Akxni wi ksinagoga xalak Capernaúm, Jesús masiyapara pi xla litaxtu xaxlikana kaxtalanchu xalak akgapun. Tasiya pi tuku lichuwinama xtachuna tuku kawanilh tiku wakgolh kaxtalanchu chu skiti kxʼeste pupunu xalak Galilea chu kitaspitkgonita.

Jesús wan: «Xalakgmakgan minatlatnikan wakgolh maná kxakaskakni tiyat pero xlakan nikgolh». Chu wan tuku ni xtachuna uma, kawani: «Akit ama kaxtalanchu xastakna tiku taktanitanchi kʼakgapun. Komo wi tiku nawa uma kaxtalanchu nalatama putum kilhtamaku; wa xlakata, kaxtalanchu nema akit nakmasta wa kiliwa nema latamanin nalikgalhikgo latamat» (Juan 6:48-51).

Kprimavera kkata 30, Jesús wanilh Nicodemo pi Dios lu paxkilh kakilhtamaku chu mastalh xKgawasa xlakata nakalakgmaxtu latamanin. Chu la uku masiyama pi xlakata tlan nakgalhikan latamat, talakaskin nawakan xliwa, uma wamputun, nakanajlanikan tamakamastan nema xla natlawa.

Pero latamanin litaʼakglhuwikgo chu kgalhskininankgo: «¿La tlan uma chixku nakinkalimawiyan xliwa?» (Juan 6:52). Jesús lakaskin kaʼakgatekgskgolh pi tuku lichuwinama kaj wi tuku kilhchanima. Tuku lichuwinan alistalh liwana masiya uma.

«Komo ni nawayatit xliwa xKgawasa chixku chu ni nalikgotnanatit xkgalhni, ni katikgalhitit latamat. Putum tiku naliwayan kiliwa chu nalikgotnan kinkgalhni kgalhi latamat nema ni kgalhi xlisputni, [...] xlakata kiliwa wa tuku xaxlikana liwayankan chu kinkgalhni wa tuku xaxlikana likgotnankan. Putum tiku liwayan kiliwa chu likgotnan kinkgalhni tlan kintalalin» (Juan 6:53-56).

Max judíos lu lisitsikgo uma tachuwin. Max lakpuwankgo pi Jesús kawanima pi kawakgolh xtalatamankan o ni kakgalhakgaxmatkgolh xlimapakgsin Dios nema wan pi ni xliwatkan kgalhi (Génesis 9:4; Levítico 17:10, 11). Pero Jesús ni wa kilhchanima pi xlikana nawakan xliwa chu xkgalhni. Xla lichuwinama pi tiku latamaputunkgo putum kilhtamaku, xlikanajlanitkan tamakamastan nema xla natlawa akxni namakamasta xmakni nema ni kgalhi talakgalhin chu nastajmakgan xkgalhni akxni namakgnikan. Pero lhuwa xtamakgalhtawakgen ni akgatekgskgo tuku kamasiyanima. Makgapitsi wankgo: «Tuwa makgamakglhtinankan uma taʼakgchuwin; ¿tiku tlan kgaxmata?» (Juan 6:60).

Xlakata Jesús akxilha pi makgapitsi xtamakgalhtawakgen litaʼakglhuwimakgo uma, kakgalhskin: «¿Uma kamaʼakgchakgxniyan? ¡Tlakg liwaka komo naʼakxilhatit pi xKgawasa chixku amapa anta niku xapulana xwilacha! [...] Tuku akit kkalitachuwinanitan wa espíritu chu latamat. Pero makgapitsin wixin ni kanajlayatit». Akxni kgaxmatkgo uma, lhuwa tiku nialh stalanikgo (Juan 6:61-64).

Wa xlakata Jesús kakgalhskin 12 xʼapóstoles: «Wixin ¿na pimputunatit?». Chu Pedro kgalhti: «Malana, ¿tiku naklakganaw? Wix kgalhiya tachuwin nema linan klatamat nema ni kgalhi xlisputni. Akinin kkanajlanitaw chu kkatsinitaw pi wix xaSanto tiku malakgachanit Dios» (Juan 6:67-69). ¡Liwana tasiya pi xlakan ni makgxtakgnankgo! Maski xla chu amakgapitsi apóstoles nina liwana akgatekgskgo tuku Jesús kamasiyanima.

Maski Jesús lakgati tuku Pedro kgalhti, wan: «Akit kkalaksaknitan, minkgalhkutiykan, ¿ni xlikana? Pero chatum wixin xtachuna akgskgawini» (Juan 6:70). Wa lichuwinama Judas Iscariote. Max uma kilhtamaku, Jesús akxilhnita pi Judas makgxtakgma xatlan tiji.

Maski chuna, Jesús lu lipaxuwa pi Pedro chu amakgapitsi apóstoles ni lakpuwankgo la amakgapitsin. Ni makgxtakgputunkgo chu chuntiya tatlawaputunkgo taskujut nema lakgmaxtu latamat.