Akxni nina makgas xtitaxtunit lata latamanin xalak Nazaret xmakgniputunkgo Jesús, xla an latama kCapernaúm, lakatsu kpupunu xalak Galilea o niku «xtaʼakgstokgtawilanit chuchut wanikan Genesaret» (Lucas 5:1). Uma makgantaxti tuku xlichuwinanit palakachuwina Isaías, niku xwan pi galileos tiku xlamakgo lakatsu kpupunu xʼamakgo akxilhkgo akgtum lanka xkgakganat (Isaías 9:1, 2).

Jesús chuntiya lichuwinan kʼGalilea pi «talakatsuwinit Tamapakgsin xalak akgapun» (Mateo 4:17). Kʼuma kachikin katekgsa kgalhtati kstalaninanin. Xlakan kitalatapulikgolh Jesús xapulana, pero akxni kitataspitkgolh kJudea, taspitparakgolh kxtaskujutkan (Juan 1:35-42). Pero chinita kilhtamaku xlakata nastalanikgo putum kilhtamaku xlakata Jesús nakamasiyani tuku natlawakgo akxni xla nialh katawi nawan.

Akxni xtlawama kxkilhtun pupunu, Jesús akxilha Simón Pedro, Andrés chu amakgapitsi tiku na anta wilakgo nema chakgemakgo xtsalhkan. Jesús kalakgtalakatsuwi, tawaka kxbarco Pedro chu wani pi katamakgatlilh kxkilhtun pupunu. Akxni makgat wilakgo, tawila chu tsuku kamasiyani latamanin tiku wilakgo kxkilhtun pupunu xaxlikana xlakata Tamapakgsin.

Jesús wani Pedro: «Kalipi barco anta niku pulhman, chu kamakapitit mintsalhkan xlakata nachipayatit skiti». Pero Simón kgalhti: «Makgalhtawakgena, tantaskaka palha kliskujwi chu nitu kchipaw, pero xlakata chuna limapakgsinanti, nakmakan tsalh» (Lucas 5:4, 5).

Akxni Pedro chu tiku anta wilakgo chuna tlawakgo, lhuwa skiti chipakgo pi asta xtsalhkan tsuku taxtita. Lakapala katasanikgo amakgapitsin tiku wilakgo kʼatanu barco xlakata nakamakgtayakgo. Akgtiy barco lakapala tatsamakgo chu asta tsukukgo taʼakgtsikgo. Akxni Pedro akxilha uma, lakgtatsokgosta Jesús chu wani: «Kakintapanuni Malana, xlakata akit makglakgalhina chixku». Pero Jesús kgalhti: «Nialh kapekuanti. Lata uma kilhtamaku, nakachipaya lakchixkuwin xtachuna la kachipaya skiti» (Lucas 5:8, 10).

Alistalh, Jesús kawani Pedro chu Andrés: «Kakistalanitit chu nakkalimaxtuyan xputsananin latamanin xtachuna la putsayatit skiti» (Mateo 4:19). Nachuna kawani Santiago chu Juan, xkamanan Zebedeo. Xkgalhtatikan lakapala makgxtakgkgo xtaskujutkan chu wa xapulana tiku tsukukgo stalanikgo Jesús putum kilhtamaku.