Jesús masiyama kCesarea xalak Filipo, nema wi 25 kilómetros lata niku wi sipi Hermón. Ama kilhtamaku Jesús wi tuku kamakatsini xʼapóstoles: «Xlikana kkawaniyan pi kmilakgstipankan yakgolh tiku ni katinikgolh komo ni pulana naʼakxilhkgo akxni xKgawasa chixku mima kxTamapakgsin» (Mateo 16:28).

Max apóstoles xʼakstu kakgalhskinkan tuku wamputun Jesús. Max akgtum semana titaxtu, Jesús kalin kgalhtutu xʼapóstoles, Pedro, Santiago chu Juan, kʼakgtum lanka sipi. Max tsiswanita, xlakata xkgalhtutukan lhtataputunkgo. Akxni Jesús tlawama oración talakgpali chuna la tasiya. Apóstoles akxilhkgo pi xlakan Jesús makgxkgakganan chuna la Chichini chu xlhakgat lakgskgo, lu snapapa tasiya.

Alistalh, tasiyakgo chatiy lakchixkuwin, «wa Moisés chu Elías». Chu tsukukgo litachuwinankgo Jesús xlakata “amaja an” chu uma chuna nala kJerusalén (Lucas 9:30, 31). Akxni «litachuwinankgo xlakata nialh makgas xʼama an» kilhchanima xlinin chu xtalakastakwanat Jesús nema xla lichuwinanita (Mateo 16:21). Tuku lichuwinankgo limasiya pi Jesús ni xlimalakgachokgot xlinin, maski Pedro nichuna xlakaskin.

Kgalhtutu apóstoles nialh lhtataputunkgo, kaks akxilhkgo chu kgaxmatmakgo tuku lama. Maski kaj akgtum talakawan, lu xlikana tasiya pi asta Pedro tsuku chuwinan: «Rabí, ¡lu tlan pi unu kwilaw! Kakinkamaxki talakaskin naktlawayaw akgtutu laktsu chiki, akgtum mila, akgtum xla Moisés chu akgtum xla Elías» (Marcos 9:5). ¿Chuna wan xlakata lakaskin pi tlakg kamakgapalalh talakawan?

Akxni Pedro chuwinamajku, akgtum puklhni nema lu makgxkgakganan kamatsekga chu takgaxmata tachuwin nema wan: «Wa uma kinKgawasa, tiku lu kpaxki, chu lu tlan kimamakgkatsini. Kakgaxpatnitit». Akxni apóstoles kgaxmatkgo pi Dios chuwinama lu pekuankgo chu takilhputakgo, pero Jesús kawani: «Katayatit. Ni kapekuantit» (Mateo 17:5-7). Akxni tayakgo, akxilhkgo pi kaj Jesús ya. Anta kgalhsputa talakawan. Akxni kaxkgakganita chu taktamakgo ksipi, Jesús kalimapakgsi: «Niti tiwaniyatit tuku kamaʼakxilhnikantit asta akxni malakastakwanikanita nawan xKgawasa chixku» (Mateo 17:9).

Xlakata ktalakawan akxilhkgolh Elías, apóstoles kgalhskinkgo Jesús: «¿Tuku xlakata wankgo lakgtsokgkinanin pi pulana xliminat Elías?». Xla kakgalhti: «Elías milha, chu xlakan ni katsikgolh pi wa Elías xwanit» (Mateo 17:10-12). Jesús lichuwinama Juan Mununa, tiku nachuna tlawalh la Elías. Xla lakkaxwililh xtiji Eliseo, chu Juan lakkaxwililh xtiji Cristo.

Uma talakawan kamatliwakglha Jesús chu xʼapóstoles chu uma akgtum liʼakxilhtit xla tatlankit nema nakgalhi Cristo kxTamapakgsin Dios. Chuna la Jesús malaknulh, xtamakgalhtawakgen akxilhkgonit la «xKgawasa chixku mima kxTamapakgsin» (Mateo 16:28). “Xlakgastapukan liʼakxilhkgonit xlilanka” Jesús anta ksipi. Maski fariseos xlakaskinkgo pi Jesús wi tuku xkalimasiyanilh pi xla wa Mapakgsina tiku laksakli Dios, xla ni chuna tlawalh. Pero xtamakgalhtawakgen Jesús tiku tlakg talalinkgo kamaxkikanit talakaskin naʼakxilhkgo uma talakawan nema limasiya pi xlikana tuku xlichuwinankanit xlakata Tamapakgsin. Wa xlakata, Pedro alistalh tsokgli: «Liwana kanajlayaw pi putum tuku wa Dios nakgantaxtu» (2 Pedro 1:16-19).