Jesús aku kalitachuwinalh xtamakgalhtawakgen akgtum liʼakxilhtit xlakata nakamasiyani tuku tayat xlikgalhitkan. Xlilakpuwanatkan la laktsu kamanan, nema taʼaktujukgo chu ni lilakgaputsakgo tiku tlakg xlakaskinka. Nachuna, xlitlawatkan la Jesús chu xlikgalhitkan tayat nema kgalhikgo laktsu kamanan (Mateo 18:5).

Apóstoles xlitakglhuwimakgo tiku tlakg xlakaskinka, wa xlakata lhuwa tuku xlikatsinitkan xlakata tuku Jesús kalitachuwinanit. Apóstol Juan wani Jesús tuku aku lanit: «Wi tiku kakxilhwi pi xkatamakxtuma demonios kmintukuwani, pero xlakata ni kinkatatapakgsiyan, xakmachokgoputunaw» (Lucas 9:49).

¿Lakpuwan Juan pi kaj apóstoles tlan mapaksanankgo chu katamakxtukgo demonios? Komo kajwatiya tlan chuna tlawakgo, ¿tuku xlakata uma judío tlan katamakxtunit demonios? Tasiya pi Juan lakpuwan pi uma chixku ni lakgchan natlawa uma milagro xlakata ni katalapula Jesús chu xʼapóstoles.

Juan kaks lilakawan tuku Jesús wani: «Ni kamachokgotit, xlakata nila tiku natlawa milagro kkintukuwani chu tunkun lixkajni nakilichuwinan. Xlakata tiku ni kinkatalatlawayan, kinkatatayayan. Xlikana kkawaniyan, tiku nakatawayan patum vaso chuchut xlakata wixin tapakgsiniyatit Cristo, xla ni katimakgatsankgalh xtasikulunalin» (Marcos 9:39-41).

Wa xlakata ni talakaskin pi uma chixku nataʼan Jesús xlakata natataya. Xlakata congregación xla kstalaninanin Cristo nina malakatsukikan, ni wamputun pi chixku xtalamakgasitsinkan o pi matsukima nixaxlikana takanajla kaj xlakata ni akxtum katalama. Liwana tasiya pi chixku kanajlani Jesús, chu tuku wan Jesús masiya pi xla namakglhtinan xtasikulunalin.

Pero lu nitlan xkitaxtulh komo tuku wankgo chu tlawakgo apóstoles xmaʼakgchakgxalh uma chixku. Jesús wan: «Putum tiku namaʼakgchakgxni kistalaninanin tiku xtachuna laktsu kamanan litaxtukgo, tlakg tlan xwa komo xpixchiwakaka akgtum chiwix xla molino nema makgalhchokgo tantum burro chu xmakanka kpupunu» (Marcos 9:42). Alistalh Jesús wan pi xtamakgalhtawakgen xlakgmakgankgolh tuku lu xlakaskinka la xmakankan, xtantunkan o xlakgastapukan komo uma xkamaʼakgchakgxilh. Tlakg tlan tanukan kTamapakgsin xalak akgapun maski ni kgalhiyaw pulaktum tu xla kimaknikan, nixawa kimputuminikakan naʼanaw kʼGehena (valle xla Hinón). Max apóstoles akxilhkgonit uma xakaxtum lakatsu kJerusalén, niku lhkuyukan palhma, wa xlakata akgatekgskgo pi uma kilhchanima lisputni putum kilhtamaku.

Jesús na kamakatsini: «Kuentajkatlawatit pi ni nalakgmakganatit umakgolh kistalaninanin tiku xtachuna laktsu kamanan litaxtukgo, xlakata kkawaniyan pi xʼángeles xalak akgapun putum kilhtamaku akxilhkgo xlakan kinTlat tiku wi kʼakgapun». ¿La xlilakaskinka kaliʼakxilha Jehová «tiku xtachuna laktsu kamanan»? Jesús kalitachuwinan chatum chixku tiku kgalhi 100 borregos chu makgatsankga tantum. Chixku kamakgxtakga 99  xborrego xlakata naʼan putsa nema tsankganit chu akxni tekgsa, tlakg lipaxuwa uma nixawa 99 nema kgalhijku. Jesús wampara: «Nachuna, kinTlat xalak akgapun ni lakaskin pi naniy maski kaj chatum kistalanina tiku xtachuna laktsu kamanan» (Mateo 18:10, 14).

Alistalh, Jesús max lakapastaka pi litakglhuwikgonit tiku tlakg xlakaskinka chu kastakyawa: «Kalitaxtutit chuna la matsat chu tlan kalatalalipitit minchatunukan» (Marcos 9:50). Matsat makgami liwat. Nachuna, komo la matsat nalitaxtuyaw, tuku nawanaw tlan nakamamakgkatsini amakgapitsin chu uma natlawa pi tlan nalatalalinaw, uma nichuna lay akxni latatakglhuwikan (Colosenses 4:6).

Jesús wan tuku xlitatlawat komo natawila lanka taʼakglhuwit: «Komo mintala tlawa akgtum talakgalhin, kapit chu akstu kalitachuwinanti tuku nitlan tlawanit. Komo nakgaxmatniyan, makgtayanita mintala natlawapara tuku xlilat». Pero ¿tuku natlawaya komo ni kgaxmatputun? Jesús wan: «Kakatapi chatum o chatiy tiku na nakgaxmatkgo, xlakata tuku nawankgo chatiy o kgalhtutu tatayananin nakatsikan komo tuku wankan xlikana o ni». Komo ni nalakkaxla taʼakglhuwit, «katachuwinanti congregación», uma wamputun lakgkgolotsin, xlakata nawankgo tuku xlitatlawat. ¿Tuku nala komo chuntiya ni kgaxmata? Jesús wan: «Kaliʼakxilhti chuna la chixku xalak atanu kachikin chu la xmatajina lilakgaxokgon», latamanin nema judíos ni xlitalalitkan (Mateo 18:15-17).

Lakgkgolotsin xalak congregación xlitlawatkan tuku wan xTachuwin Dios. Komo nawankgo pi lataman lin kuenta chu lakaskin nastakyawakan, tuku nalakkaxwilikgo tachitawilanit nawan kʼakgapun. Pero komo nawankgo pi ni lin kuenta, tuku nalakkaxwilikgo nataxkutacha kʼakgapun. Uma lu nakamakgtaya akxni nalakatsuku congregación xla xtamakgalhtawakgen Cristo. Tiku lakkaxtlawakgo taʼakglhuwit la umakgolh, Jesús kawani: «Niku tamakxtumikgonit chatiy o kgalhtutu kkintukuwani, anta kwi kxlakgstipankan» (Mateo 18:18-20).