Lata Jesús tamunulh, tlakg lhuwa tiku lakgapaskgo. Uma kata lhuwa judíos akxilhkgonit milagros nema tlawanit chu latamanin lichuwinankgo uma kaxanikawa. Chu uku, kFiesta xla Laktsu Chiki kJerusalén, lhuwa tiku putsamakgo.

Tanu tanu tuku lakpuwanikgo Jesús. Wi tiku wankgo pi tlan likatsi chu amakgapitsi wankgo pi ni chu pi kaj kaʼakgskgawi latamanin (Juan 7:12). Akxni aku tsukuma fiesta, lhuwa tiku tsekg latachuwinan, maski niti kgalhmakgtayaputun Jesús xlakatin latamanin xlakata kapekuanikgo xpulalinanin judíos.

Akxni xʼitatlanit fiesta, Jesús an ktemplo chu tsuku masiya. Lhuwa tiku kaks lilakawankgo xlakata lu tlan masiya. Xla ni anit klaklanka escuela, wa xlakata judíos akstu kakgalhskinkan: «¿Niku tiya takatsin xla Tatsokgni uma chixku maski ni kgalhtawakganit kpukgalhtawakga?» (Juan 7:15).

Jesús kawani: «Tuku akit kmasiya ni kila, wata tapakgsini tiku kimalakgachanit. Komo wi tiku tlawaputun xtalakaskin, nakatsi komo klichuwinan xtamasiyat Dios o kaj kintapuwan» (Juan 7:16, 17). Xtamasiy Jesús xtachuna tuku wan xLimapakgsin Dios, uma masiya pi xla ni lakaskin wa namalankikan, wata wa Jehová.

Jesús wampara: «Moisés kamaxkin Limapakgsin, ¿ni xlikana? Pero nipara chatum wixin kgalhakgaxpatatit Limapakgsin. ¿Tuku xlakata kimakgniputunatit?». Makgapitsi tiku anta wilakgo, max ni xalak Jerusalén, ni katsikgo pi wilakgo latamanin tiku makgniputunkgo. Kaks lilakawankgo pi makgniputunkgo chatum xatlan makgalhtawakgena la Jesús. Wa xlakata, lakpuwankgo pi laktanuma demonio chu kgalhskinkgo: «¿Tiku makgniputunan?» (Juan 7:19, 20).

Titaxtunita akgtum kata aitat lata xpulalinanin judíos xmakgniputunkgo Jesús xlakata xmapaksanit chatum chixku, sábado. La uku, Jesús limasiya pi ni liwana lakapastaknankgo akxni kawani tuku xaxlikana. Kamalakapastaka pi limapakgsin wan pi akxni chatum aktsu kgawasa kgalhi akgtsayan kilhtamaku lata lakachinit, xlitapuakstilichukut maski sábado nalakgchan. Alistalh kawani: «Komo chatum chixku akstilichukunikan kxuwa xlichixku kSábado xlakata ni nalakatsalakan xLimapakgsin Moisés, ¿lu kisitsiniyatit xlakata ktlawalh pi chatum chixku xchatuminika xpaksli ksábado? Nialh kalakputsanantit kaj xlakata tuku akxilhatit, pero akxni lakputsananatit xaʼakgstitum chuna katlawatit» (Juan 7:23, 24).

Tiku xalak Jerusalén nema liwana katsikgo uma, wankgo: «Wa uma chixku tiku makgapitsi makgniputunkgo, ¿ni xlikana? Pero, ¡kaʼakxilhtit!, chuwinama niku lhuwa lamaka, chu ni anan tiku wi tuku nawani. ¿Liwana katsikgoya mapakgsinanin pi wa uma Cristo?». Pero lhuwa tiku ni kanajlakgo pi Jesús wa Cristo. ¿Tuku xlakata? Xlakata katsikgo niku minacha chu lakpuwankgo pi «akxni namin Cristo niti katikatsilh niku minacha» (Juan 7:25-27).

Anta ktemplo, Jesús kawani: «Wixin kilakgapasatit, chu na katsiyatit niku xala akit. Chu ni kiʼakstu kintapuwan kminit, pero Tiku kimalakgachanit xaxlikana, chu wixin ni lakgapasatit. Akit klakgapasa, xlakata akit xpalakachuwina, chu wa Tiku kimalakgachalh» (Juan 7:28, 29). Akxni kgaxmatkgo uma, lakputsakgo la nachipakgo, max xlakata nalakgachinukgo o namakgnikgo, pero ni matlanikgo xlakata nina xkilhtamaku nani.

Maski chuna, lhuwa tiku kanajlanikgo Jesús xlakata lhuwa milagros tlawanit: kgalhtlawanit chuchut, makaksanit unisen, ni lhuwa kaxtalanchu chu skiti maklakaskinit xlakata nakamawi lhuwa latamanin, kamapaksanit tiku tatatlakgo, tiku nila tlawankgo, tiku lakgaxokgo, tiku kgalhikgo  lepra... ¡asta kamalakastakwaninit tiku xnikgonita! Wa xlakata akstu kakgalhskinkan: «Akxni namin Cristo natlawa lhuwa milagros. ¿Ni xlikana pi chuna tlawamaja uma chixku?» (Juan 7:31).

Akxni fariseos kgaxmatkgo pi latamanin wankgo uma, xlakan chu xanapuxkun sacerdotes kawanikgo soldados pi kachipakgolh Jesús.