Jesús chuntiya kalitachuwinama Dios latamanin xalak Judea chu kalitachuwinan tuku xlakan lakgapaskgo: borregos chu niku kamakikan. Pero kaj wi tuku kilhchanima. Judíos max lakapastakkgo tuku wa David: «Jehová wa kimapuchwayanina. Nitu kintitsankganilh. Kimajaxa niku wi xaxtakni sekget» (Salmo 23:1, 2). Kʼatanu salmo, David wanilh kachikin: «Kalakgtatsokgostaw Jehová, kiMalakatsukinakan. Xlakata wa kiDioskan chu akinin xkachikin nema mapuchwayani» (Salmo 95:6, 7). Wa xlakata israelitas, tiku stalanikgo Limapakgsin, ankgalhin katamalakxtumikanit borregos.

Tlan nawanaw pi wilakgo niku kamakikan borregos xlakata lakachinkgolh kʼakgtum kachikin nema stalanikgo xLimapakgsin Moisés. Limapakgsin la lipakan nema kamakgtaya ni natlawakgo xtalismaninkan latamanin. Pero makgapitsi israelitas nitlan kalikatsinikgo xborregos Dios. Jesús kawani: «Lu xlikana kkawaniyan pi putum tiku ni anta laktanu kxmalakcha niku kamakikan borregos, wata atanu niku laktawaka xlakata natanu, uma kgalhana. Pero ama tiku laktanu kmalakcha wa xmapuchwayanina borregos» (Juan 10:1, 2).

Tiku kgaxmatnimakgo Jesús max kamalakapastaka lakchixkuwin tiku wankgo pi xlakan Mesías o Cristo. Umakgolh xtachuna kgalhananin, akgsaninanin tiku kachikin ni xlistalanitkan. Wata xlistalanitkan «xmapuchwayanina borregos». Wa uma tuku Jesús wan xlakata mapuchwayanina:

«Wa tiku xkuentajtlawana malakcha malakkini, chu borregos kgaxmatnikgo xtachuwin. Xla kalimapakuwi xtukuwani xborregos chu katamakxtu. Akxni xla katamakxtu putum nema tapakgsinikgo, kapulanitilha, chu borregos stalanikgo xlakata kgalhlakgapaskgo xtachuwin. Ni katistalanikgolh tiku ni lakgapaskgo, wata natsalanikgo, xlakata ni kgalhlakgapaskgo xtachuwin atanu» (Juan 10:3-5).

Titaxtunita kilhtamaku, Juan Mununa litaxtulh la «xkuentajtlawana malakcha» chu wa pi Jesús wa xatlan mapuchwayanina nema xlistalanitkan borregos nema stalanikgo Limapakgsin. Makgapitsi umakgolh latamanin lata tiku xalak Galilea chu xalak Judea kgalhlakgapaskgonit Jesús. Pero amakgapitsin ni akgatekgskgo tuku kalitachuwinama (Juan 10:6). Wa xlakata, max xʼakstu kakgalhskinkan: «¿Niku kinkaliman?» chu «¿Tuku nakitaxtu komo nastalaniyaw?».

Jesús kawani: «Lu xlikana kkawaniyan pi akit malakcha niku laktanukgo borregos. Putum tiku minkgonit chu nitlan limaklakaskinkgonit kintukuwani wa umakgolh kgalhananin; pero borregos ni kgaxmatnikgonit. Akit malakcha; putum tiku nakilakgmin xlakata natanu, nalakgtaxtu, chu xla natanu chu nataxtu chu natekgsa sekget» (Juan 10:7-9).

Liwana tasiya pi Jesús lichuwinama tuku xasasti. Tiku kgaxmatnimakgo katsikgo pi xla ni wa «malakcha» uma wamputun talakkaxlan xla Limapakgsin nema akglhuwata kata kapulalima. Tuku wamputun wa pi borregos nema «katamakxtu», alakatanu niku nakatamaknu. ¿Tuku xlakata?

Jesús tlakg lichuwinan xlakata taskujut nema lakgaya. Wan: «Akit kminit xlakata nakgalhiyatit latamat chu nikxni katisputli. Akit xatlan mapuchwayanina; xatlan mapuchwayanina masta xlatamat xpalakata borregos» (Juan 10:10, 11). Pulana, Jesús xkalimatliwakglhnita uma tachuwin xtamakgalhtawakgen: «Ni kapekuantit, ni xalhuwa borregos, xlakata minTlatkan xatapaxuwan nakamaxkiyan Tamapakgsin» (Lucas 12:32). Jesús nakapulalin «ni xalhuwa borregos» kxasasti niku kamakikan “xlakata nakgalhikgo latamat chu nikxni nasputa”. ¡Lu tlan katatapakgsikan umakgolh borregos!

Pero Jesús wampara: «Kkgalhi amakgapitsi borregos nema ni unu tanumakgolh; xlakan na nakkalimin, chu nakgaxmatkgo kintachuwin, chu  kgamputum borregos nalitaxtukgo chu kaj chatum mapuchwayanina naʼanan» (Juan 10:16). Uma «amakgapitsi borregos» ni anta katatanumakgolh «ni xalhuwa borregos», nema namakglhtinankgo Tamapakgsin. Pulakatunu grupo tanu tanu tuku nakalakgchan kilhtamaku nema aku mima. Pero xputumkan nalitamakgtayakgo tuku Jesús tlawanit. Jesús wan pi “xaTlat paxki xlakata makamasta xlatamat” (Juan 10:17).

Lhuwa latamanin wankgo: «Laktanuma demonio, chu akgwiti». Pero amakgapitsin kaks kgaxmatnimakgo chu limasiyakgo pi stalaniputunkgo «xatlan mapuchwayanina» chu wankgo: «Tiku laktanuma demonio ni chuna chuwinan. Demonio nila tlawa pi nalakawanankgo tiku lakgaxokgo, ¿ni xlikana?» (Juan 10:20, 21). Max lichuwinamakgo akxni Jesús mapaksalh chixku tiku lakgaxokgo xlakachinit.