Jesús aku lichuwinalh pi «ni xalhuwa borregos» natawilakgo kxTamapakgsin Dios (Lucas 12:32). Pero tiku makgtapakgsikgo ni xalhuwa borregos, ni xlilakpuwanatkan pi ni xlakaskinka uma takgalhkgalhin. Wa xlakata, Jesús wan pi xlakaskinka pi tiku namakgtapakgsikgo kʼuma Tamapakgsin, xliʼakxilhatkan chuna la xlilat.

Jesús kawani xtamakgalhtawakgen pi skgalalh katawilakgolh xlakata nakatsikgo akxni nataspita. Kawani: «Kalhakganantit chu skgalalh katawilatit chu kamapasiwilitit mimakgskgotkan, chu wixin xtachuna kalitaxtutit la lakchixkuwin tiku kgalhkgalhikgo xmalanakan xlakata [nakitaspita niku tamakgaxtokgmaka], wa xlakata, akxni taspita chu lakgatlakga malakcha, xlakan tunkun malakkinikgo. ¡Paxuwakgo amakgolh lakskujnin tiku akxni chin xmalanakan nakatekgsa pi kuentajtlawanamakgolh!» (Lucas 12:35-37).

Xtamakgalhtawakgen Jesús liwana akgatekgskgo tuku xla kawani. Skujnin nema Jesús kalichuwinalh, skgalalh xwilakgo chu xkgalhkgalhimakgo xtaspitli xmalanakan. Jesús wan: «Komo [malana] namin itat tsisni, o asta akxni tasa puyu, chu katekgsa pi skgalalh wilakgolh, ¡xlakan lu paxuwakgo!» (Lucas 12:38).

Jesús ni kawanima pi kajwatiya tlan skujni kalitaxtukgolh. Uma chuna, xlakata Jesús, xKgawasa chixku na makgtanuma kliʼakxilhtit. Jesús kawani xtamakgalhtawakgen: «Nachuna wixin, skgalalh katawilatit, xlakata kilhtamaku akxni max ni lakpuwanatit, mima xKgawasa chixku» (Lucas 12:40). Wa xlakata, kkilhtamaku nema aku mima, Jesús namin chu lakaskin pi xtamakgalhtawakgen, liwaka «ni xalhuwa borrego», skgalalh katawilakgolh.

Pedro akgatekgsputun tuku wan Jesús, wa xlakata kgalhskin: «Malana, ¿kajwatiya akinin kinkawanipat uma liʼakxilhtit, o nachuna amakgapitsin?». Pero Jesús ni tunkun wani xatakgalhtin, wata kalitachuwinan atanu liʼakxilhtit nema tatalakxtumi tuku lichuwinanita: «¿Tiku xlikana litaxtu xkuentajtlawana chiki xatalipaw chu xaskgalala, tiku xmalana nalakgayawa amakgapitsi kskujnin xlakata chuntiya nakamaxki xtawaykan akxni xlilat? ¡Paxuwa ama skujni komo akxni nachin xmalana namanokglhu pi chuna tlawama! Xlikana kkawaniyan pi nalakgayawa putum tuku kgalhi» (Lucas 12:41-44).

Kxapulana liʼakxilhtit, tasiya pi «malana» wa kilhchanima Jesús, xKgawasa chixku. Xlilat nalakpuwanaw pi «xkuentajtlawana chiki xatalipaw chu xaskgalala» nema lichuwinankan kxliʼakgtiy liʼakxilhtit wa kakilhchanima tiku makgtapakgsikgo «ni xalhuwa borregos» chu namakglhtinankgo Tamapakgsin (Lucas 12:32). Jesús wan pi makgapitsi tiku tapakgsikgo ni xalhuwa borrego xʼamakgo kamaxkikgo «amakgapitsi kskujnin» «xtawaykan akxni xlilat». Wa xlakata Pedro chu amakgapitsi xtamakgalhtawakgen Jesús nema xla kamasiyani chu kamaxki tuku maklakaskinkgo kxtakanajlakan akgatekgskgo pi xKgawasa chixku nataspita kkilhtamaku nema aku mima. Ama kilhtamaku, liwana nalakkaxwilikan xlakata nakamaxkikan tuku maklakaskinkgo xla kxtakanajlakan «amakgapitsi kskujnin» malana, uma kakilhchanima xtamakgalhtawakgen Jesús.

Jesús wan apulaktu tuku xlakata xtamakgalhtawakgen skgalalh xlitawilatkan chu xlikuentajtlawatkan xtapuwankan. Komo ni chuna xtlawakgolh max xtsukukgolh katalatlawakgo amakgapitsi skujnin. Jesús wan: «Pero komo xmilh kilhtamaku ama skujni xlakpuwa “Kimalana makgapalama”, chu natsuku kalakgkgaxiwili skujnin lakchixkuwin chu lakpuskatin chu natsuku wayan chu kgota chu naʼakgkgachitama, nachin xmalana ama skujni akxni xla nipara kgalhkgalhima chu ama hora akxni xla ni katsi, chu lu palha namalakgaxokge chu akxtum nakatawili tiku ni kgalhakgaxmatnankgo» (Lucas 12:45, 46).

 Alistalh Jesús wan pi minit «mapasi lhkuyat kkatiyatni». Tlan nawanaw pi chuna tlawanit xlakata lichuwinanit tuku wilinit taʼakglhuwit chu kamasputunit nixaxlikana tamasiy chu talismanin, xtachuna la kalhkuyulh. Uma asta tlawanit pi makgapitsi tiku akxtum xwilakgo nialh latalalin, tlawanit pi «xatlat nalakataki xkgawasa chu xakgawasa nalakataki xtlat, xatse nalakataki xtsumat chu xatsumat nalakataki xtse, chu xaputiatse nalakataki xpuwiti chu xapuwiti nalakataki xputiatse» (Lucas 12:49, 53).

Jesús kajwatiya xkatachuwinama xtamakgalhtawakgen, pero la uku katachuwinan putum tiku anta wilakgo. Lhuwa tiku ni kanajlakgo tuku limasiya pi xla Mesías. Wa xlakata, kawani: «Akxni akxilhatit tasiya puklhni niku tatsekga chichini, tunkun wanatit “Namin unisen”, chu kgantaxtu. Chu akxni akxilhatit pi minacha un ksur, wanatit “Lu tliwakga nalhkaknan”, chu chuna la. Lakgaputiyunanin, katsiyatit lakputsananiyatit la tasiya katiyatni chu akgapun, pero ¿tuku xlakata ni akgatekgsatit tuku lama uma kilhtamaku?» (Lucas 12:54-56). Liwana tasiya pi xlakan ni skgalalh wilakgo.