Jesús lhuwa tuku tlawanit xlakata latamanin nalilakpuwankgo la talalinkgo Dios. La uku, akxni katakgalhchuwinanita kxkilhtin xchik fariseo, amakgtum kamalakpuwanipara uma.

Makgapitsi litachuwinankgo tuku nitlan xlanit. Wanikgo pi «Pilato kamakgnilh galileos tiku xmakamastamakgolh tamakamastan» (Lucas 13:1). ¿Tiku xkalichuwinamaka?

Max wa galileos tiku kamakgnika akxni lhuwa judíos talalakatawakakgolh Pilato xlakata xmaklakaskinit tumin nema xmastakan ktemplo chu xlitlawanit tuku xlilh chuchut asta kJerusalén. Max xpulalinanin templo wa tiku maxkikgolh uma tumin. Tiku litachuwinankgo Jesús tuku lalh max lakpuwankgo pi umakgolh galileos kamalakgaxokgeka xlakata xtlawakgonit tuku nitlan. Pero Jesús nichuna lakpuwan.

Xla kakgalhskin: «¿Lakpuwanatit pi galileos tiku kaʼakgspulalh uma, tlakg makglakgalhinanin xwankgonit nixawa putum galileos?». Jesús kawani pi ni. Pero maklakaskin uma xlakata wi tuku nakawani judíos: «Komo wixin ni namakgxtakgatit mintalakgalhinkan, mimputumkan na nakamalakgsputukanatit» (Lucas 13:2, 3). Alistalh Jesús kalitachuwinan tuku max lalh nina makgas chu max chuna lalh akxni xtlawamaka uma tuku xlilh chuchut.

Jesús kawani: «Amakgolh kgalhkutsayan tiku kalaktamalh torre chu kamakgnilh lakatsu kSiloam, ¿lakpuwanatit pi tlakg xlinkgo kuenta nixawa putum lakchixkuwin tiku lamakgolh kJerusalén?» (Lucas 13:4). Max lakpuwankgo pi umakgolh latamanin nikgolh xlakata tlawakgolh tuku nitlan. Pero Jesús nichuna lakpuwan. Xla katsi pi «tuku xalan lay» kaj lakapala chuna lay, chu max chuna lalh uma kilhtamaku (Eclesiastés 9:11). Maski chuna, latamanin wi tuku xlikatsinitkan xlakata tuku lalh. Wa xlakata kawani: «Komo wixin ni namakgxtakgatit mintalakgalhinkan, mimputumkan na nakamalakgsputukanatit, chuna la xlakan» (Lucas 13:5). ¿Tuku xlakata Jesús chuna kawani?

Xlakata amaja masputu xtaskujut. Wa xlakata wili uma liʼakxilhtit: «Chatum chixku xchanit akgatum xakiwi higo niku xkachanit uvas, chu milh putsa xatawakat pero nitu tekgsli. Alistalh wanilh tiku xkuentajtlawana niku xchankanit uvas: “Akgtututa kata lata kmin putsa xtawakat uma higo, pero nitu ktekgsnit. ¡Katankapi! ¿Tuku xlakata kaj akgchipama tiyat?”. Xla kgalhtilh chu wanilh: “Malana, kamakgxtakgpara akgtum kata asta akxni naktantuwaxa chu nakmujuni kgatsasa. Komo kilhtamaku nema aku mima namasta xtawakat, lu tlan; pero komo ni, tlan nakaya”» (Lucas 13:6-9).

Liwakaya akgtutu kata Jesús liskujnit xlakata judíos nakanajlakgo. Pero maski lhuwa liskujnit, ni lhuwa judíos xtamakgalhtawakgen litaxtukgonit. La uku, xliʼakgtati kata la lichuwinama Dios chu tlakg maliwakanit xtaskujut. Akxni xkalitachuwinama Dios judíos chu xmasiyama kJudea chu kPerea, xtachuna la xwaxnama chu xlistiliwilima abono xakiwi higo. ¿La kitaxtuninit? Ni lhuwa judíos kgaxmatkgonit. Kachikin ni lakgmakgamputun tuku nitlan tlawama, wa xlakata namalakgsputukan.

 Ni makgas titaxtu liwana tasiyapara pi ni kgaxmatputunkgo. Akxni Jesús masiyama ksinagoga kʼakgtum sábado, akxilha chatum puskat tiku tapunksnit o nila taʼaktsaja lata akgkutsayan kata xkuenta chatum demonio. Jesús lakgalhaman chu wani: «Puskat, mapaksanikana mintajatat» (Lucas 13:12). Alistalh xama, chu puskat kaj lakapala tsuku taʼaktsaja chu tsuku malanki Dios.

Akxni xpulalina sinagoga akxilha uma, sitsi chu wan: «Akgchaxan kilhtamaku anan xlakata tlan skujkan; wa xlakata katantit chu kakamapaksakantit amakgolh kilhtamaku, ni akxni Sábado» (Lucas 13:14). Uma chixku ni wan pi Jesús ni kgalhi litliwakga xlakata nakamapaksa tiku tatatlakgo. Wata kakilhni latamanin xlakata minkgo sábado xlakata nakamapaksakan. Jesús kalikgalhti tuku xlakan nila wankgo pi nixlikana: «Lakgaputiyunanin, ¿ni xkutatit wixin kSábado mintorojkan o miburrojkan niku lakgachinunitantit, chu lipinatit xlakata namakgotniyatit? ¿Ni xlilat pi uma puskat tiku chatum xalak xfamilia Abrahán chu tiku Satanás akgkutsayan kata tlawalh pi xpatinalh namapaksanikan xtajatat kSábado?» (Lucas 13:15, 16).

Xtalatlawananin maxanankgo, pero lhuwa tiku lipaxuwakgo tuku tlawa Jesús. Alistalh, xla lichuwinan unu kJudea pulaktiy liʼakxilhtit xlakata Tamapakgsin nema xlichuwinanita akxni xmasiyama kʼakgtum barco kpupunu xalak Galilea (Mateo 13:31-33; Lucas 13:18-21).