Akxni Jesús titaxtuma kPerea xlakata nachan kJerusalén, chatum kgawasa talakatsuwini chu lakgtatsokgosta. «Uma chixku xmakgpulalinan ksinagoga», max wa xpuxku sinagoga o tapakgsi kSanedrín. Chu wani: «Makgalhtawakgena tiku tlan likatsi, ¿tuku kilitlawat xlakata tlan nakmakglhtinan latamat nema ni kgalhi xlisputni?» (Lucas 8:41; 18:18; 24:20).

Jesús kgalhti: «¿Tuku xlakata kilimapakuwiya Makgalhtawakgena tiku tlan likatsi? Ni anan tiku tlan likatsi, kajwatiya Dios tlan likatsi» (Lucas 18:19). Max uma kgawasa wan «Makgalhtawakgena tiku tlan likatsi» xlakata nalimasiya tuku litaxtu, chu wa uma tuku tlawakgo makgalhtawakgenanin. Pero maski lu tlan masiya, Jesús liwana wani uma chixku pi kajwatiya Dios lakgchan nalimapakuwikan «tiku tlan likatsi».

Jesús stakyawa: «Pero komo makglhtinamputuna latamat nema ni kgalhi xlisputni, chuntiya kamakgantaxti tuku wan limapakgsin». Kgawasa kgalhskin: «¿Tuku limapakgsin?». Jesús likgalhti pulakkitsis tuku min kʼAkgkaw Limapakgsin: ni namakgninana, ni naʼakgskgawiya tiku tamakgaxtokga, ni nakgalhanana, ni naʼakgsaninana chu namaxkiya kakni minatlatni. Alistalh wani limapakgsin nema tlakg xlakaskinka: «Milipaxkit mintalataman chuna la miʼakstu paxkikana» (Mateo 19:17-19).

Kgawasa wani: «Putum umakgolh kmakgantaxtinit; ¿tuku kintsankganimajku?» (Mateo 19:20). Max lakpuwan pi wi tuku atanu tlan xtlawalh, max tuku kaks malakawaninan, xlakata namakglhtinan latamat nema ni kgalhi xlisputni. Jesús akxilha pi xlikana tuku wan chu lakgalhaman (Marcos 10:21). Pero wi tuku ni maxki talakaskin namakglhtinan uma latamat.

Chixku lu paxki tuku kgalhi. Wa xlakata Jesús wani: «Wi tuku tsankganiman: kapit chu kastat tuku kgalhiya chu kakamaxki xatumin limaxkgenin, chu nakgalhiya tuku lhuwa xtapalh kʼakgapun, chu katat, kakistalani». Kgawasa tlan xkamaxkilh xtumin lakglimaxkgenin tiku nila xmaspitnikgolh chu kstalanina Jesús xlitaxtulh. Pero nichuna tlawa. Taya chu xatalipuwan  an, chu Jesús max na xatalipuwan kaks akxilha. Uma chixku lu paxki tuku lhuwa xtapalh kgalhi, chu uma ni maxki talakaskin naʼakxilha niku wi tuku xlikana xtapalh (Marcos 10:21, 22). Xaʼawatiya, Jesús wan: «¡Lu tuwa nakakitaxtuni tiku kgalhikgo lhuwa tumin natanukgo kxTamapakgsin Dios!» (Lucas 18:24).

Xtamakgalhtawakgen Jesús kaks lilakawankgo uma tachuwin chu tuku Jesús wa alistalh: «Tlakg ni tuwa nawan pi tantum camello natanu kxʼakgxakga litsapan, nixawa tiku kgalhi lhuwa tumin natanu kxTamapakgsin Dios». Akxni kgaxmatkgo uma, xtamakgalhtawakgen kgalhskinkgo: «¿Tiku xlikana tlan nalakgtaxtu?». Xtamakgalhtawakgen Jesús lakpuwankgo pi tuwa kitaxtu pi chatum lataman nalakgtaxtu. Jesús kalakaʼakxilha chu kakgalhti: «Tuku latamanin nila makgantaxtikgo, Dios tlan makgantaxti» (Lucas 18:25-27).

Pedro wan pi xlakan ni tlawakgonit la uma kgawasa tiku kgalhi lhuwa tumin: «¡Kaʼakxilhti! Akinin putum kmakgxtakgnitaw tuku xakkgalhiyaw chu kkastalaninitan; wa xlakata, ¿tuku nakmakglhtinanaw?». Jesús kawani tuku nakitaxtu xlakata tlan tuku laksakkgolh: «Akxni putum namasastiparakan, akxni xKgawasa chixku natawila kxpumapakgsin nema kgalhi lhuwa kakni, wixin natawilayatit kʼakgkutiy laktawilh chu nakalakputsananiyatit akgkutiy laklanka xfamiliajkan Israel, xlakata kistalanitit» (Mateo 19:27, 28).

Jesús lichuwinama tuku aku nala, akxni putum namasastikan chu latamat kKatiyatni xtachuna nawan la kjardín xaʼEdén. Pedro chu amakgapitsi tamakgalhtawakgen natamapakgsinankgo Jesús akxni Katiyatni akgtum paraíso nawan. Uma tatlaja tlakg tlan nixawa tuku makgxtakgkgonit.

Pero ni putum tatlaja aku ama makglhtinankgo. Xtamakgalhtawakgen makglhtinankgonita makgapitsi, chuna la Jesús aku kawani: «Ni anan tiku makgxtakgnit chiki, o xpuskat o xnatalan lakgkgawasan, o xnatlatni, o xkamanan kaj xpalakata xTamapakgsin Dios, komo ni tlakg lhuwa tuku namakglhtinan kʼuma kakilhtamaku chu kkakilhtamaku nema aku mima latamat nema ni kgalhi xlisputni» (Lucas 18:29, 30).

Kaxanikawa niku naʼankgo, xtamakgalhtawakgen Jesús tlan nakatalalinkgo xnatalankan tiku watiya takanajla kgalhikgo chu tlakg tlan nakatalalinkgo nixawa xfamiliajkan. Lu nitlan, pero uma kgawasa tiku kgalhi lhuwa tumin ni kajwatiya nila katikatalalilh xtamakgalhtawakgen Cristo, na nila katimakglhtinalh latamat kxTamapakgsin Dios kʼakgapun.

Jesús wampara: «Pero lhuwa tiku xapulana, xaʼawatiya nawankgo, chu tiku xaʼawatiya, xapulana nawankgo» (Mateo 19:30). ¿Tuku wamputun uma?

Kgawasa tiku kgalhi lhuwa tumin makgtanuma «tiku xapulana» xlakata xla na xpulalina judíos litaxtu. Xlakata kgalhakgaxmata xlimapakgsin Dios, xatlan kstalanina Jesús xlitaxtulh, chu lhuwa tuku tlan xtlawalh. Pero tlakg xlakaskinka akxilha tuku lhuwa xtapalh chu tuku kgalhi. Pero latamanin tiku nitu kgalhikgo akxilhkgo pi xtamasiy Jesús xaxlikana chu linan klatamat. Tlan nawanaw pi «xaʼawatiya» xlitaxtukgo pero la uku «xapulana» nalitaxtukgo xlakata tlan nakgalhikgo takgalhkgalhin pi natatawilakgo Jesús kTamapakgsin anta kʼakgapun chu namapakgsinankgo kKatiyatni nema akgtum paraíso nawan.