Jesús antiyaku wi kJerusalén chu masiyama tuku lu xlakaskinka akxni tlawamaka Fiesta xla Laktsu Chiki. Makgapitsi judíos aku wanikgolh pi xlakan xkamanan Abrahán chu nikxni skujnin litaxtukgonit. Wa xlakata, Jesús kakgalhti: «Akit kkatsi pi wixin xkamanan Abrahán. Pero kimakgniputunatit, xlakata ni makgamakglhtinanatit tuku kmasiya. Akit klichuwinan tuku kakxilhli akxni xaktawi kinTlat, pero wixin tlawayatit tuku kgaxpatninitantit mintlatkan» (Juan 8:33, 37, 38).

Tuku Jesús kawani liwana masiya pi xla chu judíos ni watiya xtlatkan. Pero judíos ni akgatekgskgo chu waniparakgo: «Kintlatkan wa Abrahán» (Juan 8:39; Isaías 41:8). Lakpuwankgo pi komo kxfamilia Abrahán minkgoyacha, watiya takanajla kgalhikgo la Abrahán, tiku xʼamigo Dios xlitaxtu.

Pero Jesús kawani tuku lu kaks malakawaninan: «Komo wixin xkamanan xlitaxtutit, xtlawatit tuku tlawalh Abrahán». Putum kamanan stalaniputunkgo xliʼakxilhtit xtlatkan. Alistalh, kawanipara: «Pero uku kimakgniputunatit, akit kkalitachuwinanitan xaxlikana tuku kkgaxmatninit Dios. Abrahán nikxni chuna xtitlawaputulh». Chu alistalh kalimalakpuwani uma: «Wixin tlawapatit xtatlaw mintlatkan» (Juan 8:39-41).

Judíos chuntiya ni akgatekgskgo tiku kalitachuwinamaka chu wankgo: «Akinin ni klakachinitaw ktalakgxtumit nema ni xlitatlawat; kaj chatum Tlat kkgalhiyaw, wa Dios». Pero ¿xlikana xkamanan Dios? Jesús kawani: «Komo xlikana Dios minTlatkan xwa, wixin xkimpaxkitit xlakata wa Dios kimalakgachanit chu unu kwi. Xlakata ni kaj kiʼakstu kintapuwan kminit, wata Xla kimalakgachanit». Alistalh katlawani akgtum takgalhskinin chu wa kgalhtinan: «¿Tuku xlakata ni akgatekgsatit tuku kkawaniman? Xlakata ni kgaxpatputunatit kintachuwin» (Juan 8:41-43).

Jesús xkamaʼakgatekgsniputun tuku nakakitaxtuni komo nalakgmakgankgo, pero la uku lakatitum kawani: «Wixin wa tapakgsiniyatit mintlatkan Akgskgawini, chu tlawaputunatit xtalakaskin mintlatkan». Chu ¿la likatsi xtlatkan? Jesús kawani: «Xla makgnina xwanit lata akxni wa taʼakgsanin xlakata Dios, lakgmakgalh tuku xaxlikana, xlakata ni lakgati tuku xaxlikana». Chu wampara: «Tiku tapakgsini Dios kgaxmata tuku wan Dios. Wa xlakata ni kinkgaxpatniyatit, xlakata ni tapakgsiniyatit Dios» (Juan 8:44, 47).

Judíos lu lisitsikgo tuku kawanikan chu wanikgo: «Xlikana akxni kwanaw “Wix xalak Samaria chu kgalhiya demonio”». Wanikgo pi xla xalak Samaria xlakata nalimasiyakgo pi lakgmakgankgo. Pero Jesús ni kuenta katlawani chu kawani: «Akit ni kkgalhi demonio, wata kmaxki kakni kinTlat, chu wixin kimamaxaniyatit». Xlakata nakamasiyani pi uma ni kaj takgaman, kawani tuku kaks kamalakawani: «Komo wi tiku chuntiya makgantaxti kintachuwin, nikxni katinilh». Jesús ni wamputun pi xʼapóstoles chu amakgapitsi xtamakgalhtawakgen nikxni katinikgolh. Wata wamputun pi ni katikamalakgsputuka putum kilhtamaku o ni katiʼakxilhkgolh «xliʼakgtiy linin», nema wamputun pi nialhla lakastakwanankan (Juan 8:48-51; Apocalipsis 21:8).

Pero judíos ni akgatekgskgo tuku Jesús kawani, wa xlakata wanikgo: «Uku kkatsiyaw pi kgalhiya demonio. Abrahán nilh, nachuna palakachuwinanin, pero wix wana “Komo wi tiku chuntiya makgantaxti kintachuwin, nikxni katinilh”. Wix ni tlakg xlakaskinka nixawa kintlatkan Abrahán, tiku nilh, ¿ni xlikana? [...] ¿Tiku lakpuwana pi litaxtuya?» (Juan 8:52, 53).

Jesús kamasiyanima pi xla Mesías. Pero ni kawani tiku xla, wata kawani: «Komo akit kiʼakstu kimalankikan, kililanka nitu litaxtu. Wa kinTlat tiku kimalanki, wa tiku wixin wanatit pi miDioskan. Pero wixin ni lakgapasnitantit, pero akit klakgapasa. Chu komo xakwa pi ni klakgapasa, xaklitaxtulh chuna la wixin, chatum akgsanina» (Juan 8:54, 55).

 Jesús lichuwinampara Abrahán: «Mintlatkan Abrahán lipaxuwalh xlakata lu xʼakxilhputun akxni xakkama min. Xla akxilhlakachalh ama kilhtamaku chu lipaxuwalh». Chuna, Abrahán lu xkanajlani xtamalaknun Dios chu xʼakxilhputun akxni xchilh Mesías. Pero judíos ni kanajlakgo tuku Jesús kawani chu wanikgo: «Nina kgalhiya tipuxamakaw kata, ¿chu wana pi akxilhnita Abrahán?». Chu xla kakgalhti: «Lu xlikana kkawaniyan pi akxni nina xlama Abrahán, akit xaklamaja». Jesús lichuwinama akxni chatum tliwakga ángel xlitaxtu kʼakgapun chu nina xmin kKatiyatni (Juan 8:56-58).

Akxni kgaxmatkgo pi xla wan pi xlama akxni nina xlama Abrahán, judíos lu sitsikgo chu sakikgo chiwix xlakata naʼaktalakgo, pero xla katsalani.