Jesús wijku lakatsu kJerusalén akxni makgapitsi judíos lakgtalakatsuwikgo. Makgapitsi katsiputunkgo xpalakata chu amakgapitsi kaj liʼakxilhputunkgo. Chatum tiku lu lakgapasa Limapakgsin, kgalhskin: «Makgalhtawakgena, ¿tuku kilitlawat xlakata nakmakglhtinan latamat nema ni kgalhi xlisputni?» (Lucas 10:25).

Uma chixku kgalhskininan ni xlakata katsiputun xatakgalhtin chu Jesús katsi uma. Wata lakaskin pi Jesús kawa tuku nalisitsikgo judíos. Xlakata Jesús katsi pi uma chixku wi tuku lakpuwan xlakata tuku lichuwinamakgo, tlawani makgapitsi takgalhskinin nema nalimasiya tuku lakpuwan.

«¿Tuku tatsokgnit kLimapakgsin? ¿Tuku akgatekgsa?». Uma chixku likgalhtawakganit xLimapakgsin Dios chu kikilhtiya tuku wan Deuteronomio 6:5 chu Levítico 19:18 akxni wan: «“Milipaxkit Jehová miDios xliputum minaku chu xliputum milatamat chu xliputum militliwakga chu xliputum mintalakapastakni” chu “milipaxkit atanu lataman chuna la miʼakstu paxkikana”» (Lucas 10:26, 27). ¿Tlan uma takgalhtin?

Jesús wani: «Lu tlan kgalhtinanti; chuntiya katlawa uma chu nakgalhiya latamat». Pero uma ni anta tamakgxtakga. Chixku ni kajwatiya uma takgalhtin kgalhkgalhima. Limasiyaputun pi xla xaʼakgstitum, lakaskin pi Jesús kawanilh pi tlan la lakapastaknan chu tlan la kalikatsini amakgapitsin. Wa xlakata kgalhskin: «¿Tiku atanu latamanin kilipaxkit?» (Lucas 10:28, 29). Tasiya pi uma takgalhskinin ni tuwa, pero ni chuna. ¿Tuku xlakata?

Judíos lakpuwankgo pi xlipaxkitkan kajwatiya tiku kgalhikgo xtalismaninkan, chu max tasiya pi Levítico 19:18 tataya uma talakapastakni. Asta makgapitsin tlan xwankgolh pi komo xkatalalinkgolh tiku ni xtachikikan lakatsalamakgolh Limapakgsin (Hechos 10:28). Wa xlakata, uma chixku lakpuwan pi akgstitum litaxtu akxni tlan kalikatsini amakgapitsi judíos, chu max makgapitsi xtamakgalhtawakgen Jesús nachuna lakpuwankgo la uma chixku. Pero judíos lakpuwankgo pi nitu wamputun komo nitlan nakalikatsinikgo tiku ni judío xlakata lakpuwankgo pi ni xlipaxkitkan.

¿La tlan nalakgpali Jesús xtapuwan uma chixku pero ni namakgasitsi chu na ni nakamakgasitsi amakgapitsi judíos? Maklakaskin akgtum liʼakxilhtit: «Chatum chixku xtaktamachi, mincha kJerusalén chu xʼama kJericó, chu chipakgolh kgalhananin, xlakan mapuxtukgolh klhakgat, kgaxikgolh chu atsinu ni xmakgnikgo akxni ankgolh. Chu na antiya kʼama tiji, xtaktamachi chatum sacerdote, pero akxni akxilhli, sacerdote akglhkgamakgalh. Nachuna, chatum levita, akxni chalh anta chu akxilhli, akglhkgamakgalh. Pero chatum chixku xalak Samaria tiku xmima ktiji, chilh niku xma, chu akxni akxilhli lakgalhamalh» (Lucas 10:30-33).

Chixku tiku tachuwinama Jesús katsi pi lhuwa sacerdotes chu levitas tiku ankgo skujkgo ktemplo lamakgo kJericó. Xlakata naʼankgo kxchikkan, xlitlawanatkan 23 kilómetros xlimakgat. Uma tiji kalipekua xlakata lhuwa taxtukgo kgalhananin. Komo chatum sacerdote o levita xʼakxilhli achatum judío pi tuwa tuku titaxtuma, ¿ni xlikana pi xlimakgtayat? Pero kxliʼakxilhtit Jesús, nipara chatum chuna tlawa. Chatum samaritano wa tiku makgtaya, chatum chixku tiku minacha kʼakgtum kachikin nema judíos lakgmakgankgo (Juan 8:48).

¿La makgtayalh samaritano judío nema xkgaxikanit? Jesús wampara: «Talakatsuwinilh chu limakgchilh laktitsu lhakgat anta niku xkgaxikanit, chu mawakanilh aceite chu vino. Alistalh mawakalh kxburro chu lilh kʼakgtum aktsu hotel chu kuentajtlawalh. Lichali maxkilh okgxtiy denarios xkuentajtlawana aktsu hotel chu wanilh: “Kakuentajtlawa, chu akxni naktaspita akit nakxokgoniyan tuku natilaktlawaya”» (Lucas 10:34, 35).

Akxni Jesús, xaTlan Makgalhtawakgena, xlitachuwinanita uma liʼakxilhtit, tlawani takgalhskinin  xlakata namalakpuwani: «¿Tiku lata xlikgalhtutu lakpuwana wix pi paxkilh chixku tiku makgkgalhananka?». Tasiya pi chixku tuwa makgkatsi nawan pi wa samaritano, wa xlakata kgalhtinan: «Wa tiku limasiyanilh pi xlakgalhaman». Jesús wani tuku xmasiyaniputun akxni litachuwinalh uma liʼakxilhtit: «Kapit chu nachuna katlawa» (Lucas 10:36, 37).

¡Lu tlan la masiya! Komo Jesús kajwatiya xwanilh uma chixku pi xlipaxkit latamanin xalak atanu kachikin, ¿xlakgatikgolh uma takgalhtin xla chu amakgapitsi judíos tiku xkgaxmatmakgo? Max ni. Pero akxni lichuwinalh uma ni xatuwa liʼakxilhtit chu maklakaskilh tuku xlakan xlakgapaskgo, liwana takgalhtilh uma takgalhskinin: «¿Tiku atanu lataman kilipaxkit?». Lataman tiku paxkinan, wa tiku tlan kalikatsini amakgapitsin chuna la wan Biblia.