Maski Jesús lhuwa tuku kamasiyani chu tlawa, latamanin likatsikgo chuna la wi kxnakujkan. Akgtum li’akxilhtit xlakata uma, lalh kxchik chatum fariseo, Simón xalak Galilea. Uma chixku wani Jesús pi kaʼalh wayan kxchik, max xlakata tlakg liwana lakgapasputun tiku tlawama lhuwa milagros. Jesús katawayanit atanu kilhtamaku tiku matajinankgo lilakgaxokgon chu lakgalhinanin, chu la uku, makglhtinan invitación xlakata tlan nakalitachuwinan Dios tiku natawilakgo kchiki.

Pero akxni Jesús chin, ni makgamakglhtinankan chuna la lismanikan. Kxamakgan Palestina, latamanin xtatunukgo xtuxuwakan, chu akxni xtlawankgo niku x’anan lhuwa pokgxni, xtantulhkakkgo chu xtantupokgxnilakgo. Wa xlakata, akxni wi tiku xchan kxchik atanu lataman, xlimasiyanikan pi tlan xmakgamakglhtinamaka akxni xlitantuchakgekan xaskgawiwi chuchut. Pero kxchik Simón, niti tantuchakge Jesús. Na ni tsukkan, chuna la xtalismani. Atanu tuku xtlawakgo wa pi x’akmawakakan aceite tiku xminit, pero na ni akmawakaka aceite Jesús. ¡Nitlan makgamakglhtinanka!

Chan kilhtamaku xlakata natalakatsuwikgo kmesa tiku nawayankgo. Akxni wayamakgo, chatum puskat tiku «lakgalhina xlilakgapaskan kkachikin» tsekg tanu kchiki maski ni xwanikanit pi x’alh (Lucas 7:37). Xlikana pi putum akinin lakgalhinanin chu tlawayaw talakgalhin, pero uma puskat lin xalixkajni latamat; max sta xmakni. Max lakgapasa xtamasiy Jesús chu kgaxmatnit pi xla kamakgtaya “tiku lu tsinka xtakukakan” (Mateo 11:28, 29). Max wa xlakata an putsa Jesús.

Akxni Jesús xwayama, puskat talakatsuwini chu tatsokgosta niku wi xtantun. Tsuku tasa chu limaskakani xʼakchixit xlakgpixtajat nema tawakayacha kxtantun Jesús. Nachuna, tsuku tsukni xtantun chu tantumawaka xamuksun aceite nema liminit. Simón nitlan akxilha uma chu lakpuwan: «Komo uma chixku xlikana palakachuwina xwa, liwana xkatsilh tiku tantuxamama. ¿Ni katsi pi uma puskat tlawa talakgalhin?» (Lucas 7:39).

Pero Jesús, tiku katsi tuku lakpuwama, wani: «Simón, wi tuku kwaniputunan». Chu xla kgalhti: «¡Kawanti, Makgalhtawakgena!». Jesús wani: «Chatiy lakchixkuwin xlaklinikgo chatum xmasakuanina tumin; chatum xlaklini akgkitsis ciento denarios, pero achatum tipuxamakaw. Akxni nialh xkgalhikgo tuku nalixokgonanikgo, xla katapatilh xchatiykan. Wa xlakata, umakgolh chatiy, ¿tiku tlakg napaxki?». Simón kgalhtinan: «Klakpuwan pi wa tiku tlakg lhuwa tapatika» (Lucas 7:40-43).

Jesús wani pi liwana kgalhtinanit, chu alistalh, akxni akxilha puskat, wan: «¿Akxilha uma puskat? Ktanulh kminchik; ni kimaxki chuchut xlakata naklitantuchakgan. Pero uma puskat kilitantuchakgenit xlakgpixtajat chu limaskakanit xʼakchixit. Ni kintsukti, pero uma puskat, lata unu kwi xla chuntiya tsukma kintantun. Ni kimawakani aceite kkiʼakgxakga, pero uma puskat kintantumawakalh xamuksun aceite». Jesús akxilha pi uma puskat nitlan limakgkatsima xtalakgalhin, wa xlakata wani Simón: «Kwaniyan pi maski lhuwa xtalakgalhin, tapatikan, xlakata limasiyalh lhuwa tapaxkit. Pero tiku ni lhuwa tapatikan, ni lhuwa limasiya tapaxkit» (Lucas 7:44-47).

Jesús ni wamputun pi tataya natlawakan talakgxtumit xalimaxana. Wata masiyama pi kalakgalhaman chu kaʼakgatekgsni tiku makgxtakgkgo xtalakgalhinkan chu lakgankgo xlakata tlan nakamamakgkatsini. Liwana katsiyaw pi puskat tlan makgkatsi akxni kgaxmata xtachuwin Jesús tiku wani: «Tapatikana mintalakgalhin. [...] Mintakanajla lakgmaxtunitan; kapit chu nitu kalilakgaputsa» (Lucas 7:48, 50).