat ni xaskulunku xwanit chu nila makxtum xkatatawila amakgapitsin latamanin xlakata nakakninani Dios. Tiku naxama puskat tiku tatatla o naxama klhakgat nema pasanit kgalhni, talakaskin napaxa chu ni xaskulunku naʼakxilhkan asta kakgotanun (Levítico 15:25–27).

Uma puskat kgaxmatnit tuku wankan xlakata Jesús, wa xlakata an putsa. Pero xlakata ni xaskulunku wi, tsekg kalakgstipatanu latamanin xlakata ni naʼakxilhkgo. Lakpuwama: «Maski kaj klhakgat xakxamalh, nakpaksa». Akxni xama klhakgat Jesús, makgkatsi la tachokgo xkgalhni. ¡Xla nialh kgalhi tajatat «nema lu xmakgapati»! (Marcos 5:27-29).

Jesús tunkun kgalhskininan: «¿Tiku kixamalh?». ¿Lakpuwana la makgkatsilh puskat akxni chuna kgaxmatli? Ama kilhtamaku, Pedro lakpuwan pi ni xlilat nakgalhskininan uma, wa xlakata kgalhti: «Latamanin tokglhmakgon chu lakxkititilhamakgon». ¿Tuku xlakata Jesús tlawa uma takgalhskinin? Xla wan: «Wi tiku kixamalh xlakata kkatsi pi kintaxtunilh litliwakga» (Lucas 8:45, 46). Chuna, puskat paksli xlakata litliwakga nema taxtunilh Jesús.

Akxni puskat akxilha pi katsika tuku tlawanit, talakatsuwini Jesús chu tatsokgostani. Puskat pekuama chu lhpipima. Kxlakatin putum latamanin, lichuwinan xlakata xtajatat chu wani Jesús pi akxni xamalh paksli. Jesús tlan limamakgkatsini umakgolh tachuwin: «Kintsumat, mintakanajla mapaksanitan. Kapit chu nitu kalilakgaputsa, paksnit mintajatat nema lu xmakgapatiyan» (Marcos 5:34).

Mapakgsina tiku Dios laksaknit xlakata namapakgsinan kKatiyatni lu xapaxkina chu xalakgalhamana. Chu ni kajwatiya lakpuwan nakamakgtaya latamanin, kgalhi litliwakga xlakata nakamakgtaya.