Akxni Jesús wayama kxchik chatum fariseo, lhuwa latamanin kgalhkgalhimakgo kkilhtin. Uma nachuna lalh kʼGalilea (Marcos 1:33; 2:2; 3:9). Unu kJudea lhuwa tiku akxilhputunkgo chu kgaxmatniputunkgo. Uma latamanin nichuna lakpuwankgo la fariseos tiku tawayamakgo Jesús.

Tuku pulana wan Jesús lu xlakaskinka xpalakata xtamakgalhtawakgen: «Kuentajkatlawatit ni nakapasayan xlimaxkutinkan fariseos, nema tatalakxtumi xaʼakgsanina xnakujkan». Jesús xlichuwinanita uma, pero tuku akxilha akxni wayama malakpuwani pi xlakaskinka namastapara uma tastakyaw (Lucas 12:1; Marcos 8:15). Fariseos max limasiyaputunkgo pi kakninanikgo Dios xlakata matsekgputunkgo pi nitlan likatsikgo, pero tuku tlawamakgo lu nitlan, wa xlakata talakaskin nakatsikan la likatsikgo. Jesús wan: «Ni anan tuku liwana matsekgkanit nema ni katitasiyalh, chu ni anan tuku tsekg wi nema ni katitakatsilh» (Lucas 12:2).

Max lhuwa tiku akxtum tawilakgo Jesús ni anta xwilakgo akxni masiyalh kʼGalilea. Wa xlakata lichuwinampara tuku tlakg xlakaskinka nema xlichuwinanita. Putum kawani: «Ni kakapekuanitit tiku makgnikgo makni pero alistalh nialhla tuku tlawakgo» (Lucas 12:4). Chuna la xtlawanita, kawani xtamakgalhtawakgen pi xlakaskinka nalipawankgo pi Jehová nakakuentajtlawa. Na xlakaskinka pi natatayakgo xKgawasa chixku chu nalipawankgo pi Dios tlan nakamakgtaya (Mateo 10:19, 20, 26-33; 12:31, 32).

Chatum chixku tiku anta xwi lichuwinan tuku xlilakgaputsama: «Makgalhtawakgena, [...] kawani kintala kamapapitsilh tuku kinkamakgxtakgnin» kintlat (Lucas 12:13). Limapakgsin xwan pi xapuxku kgawasa wa tiku xlakgchan pulaktiy herencia, wa xlakata uma chixku ni xlitatakglhuwit xwanit xtala (Deuteronomio 21:17). Pero uma chixku tlakg lhuwa kgalhiputun nixawa tuku lakgchan. Xlakata Jesús lu skgalala, ni makgtanu kʼuma taʼakglhuwit chu wani: «¿Tiku kiliyawalh mijuezkan o xmapapitsina tuku kamakgxtakgnikanitantit?» (Lucas 12:14).

Alistalh kamaxki uma tastakyaw tiku anta wilakgo: «Skgalalh katawilatit chu kalakgmakgantit putum tamakglakgatin [...], xlakata akxni chatum lataman lhuwa tuku kgalhi, tuku kgalhi ni maxki latamat» (Lucas 12:15). Maski lhuwa tuku xkgalhilh chatum lataman, ¿ni xlikana pi akxni naniy nitu katililh? Alistalh, Jesús kamasiyani pi xlakaskinka uma akxni kalitachuwinan akgtum liʼakxilhtit nema lu lakgapaskan chu masiya pi xlakaskinka nakgalhikan xlitlan Dios:

«Xpukuxtu chatum chixku tiku lhuwa tuku xkgalhi, lhuwa makgalanalh. Wa xlakata, tsukulh lakapastaka kxnaku, xwan: “¿Tuku kilitlawat uku, xlakata nialh kkgalhi niku nakmaki kintamakgalan?”. Alistalh xla wa: “Wa uma tuku naktlawa: Nakkalaktilha niku kmaki kintamakgalan chu nakkatlawa nema tlakg laklanka, chu anta nakmaʼakgstokgwili putum kintamakgalan chu putum tuku kkgalhi”. Alistalh na wa: “Lhuwa tuku kkgalhi nema nakiʼakchani akglhuwa kata. Wa xlakata ni naklilakgaputsa, nakwayan, nakkgotnan chu naklipaxuwa”. Pero Dios wanilh: “Xatonto wix, uma katsisni pimpat niya. Wa xlakata, ¿tiku natamakgxtakgni tuku maʼakgstokgwili?”. Chuna akgspula chixku tiku akstu maʼakgstokgwili tuku lhuwa xtapalh, pero kxlakatin Dios nitu kgalhi» (Lucas 12:16-21).

Xtamakgalhtawakgen Jesús chu makgapitsin tiku kgaxmatnimakgo max tlan xtaʼakgskgawikgolh chu xlakpuwankgolh nakgalhikgo lhuwa tumin. Chu tuku xmaklakaskinkgo chali chali na max xtlawalh pi nialh kskujnanikgolh Jehová. Wa xlakata Jesús mastapara uma tastakyaw nema max akgtum kata aitat la xmastanita kTaʼakgchuwin xalak Sipi:

 «Nialh kalilakgaputsatit milatamatkan, xlakata tuku nawayatit o xlakata mimaknikan, tuku nalilhakgananatit. [...] Kalilakpuwantit cuervos: xlakan ni chananankgo chu ni makikgo xtamakgalankan; ni kgalhikgo niku namakikgo xtamakgalankan; pero Dios kamawi. ¿Ni tlakg xtapalh wixin nixawa umakgolh tsiktsi? [...] Kalilakpuwantit chuna la stakkgo xanat: xlakan ni lhuwa skujkgo, ni tlawakgo klhakgatkan; pero kkawaniyan pi nipara Salomón tiku lhuwa tuku xkgalhi lhakganalh chuna la xlakan. [...] Wa xlakata, nialh kalilakgaputsatit tuku nawayatit o tuku nalikgotnanatit. Xlakata putum uma wa tuku lu putsakgo latamanin xalak kakilhtamaku, pero minTlatkan katsi pi wixin maklakaskinatit putum umakgolh. Wata chuntiya kaputsatit xTamapakgsin chu putum uma tuku maklakaskinatit na nakamaxkikanatit» (Lucas 12:22-31; Mateo 6:25-33).

¿Tiku naputsakgo xTamapakgsin Dios? Jesús wan pi wa «ni xalhuwa borregos», kaj ni lhuwa latamanin tiku ni makgxtakgkgo Dios. Chuna la xtitaxtulh kilhtamaku, xʼamaka wankan la xlilhuwa: kaj 144,000. ¿Tuku nakamaxki Dios? Jesús wan: «MinTlatkan xatapaxuwan nakamaxkiyan Tamapakgsin». Xlakan ni wa lilakgaputsakgo namastokgkgo lhuwa tumin unu kKatiyatni, niku kgalhananin tlan kgalhankgo. Wata xlakan lu naliskujkgo xlakata nakgalhikgo «tuku lhuwa xtapalh kʼakgapun nema nikxni sputa», niku natamapakgsinankgo Cristo (Lucas 12:32-34).