Jesús lu lichuwinama Dios kʼGalilea, pero xlakata talakatsuwima Pascua kkata 32, an kJerusalén xlakata namakgtlawa Pascua, chuna la wan xLimapakgsin Dios. Pero lu kuenta tlawa xlakata judíos makgniputunkgo (Juan 7:1). Alistalh, taspita kʼGalilea.

Max Jesús wi kCapernaúm akxni makgapitsi fariseos chu lakgtsokgkinanin minkgoyacha kJerusalén. ¿Tuku xlakata makgat minkgoyacha? Putsamakgo tuku nalimawakakgo Jesús chu nawankgo pi ni tlawa tuku xlitlawatkan judíos. Kgalhskinkgo: «¿Tuku xlakata mintamakgalhtawakgen lakatsalakgo xtalismaninkan xalakgmakgan lakchixkuwin? Akgtum liʼakxilhtit, ni makgachakgankgo akxni aku nawayankgo» (Mateo 15:2). Pero Dios ni kalimapakgsilh xkachikin pi namakgachakgankgo «asta kxmakglhtsankan» (Marcos 7:3). Maski chuna, fariseos lakpuwankgo pi talakgalhin komo nichuna tlawakan.

Jesús ni kakgalhti tuku xlakan limawakamakgo, wata kawani pi xlakan ni kgalhakgaxmatkgo xLimapakgsin Dios. kakgalhskin: «¿Tuku xlakata wixin lakatsalayatit xlimapakgsin Dios kaj xlakata mintalismaninkan? Akgtum liʼakxilhtit, Dios wa: “Kamaxki kakni mintlat chu mintse”, chu nachuna: “Tiku nawani lixkajni tachuwin xtlat o xtse xlilat namakgnikan”. Pero wixin wanatit: “Putum tiku wani xtlat o xtse: «Putum tuku kkgalhi nema tlan xaklimakgtayan kmalaknunit nakmaxki Dios», nialh tsinu talakaskin pi xla namaxki kakni xtlat”» (Mateo 15:3-6; Éxodo 20:12; 21:17).

Fariseos wankgo pi tumin, pukuxtu o atanu tuku chatum lataman namalaknu pi namaskiwi Dios, wa tapakgsini templo chu nialhla atanu la namaklakaskinkan. Pero uma tamaskiwin chuntiya tapakgsini tiku malaknuma. Akgtum liʼakxilhtit, chatum kgawasa max nawan pi xtumin o xpukuxtu corbán litaxtu, uma wamputun pi maskiwinit Dios o templo, xtachuna la xwa pi templo tlakg lakgchan uma nixawa xnatlatni. Kgawasa tlanku namaklakaskin xtumin o xpukuxtu, pero xla wan pi nila kalimakgtaya xnatlatni tiku linkgoya kata chu wi tuku maklakaskinkgo. Chuna tlawa xlakata ni kakuentajtlawaputun xnatlatni (Marcos 7:11).

Jesús sitsi akxni akxilha la lakgpalikgo xLimapakgsin Dios, wa xlakata kawani: «Wixin lakgmakganitantit xtachuwin Dios kaj xlakata mintalismaninkan. Lakgaputiyunanin, xlikana tuku lichuwinalh Isaías mimpalakatakan akxni wa: “Umakgolh latamanin kilimaxkikgo kakni xtachuwinkan, pero xnakujkan lu kintamakgatlinikgonit. Nitu litaxtu maski kimaxkimakgolh kakni, xlakata masiyakgo xlimapakgsinkan lakchixkuwin”». Fariseos ni katsikgo la nakgalhtikgo Jesús. Pero Jesús katasani latamanin chu kawani: «Kakgaxpattit chu kaʼakgatekgstit tuku kilhchanima: Ni wa tuku tanuy kxkilhni chixku maxkajwani, wata tuku taxtu kxkilhni wa maxkajwani» (Mateo 15:6-11; Isaías 29:13).

Alistalh, akxni Jesús chu xtamakgalhtawakgen wilakgo kʼakgtum chiki, kgalhskinkgo: «¿Akxilhti pi fariseos sitsikgolh akxni kgaxmatkgolh tuku lichuwinanti?». Xla kakgalhti: «Putum kiwi nema ni chanit kinTlat xalak akgapun napulhukan. Ni kakakuentajtlawanikgotit. Pulalinanin tiku xalakgaxokgo litaxtukgo. Wa xlakata, komo chatum lakgaxokgo napulalin atanu lakgaxokgo, xchatiykan akxtum natajukgoyacha niku kapulhman» (Mateo 15:12-14).

Alistalh, Pedro wani Jesús pi tlakg kakawanilh tuku tlawa pi chatum lataman xaxkajwa nawan. Jesús max kaks lilakawan chu kawani: «¿Ni katsiyatit wixin pi putum tuku chatum chixku way titaxtu kxpokgo chu taxtu? Pero putum tuku taxtu kxkilhni chixku, anta kxnaku taxtuyacha chu wa uma maxkajwani. Akgtum liʼakxilhtit, knaku taxtuyacha xalaklixkajni talakapastakni, lamakgnit,  laʼakgskgawikan ktamakgaxtokgat, talakgxtumit nema ni xlitatlawat, takgalhan, wankan tuku ni xlikana, wankan lixkajni tachuwin. Wa umakgolh tuku maxkajwani chixku; pero wayankan akxni ni makgachakgankanit ni maxkajwani chixku» (Mateo 15:17-20).

Akxni Jesús chuna wan, ni wamputun tlan xataxkajwani natawilakan. Na ni kawanima pi kakaxtlawakgolh o kawakgolh liwat maski ni namakgachakgankgo. Wata lichuwinama tuku nitlan tlawamakgo xpulalinanin takanajla, nema lakatsalakgo xLimapakgsin Dios kaj xlakata makgantaxtikgo xtalismaninkan. Tuku maxkajwi chatum lataman wa tuku nitlan tlawaputun chu anta taxtuyacha kxnaku.