Kkasipijni nema wi kxʼoriente sipi xla Olivos, max akgtutu kilómetros xlimakgat lata kJerusalén, wi aktsu kachikin Betania (Juan 11:18). Jesús an kxchikkan Marta chu María. Xlakan chu xtalakan Lázaro xʼamigoskan Jesús, wa xlakata tlan makgamakglhtinankgo.

Akgtum lanka talakgalhaman pi Mesías wi kxchikkan. Marta lakaskin pi Jesús kgama kawayalh, wa xlakata tsuku kaxtlawa kgama liwat. Marta tlawama liwat, pero María kajwatiya lakgawi Jesús chu kgaxmatnima. Alistalh Marta wani Jesús: «Malana, ¿ni akxilha pi kintala tsumat kiʼakstu kimakgxtakgli xlakata naktlawa taskujut? Kawani pi kamilh chu kakimakgtayalh» (Lucas 10:40).

Pero Jesús ni lakakilhni María. Wata stakyawa Marta xlakata lu xlakaskinka akxilha taway: «Marta, Marta, lhuwa tuku lilakgaputsapat. Pero kaj ni lhuwa tuku talakaskin, o kaj pulaktum. Pero María laksakli tuku tlakg xatlan, chu ni katimakglhtika» (Lucas 10:41, 42). Jesús maʼakxilhni pi ni talakaskin nalimaxtukan lhuwa kilhtamaku xlakata natlawakan tipalhuwa liwat. Kaj pulaktum talakaskin.

Marta tlan tuku tlawaputun, tlan xmakgamakglhtinamputun Jesús. Pero lu xlakaskinka akxilhma liwat pi makgatsankgama lanka talakgalhaman nakatsini xpalakata xKgawasa Dios. Jesús wan pi María tlan tuku laksakli, xlakata tuku nakatsini xpalakata Jesús namakgtaya putum xlatamat. Tuku tlawalh María wi tuku lu xlakaskinka kinkamasiyaniyan nema kililakapastakatkan.

Atanu kilhtamaku, Jesús masiya atanu tuku na xlakaskinka. Chatum xtamakgalhtawakgen wani: «Malana, kakinkamasiyani chuna la naktlawayaw kiʼoracionkan, xtachuna la Juan na kamasiyanilh xtamakgalhtawakgen» (Lucas 11:1). Max akgtum kata aitat titaxtunit, Jesús xlichuwinanita uma kxTaʼakgchuwin xalak Sipi (Mateo 6:9-13). Pero max uma xtamakgalhtawakgen ni anta xwi, wa xlakata Jesús wampara tuku tlakg xlakaskina xla xTaʼakgchuwin xalak Sipi. Alistalh lichuwinan tuku limasiya la xlilakaskinka makglhuwa natlawayaw oración.

«Kalilakpuwantit pi wixin kgalhiyatit chatum amigo chu lakgpinatit itat tsisni chu waniyatit: “Amigo, kakimasakwani maktutu kaxtalanchu, xlakata chatum kiʼamigo lata makgat kilakgminitancha chu ni kkgalhi tuku naktawa”. Pero xla kgalhtinan kxpulakni xchik: “Ni kakimakglhuwi. Malakcha liwana lakchuwaya, chu akxtum kkatamakgolha laktsu kinkamanan kputama. Nila ktaki chu nila tuku kmaxkiyan”. Kkawaniyan, pi maski miʼamigojkan, xla ni katitakilh itat tsisni chu nitu katikamaxkin, pero xlakata lhuwa limaʼakgatsankgepatit, nataki chu nakamaxkiyan tuku lakaskinatit» (Lucas 11:5-8).

Jesús ni wamputun pi Jehová ni kgalhtiputun kioracionkan la uma amigo. Wata masiya pi komo chixku tiku ni xmakgtayaputun xʼamigo makgtaya xlakata maʼakgatsankgema, xapaxkina kinTlatkan xalak akgapun nakgalhti xʼoracionkan kskujnin tiku ni makgxtakgkgo. Jesús wampara: «Chuntiya kaskintit, chu nakamaxkikanatit; chuntiya kaputsatit chu natekgsatit; chuntiya kalakgatlakgtit malakcha chu nakamalakkinikanatit. Xlakata putum tiku skin maxkikan, chu tiku putsa tekgsa, chu tiku lakgatlakga malakcha namalakkinikan» (Lucas 11:9, 10).

Alistalh, Jesús tlakg liwana masiya uma akxni tamalakxtumi tuku tlawakgo natlatni: «Xlikana, ¿pi anan chatum tlat komo xkgawasa naskini tantum skiti, wata luwa namaxki? Chu komo naskini akgtum kgalhwat, ¿namaxki tantum taskuyu [o escorpión]? Wa xlakata, maski wixin lixkajni likatsiyatit, katsiniyatit kamaxkiyatit xatlan tamaskiwin minkamanankan, ¡tlakg xaliwaka minTlatkan tiku wi kʼakgapun nakamaxki espíritu santo tiku skinikgo!» (Lucas 11:11-13). Xlikana, kinTlatkan xalak akgapun kinkakgaxmatniputunan chu kinkamaxkiputunan tuku maklakaskinaw.