La uku Jesús an kJerusalén xlakata natlawa Fiesta xla Tamakamastan (o Janucá). Uma fiesta lilakapastakkan akxni makamastaparaka templo. Titaxtunita liwaka akgtum ciento kata, akxni sirios xʼakgchipakgonita Jerusalén, mapakgsina Antíoco IV Epífanes tlawanilh akgtum pumakamastan nixaxlikana dios anta niku xwi xpumakamastan xtemplo Dios. Titaxtulh kilhtamaku, xkamanan chatum sacerdote judío lakgmaxtukgolh Jerusalén chu makamaxkiparakgolh Jehová templo. Lata ama kilhtamaku, tlawakan uma fiesta akgatunu kata, tsuku 25 xla kislev. Uma papaʼ judío lakgchan akxni sputmaja noviembre chu tsukuma diciembre.

Uma kilhtamaku lu lonkgnan. Jesús wi ktemplo, tlawama niku yakgo xtalayaw Salomón, akxni judíos lakgtalakatsuwikgo chu wanikgo: «¿Tuku kilhtamaku nakinkawaniya xaxlikana, komo wix Cristo o ni?» (Juan 10:22-24). Jesús kakgalhti: «Kkawanin pero ni kanajlayatit». Jesús ni liwana kawani pi xla Cristo, ni xtachuna la litachuwinalh samaritana kxpaxtun pozo (Juan 4:25, 26). Pero kawaninit tiku xla, xlakata kawaninit: «Akxni nina xlama Abrahán, akit xaklamaja» (Juan 8:58).

Jesús lakaskin pi latamanin xʼakstu kakatsikgolh pi xla Cristo, chu lakaskin pi katamalakxtumikgolh tuku xla tlawa chu tuku xwankanit pi xʼama tlawa Mesías. Wa uma tuku xlakata kawaninit xtamakgalhtawakgen pi niti nawanikgo tiku litaxtu. Pero la uku liwana kawani uma xalaktsakat judíos: «Tuku ktlawa kxtukuwani kinTlat, lichuwinan kimpalakata. Pero wixin ni kanajlayatit» (Juan 10:25, 26).

¿Tuku xlakata ni kanajlakgo pi Jesús wa Cristo? Xla wan: «Wixin ni kanajlayatit xlakata wixin ni kiborregos. Kiborregos kgaxmatkgo kintachuwin chu akit kkalakgapasa, chu xlakan kistalanikgo. Akit kkamaxki latamat nema ni kgalhi xlisputni chu nikxni katikamasputuka chu niti kintiʼakgxwatamakglhtilh kkimakan. Tuku kinTlat kimaxkinit tlakg xlakaskinka nixawa putum amakgapitsin». Alistalh, Jesús masiya pi lu tlan talalin xTlat, wan: «Akit chu xaTlat chatum klitaxtuyaw» (Juan 10:26-30). Pero xlakata Jesús lama kKatiyatni chu xTlat kʼakgapun, uma ni wamputun pi xlakan watiya. Wata wamputun pi chatum litaxtukgo xlakata lu tlan latalalin chu akxtum skujkgo xlakata wi tuku namakgantaxtikgo.

Tuku wan Jesús lu lisitsikgo judíos chu aktalamakgniputunkgo, pero xla ni pekuan. Kawani: «Lhuwa xalakwan tatlaw tuku ktlawalh nema xaTlat kilimapakgsinit. ¿Xatuku tatlaw kiliʼaktalaputunatit?». Judíos kgalhtikgo: «Ni wa xlakata tuku xatlan tatlaw kkalitalaputunan, wata xlakata lixkajni lichuwinanita Dios; [...] wana pi wix chatum dios» (Juan 10:31-33). Pero xla nikxni wanit pi Dios. ¿Tuku xlakata limawakakgo pi chuna wan?

Chuna wankgo xlakata Jesús wan pi kgalhi litliwakga, nema judíos wankgo pi kajwatiya Dios kgalhi. Akgtum liʼakxilhtit, xpalakata «borregos», xla wanit: «Akit kkamaxki latamat nema ni kgalhi xlisputni» (Juan 10:28). Pero judíos ni kuentajtlawakgo pi Jesús wanit pi wa xTlat maxkinit limapakgsin.

Xlakata nalimasiya pi nixlikana tuku wankgo, Jesús kgalhskininan: «¿Ni tatsokgnit kmiLimapakgsinkan [Salmo 82:6]: “Akit kwa: «Wixin dioses»”? Komo xla kalimapakuwilh “dioses” ama tiku kalistakyawalh xtachuwin Dios, [...] ¿wixin kiwaniyatit, tiku xaTlat masantujlilh chu malakgachalh kkakilhtamaku “Lixkajni lichuwinana Dios”, xlakata kwa “Akit xKgawasa Dios”?» (Juan 10:34-36).

Tatsokgni kalimapakuwi jueces la «dioses». ¿Tuku xlakata judíos makgniputunkgo Jesús akxni wan «akit xKgawasa Dios»? Jesús kawani tuku xlilat nakamakanajli: «Komo ni ktlawa xtaskujut kinTlat, ni kakinkanajlanitit. Pero komo ktlawa tatlaw,  maski akit ni nakinkanajlaniyatit, kakanajlanitit tuku ktlawa, xlakata nakatsiyatit chu chuntiya kakatsitit pi kinTlat akxtum kintawi chu akit akxtum ktawi xaTlat» (Juan 10:37, 38).

Judíos chipaputunkgo Jesús, pero xla tsalapara. Taxtu kJerusalén, patakuta kgalhtuchokgo Jordán chu chan niku Juan tsukulh kamunu latamanin chu max titaxtunita akgtati kata. Max uma wi kxsur pupunu xalak Galilea.

Anta, lhuwa tiku ankgo akxilhkgo Jesús chu lawani xchatunukan: «Juan nipara akgtum milagro tlawalh, pero putum tuku Juan lichuwinalh xpalakata uma chixku, xaxlikana xwanit» (Juan 10:41). Wa xlakata, lhuwa judíos kanajlanikgo Jesús.