Latamanin kaks lilakawankgo akxni akxilhkgo pi Jesús tlan kamawi lhuwa mil latamanin. Lakpuwankgo pi «wa uma palakachuwina tiku xʼama min kkakilhtamaku», Mesías, chu pi tlan nalitaxtu chatum xatlan mapakgsina (Juan 6:14; Deuteronomio 18:18). Wa xlakata, xafuerza limputunkgo chu mapakgsina tlawaputunkgo.

Xlakata Jesús katsi tuku tlawaniputunkgo, kawani latamanin pi xtaspitkgolha chu kawani xtamakgalhtawakgen pi katawakaparakgolh kbarco chu kaʼankgolh kxtiji Betsaida chu alistalh xʼankgolh kCapernaúm. Pero xla xʼakstu an ksipi xlakata natlawa oración ama katsisni.

Akxni xʼamaja xkgakga chu xtsasnama, Jesús lakgamakgat akxilha barco. Akxilha pi takgayawama chuchut chu pi tliwakga snokgma barco chu pi xʼapóstoles nila linkgo barco xlakata un lu tliwakga katalalakgapaxtokgma (Marcos 6:48). Jesús tunkun takta ksipi chu tsuku kgalhtlawan pupunu nema lu takgayawama asta niku xlakan wilakgo. Ama kilhtamaku apóstoles «xlinkgonita barco max akgkitsis o akgchaxan kilómetros xlimakgat» (Juan 6:19). Chu akxni akxilhkgo pi Jesús kgalhtlawama chuchut, pixlanka tsukukgo wankgo: «¡Kaj kinkamalakawanimakan!» (Marcos 6:49).

Jesús kawani: «¡Ni kapekuantit! Akit Jesús». Pero Pedro kgalhti: «Malana, komo xlikana wix, kakintasanipi xlakata naklakganachan kxkgalhni chuchut». Jesús wani: «¡Katat!». Pedro takuta kbarco chu tsuku kgalhtlawan chuchut asta niku wi Jesús. Pero akxni akxilha tliwakga un, tsuku pekuan chu tsuku lakgtsankga. Wa xlakata, pixlanka wan: «¡Malana, kakilakgmaxtu!». Jesús stonkga xmakan, chipa chu wani: «Chixku, ni lhuwa mintakanajla. ¿Tuku xlakata ni kilipawanti?» (Mateo 14:27-31).

Pedro chu Jesús tawakakgo kbarco, chu un takaksa. Tamakgalhtawakgen lu kaks lakawankgo, pero ¿xlilat chuna namakgkatsikgo? Komo xʼakgatekgskgolh «tuku xkilhchanima milagro xla kaxtalanchu» nema Jesús aku xtlawanit akxni kamawilh lhuwa mil latamanin, ni kaks xlilakawankgolh pi tlan kgalhtlawan chuchut chu makaksa un. Pero tsukukgo lakgtakilhputakgo chu wanikgo: «Xlikana xKgawasa Dios wix» (Marcos 6:52; Mateo 14:33).

Alistalh, ankgo kxakaxtum xtiyat Genesaret, nema lu stlan chu lu makgalanankan, kxpakgalhu Capernaúm. Makankgo kpupunu tuku limachokgowilikan barco chu taktakgo. Tiku anta wilakgo, akxilhkgo pi wa Jesús, wa xlakata tiku xalak uma kachikinin tsukukgo kaliminikgo tatatlanin. Putum tiku xamani maski kaj xkilhpan klhakgat pakskgo.

Tiku xwilakgo akxni Jesús kamawilh lhuwa mil latamanin akxilhkgo pi Jesús anita. Wa xlakata, akxni minkgo makgapitsi barcos xalak Tiberíades, tawakakgo chu ankgo putsakgo Jesús kCapernaúm. Akxni tekgskgo, kgalhskinkgo: «Rabí, ¿tuku kilhtamaku chita unu?» (Juan 6:25). Jesús palha kastakyawa, chu wi tuku xlakata chuna tlawa, chuna la naʼakxilhaw alistalh.