Sputmaja kata 32, chu titaxtunita akgtutu kata lata Jesús tamunulh. Xla chu xtamakgalhtawakgen tlawakgonit Fiesta xla Laktsu Chiki kJerusalén, chu max lakatsu kJerusalén wilakgolhku (Lucas 10:38; Juan 11:1). Xaʼawatiya akgchaxan papaʼ nema lichuwinan Dios, Jesús tlakg lhuwa kilhtamaku tamakgxtakga kJudea chu kPerea xlakata na talakaskin nalichuwinan Dios kʼumakgolh kachikin. Perea wi kxaʼakilhtutu kgalhtuchokgo Jordán.

Titaxtunit makgapitsi kilhtamaku, akxni xtlawakanita Pascua kkata 30, Jesús akglhuwa papaʼ lichuwinalh Dios kJudea chu alistalh titaxtulh kSamaria. Alistalh akxni atsinu xtsankga nalakgchan Pascua kkata 31, judíos xalak Jerusalén xmakgniputunkgo. Akxni xlanita uma, Jesús lichuwinalh Dios akgtum kata a itat kxnorte Galilea. Uma kilhtamaku lhuwa tiku xtamakgalhtawakgen litaxtukgolh. Akxni xlama kʼGalilea, Jesús kamasiyanilh xʼapóstoles chu alistalh kamaxkilh uma limapakgsin: «Akxni napinatit lichuwinanatit Dios, kawantit: “Tamapakgsin xalak akgapun talakatsuwinit”» (Mateo 10:5-7). La uku, lakkaxwili la nalichuwinankan Dios kJudea.

Pulana, Jesús kalaksaka 70 xtamakgalhtawakgen chu chatiyun kamalakgacha. Umakgolh xtamakgalhtawakgen lichuwinankgo xTamapakgsin Dios kʼuma kachikin niku «tachanan lu lhuwa, pero skujnin ni chalhuwa» (Lucas 10:2). Jesús kawani pi kaʼankgolh niku xla lakpuwanit naʼan. Uma 70 xtamakgalhtawakgen xlimapaksatkan tatatlanin chu xlimakatsininatkan tuku Jesús lichuwinama.

Jesús ni kawani pi kaʼankgolh masiyakgo ksinagogas. Wata kawani pi kaʼankgolh akgatunu chiki chu kalimapakgsi: «Kaniwa niku natanuyatit kʼakgtum chiki, pulana kawantit: “Kakgalhilh takaksni uma chiki”. Chu komo wi chatum tiku paxki takaksni, mintakaksnikan natamakgxtakgni». ¿Tuku tamakatsin talakaskin nalichuwinankgo xtamakgalhtawakgen Jesús? «Wa xTamapakgsin Dios kalakgtalakatsuwinitan» (Lucas 10:5-9).

Umakgolh tastakyaw nema kamaxki Jesús, xtachuna nema kawanilh 12 apóstoles akxni kamalakgachalh xlakata nalichuwinankgo Dios, liwakaya akgtum kata a itat. Jesús na kawani pi ni putum latamanin tlan xʼamakgo kamakgamakglhtinankgo. Pero xtaskujutkan xʼama makgtayanan xlakata akxni nachan Jesús, lhuwa tiku nalakgapasputunkgo chu nakatsiniputunkgo xpalakata.

Uma 70 xtamakgalhtawakgen tiku lichuwinamakgo Tamapakgsin, lakapala taspitkgo niku wi Jesús. Akxni chinkgo, xatapaxuwan wanikgo: «Malana, asta demonios kinkakgalhakgaxmatnikgoyan akxni kmaklakaskinaw mintukuwani». Jesús lu paxuwa akxni kgaxmata uma xatlan tamakatsin, wa xlakata kawani: «Kakxilha pi Satanás  tamokgosnita xtachuna la makglipni takta kʼakgapun. ¡Kaʼakxilhtit! Kkamaxkinitan limapakgsin xlakata nakalaktayapiyatit luwa chu taskuy [o escorpiones]» (Lucas 10:17-19).

Akxni Jesús chuna kawani, wamputun pi tlan natayanikgo tuku tuwa natitaxtukgo, xtachuna la “nalaktayamikgo luwa chu escorpiones”. Na kawani pi mima kilhtamaku Satanás natamakxtukan kʼakgapun. Jesús na kamakgtaya 70 xtamakgalhtawakgen nakatsikgo tuku tlakg xlakaskinka chuna la natitaxtu kilhtamaku, kawani: «Ni kalipaxuwatit pi xalaklixkajni espíritus kakgalhakgaxmatnikgoyan, wata kalipaxuwatit pi Dios katsokgwilinita mintukuwanikan kʼakgapun» (Lucas 10:20).

Jesús lu paxuwa chu malanki xTlat kxlakatinkan, xlakata lu kaks malakawaninan la kamaklakaskima uma xtamakgalhtawakgen tiku ni xlakaskinka litaxtukgo. Kawani xtamakgalhtawakgen: «Paxuwakgo tiku akxilhkgo tuku wixin akxilhpatit. Xlakata kkawaniyan, lhuwa palakachuwinanin chu mapakgsinanin lu xʼakxilhputunkgo tuku wixin akxilhpatit, pero xlakan ni akxilhkgolh, chu xkgaxmatputunkgo tuku wixin kgaxpatpatit, pero ni kgaxmatkgolh» (Lucas 10:23, 24).