Jesús chu tiku kataʼan chankgo anta kJericó, nema max akgtum kilhtamaku lichankan lata Jerusalén. Jericó akgtiy tapitsi: xamakgan chu xasasti kachikin, nema wi max akgtiy kilómetro xlimakgat chu tlawaka xkilhtamaku romanos. Akxni Jesús chu lhuwa latamanin nema stalanikgo titaxtukgo kkachikin, chatiy lakgaxokgo nema skiwayankgo kgaxmatkgo tuku lama. Chatum wanikan Bartimeo.

Akxni Bartimeo chu tiku anta xtawi katsikgo pi Jesús titaxtuma anta, pixlanka tsukukgo wankgo: «¡Malana, kakilalakgalhamaw, xKgawasa David!» (Mateo 20:30). Makgapitsin kakilhnikgo chu kawanikgo pi katakilhkakskgolh, pero xlakan tlakg pixlanka tasanikgo. Akxni Jesús kakgaxmatni, xla tachokgo chu kawani xtamakgalhtawakgen pi katasanikgolh umakgolh chatiy lakchixkuwin tiku pixlanka wankgo. Xtamakgalhtawakgen Jesús talakatsuwinikgo chu wanikgo chatum: «¡Ni kapekuanti! Kataya; tasaniman» (Marcos 10:49). Lakgaxokgo, lu paxuwa, lakapala maktakta klhakgat, taya chu lakgan Jesús.

Jesús kakgalhskin: «¿Tuku lakaskinatit naktlawa mimpalakatakan?». Xlakan tasaskinikgo: «Malana, katlawa pi naklakawananaw» (Mateo 20:32, 33). Jesús kalakgalhaman, kaxamani xlakgastapukan chu wani chatum: «Kapit, mintakanajla mapaksanitan» (Marcos 10:52). Uma kilhtamaku, lakgaxokgo lakawanankgo chu tsukukgo malankikgo Dios. Akxni latamanin akxilhkgo uma, na tsukukgo malankikgo Jehová chu chatiy lakchixkuwin tsukukgo stalanikgo Jesús.

Akxni Jesús titaxtuma kJericó, lhuwa latamanin stalanikgo. Putum akxilhputunkgo tiku kamapaksanit lakgaxokgo. Pero xlakata latamanin listilikgo Jesús, makgapitsi nila akxilhkgo. Wa uma tuku akgspula Zaqueo, xpuxkukan xmatajinanin lilakgaxokgon xalak Jericó chu kachikinin nema lakatsu wilakgo. Xlakata aktsu, nila akxilha tuku lama, wa xlakata, lakapala an chu tawaka kʼakgtum kiwi xla sicómoro o higuera moral nema ya niku natitaxtu Jesús. Lata anta, tlan putum akxilha. Akxni Jesús talakatsuwi chu akxilha pi Zaqueo waka kkiwi, wani: «Zaqueo, lakapala katakta, xlakata uku kilitamakgxtakgat kminchik» (Lucas 19:5). Zaqueo takta chu lakapala an kxchik xlakata tlan namakgamakglhtinan Jesús.

Akxni latamanin akxilhkgo tuku lama, nitlan tuku tsukukgo wankgo. Nitlan akxilhkgo pi Jesús naʼan kxchik tiku liʼakxilhkgo la chatum makglakgalhina. Zaqueo lhuwa tumin kgalhi xlakata tlakg lhuwa kamataji latamanin nixawa la xlilat.

Akxni latamanin akxilhkgo pi Jesús tanu kxchik Zaqueo, xlakan wankgo: «Tamakgxtakgli kxchik chatum makglakgalhina chixku». Pero Jesús lipawan pi Zaqueo tlan namakgxtakga tuku nitlan tlawama chu wa uma tuku lay. Zaqueo taya chu  wan: «¡Kaʼakxilhti! Lata putum tuku kkgalhi Malana, itat nakkamaxki lakglimaxkgenin chu putum tuku kkaʼakgskgawimakglhtilh latamanin, makgtati nakkalakgxokgoni» (Lucas 19:7, 8).

Uma liwana masiya pi Zaqueo nitlan limakgkatsi tuku tlawa. Max xlakata tuku tsokgwilinit tlan katsi la xlilhuwa kamatajinit judíos chu malaknu pi makgtati nakamaspitni tuku kamakglhtinit. Uma tlakg liwaka nixawa tuku skin Limapakgsin (Éxodo 22:1; Levítico 6:2-5). Chu ni kajwatiya uma. Zaqueo malaknu pi tuku kgalhi itat nakamaxki limaxkgenin.

Jesús lipaxuwa pi Zaqueo limasiya pi nitlan limakgkatsi tuku nitlan tlawanit chu wani: «Uma kilhtamaku Dios lakgmaxtunit uma chixku chu xfamilia, xlakata na xkgawasa Abrahán litaxtu. Xlakata xKgawasa chixku milh putsa chu milh lakgmaxtu tuku xtsankganit» (Lucas 19:9, 10).

Nina makgas titaxtunit la Jesús lichuwinalh kgawasa tiku xtsankganit xlakata nalimasiya la wilakgo tiku tamakgatlinikgonit Jehová (Lucas 15:11-24). La uku, lichuwinan pi uma akgtum liʼakxilhtit xlakata tiku xlikana xtsankganit pero tekgskanita. Maski xpulalinanin takanajla chu tiku stalanikgo nitlan lichuwinankgo Jesús xlakata kamakgtaya latamanin la Zaqueo, Jesús chuntiya kaputsama xkamanan Abrahán tiku tsankgakgonit xlakata nialh natlawakgo tuku nitlan tlawamakgo.