Jesús antiyaku wi kJerusalén xlakata namakgtlawa Fiesta xla Laktsu Chiki. Paxuwa pi lhuwa tiku wilakgo anta kanajlanikgonit. Pero uma ni kamakgapaxuwa xpulalinanin takanajla, tiku kamalakgachakgo xkuentajtlawananin templo xlakata nachipakgo Jesús (Juan 7:31, 32). Maski chuna, Jesús ni tatsekga.

Chuntiya masiya kkachikin chu kawani: «Atsinu kilhtamaku nakkatalatamayan chu naklakgan Tiku kimalakgachanit. Wixin nakimputsayatit, pero ni kintitekgstit, chu anta niku naktawila wixin nila tanatit» (Juan 7:33, 34). Judíos ni akgatekgsnikgo, wa xlakata lawani: «¿Niku lakpuwanit naʼan uma chixku, chu akinin nila natekgsaw? ¿Pi nakalakgan judíos tiku wilakgolh kxlakgstipankan griegos chu nakamasiyani griegos? ¿Tuku wamputun akxni wan: “Nakimputsayatit, pero ni kintitekgstit, chu anta niku naktawila wixin nila tanatit”?» (Juan 7:35, 36). Jesús kalitachuwinama xlakata akxni nani chu namalakastakwanikan xlakata naʼanan kʼakgapun, niku xtalamakgasitsin nila katistalanikgolh.

Tsuku xliʼakgtujun kilhtamaku lata tlawamaka fiesta. Akxni tlawakan uma fiesta, chali chali tsisa chatum sacerdote makutu chuchut kpila nema wanikan Siloam chu xtakgawaka kxpumakamastan templo. Max Jesús kamalakapastaka latamanin uma talismanin akxni pixlanka kawani: «Komo wi tiku kgalhputima, kakilakgmilh chu kakgotnalh. Chuna la wan Tatsokgni, xpalakata putum tiku nakinkanajlani: “Lata kxnaku nataxtuyacha chuchut nema masta latamat”» (Juan 7:37, 38).

Jesús lichuwinama tuku nala akxni xtamakgalhtawakgen nakalilaksakkan espíritu santo chu nakatasanikan xlakata nalatamakgo kʼakgapun akxni Jesús ninita nawan. Kkata nema mima, kPentecostés, natsuku taxtu «chuchut nema masta latamat» akxni xatalaksakni kstalaninanin  Cristo nakalitachuwinankgo tuku xaxlikana amakgapitsin.

Akxni kgaxmatnikgo Jesús, makgapitsi wankgo: «Xlikana pi wa uma Palakachuwina». Max lichuwinamakgo tlakg xlakaskinka palakachuwina nixawa Moisés, nema lichuwinankanit kTatsokgni. Amakgapitsi wankgo: «Wa uma Cristo». Pero atanu wankgo: «Cristo ni naminacha kʼGalilea. ¿Ni wan Tatsokgni pi Cristo minacha kxkilhtsukut David chu kBelén, anta aktsu kxkachikin David?» (Juan 7:40-42).

Latamanin ni lakxtum tuku lakpuwankgo. Maski makgapitsin lakaskinkgo pi kachipaka Jesús niti chuna tlawa. Akxni xkuentajtlawananin templo kalakgtaspitkgo xpulalinanin takanajla chu ni linkgo Jesús, xanapuxkun sacerdotes chu fariseos kakgalhskinkgo: «¿Tuku xlakata ni litantit?». Xlakan kgalhtinankgolh: «Nikxni chuna chuwinanit chatum chixku». Xpulalinanin takanajla lu sitsikgo, kalikgalhkgamanankgo chu lixkajnit kawanikgo: «¿Wixin na mastanitantit talakaskin nakaʼakgskgawiyan? ¿Anankgo mapakgsinanin o fariseos tiku na kanajlanikgonit? Pero umakgolh latamanin tiku ni lakgapaskgo Limapakgsin, Dios nitlan kaʼakxilha» (Juan 7:45-49).

Ama kilhtamaku, Nicodemo, fariseo tiku makgtapakgsi kSanedrín, kgalhmakgtaya Jesús. Titaxtunita akgtiy kata aitat, Nicodemo xlakgapaxialhnanit Jesús katsisni chu xlimasiyanit pi xkanajlani. La uku kgalhmakgtaya akxni wan: «Kilimapakgsinkan ni masta talakaskin pi nalakputsananikan chatum chixku komo ni pulana nakgaxmatkan tuku wan xpalakata chu nakatsikan tuku tlawanit, ¿ni xlikana?». Chu wanikgo: «¿Na xalak Galilea wix? Kalakputsanani Tatsokgni, chu kaʼakxilhti pi kʼGalilea ni katitaxtucha chatum palakachuwina» (Juan 7:51, 52).

Tatsokgni ni xwan pi chatum palakachuwina xʼama minacha kʼGalilea. Pero xlichuwinan pi Cristo xʼama min anta, xlakata xwankanit pi kʼGalilea «niku wilakgolh tiku xala atanu kachikinin», xʼama tasiya «lanka xkgakganat» (Isaías 9:1, 2; Mateo 4:13-17). Nachuna, Jesús lakachilh kBelén chu kxfamilia David minacha chuna la xtatsokgnit. Maski max fariseos katsikgo putum uma, max wa malakgatumikgonit taʼakgsanin xlakata Jesús.