Jesús chu xtamakgalhtawakgen taxtukgo kʼGalilea, patakutkgo kgalhtuchokgo Jordán chu titaxtukgo kPerea xlakata naʼankgo ksur. Akxni xaʼawatiya kilalh kPerea, Jesús kawanilh fariseos tuku lakpuwan Dios xlakata lakxtlawakan tamakgaxtokgat (Lucas 16:18). Pero tlawaparakgo uma takgalhskinin xlakata naliʼakxilhkgo Jesús.

Moisés tsokgli pi chatum chixku tlan xmakgxtakgli xpuskat komo wi «tuku xalixkajni» xtlawanit (Deuteronomio 24:1). Pero tanu tanu tuku lakpuwankan pi tlan nalilakxtlawakan tamakgaxtokgat. Makgapitsi asta lakpuwankgo pi tlan nalilakxtlawakgo tuku ni xlakaskinka. Wa xlakata fariseos kgalhskinkgo: «¿Xlilat kaj katuwa nalilakxtlawa xtamakgaxtokgat chatum chixku?» (Mateo 19:3).

Jesús ni kawani xtapuwankan latamanin, wata kalikgalhti tuku kaks kamalakawani. Kawani tuku xlakpuwanit Dios akxni malakatsukilh tamakgaxtokgat: «¿Ni likgalhtawakganitantit niku wan pi tiku kamalakatsukilh tlawalh xachixku chu xapuskat chu wa: “Wa xlakata chixku namakgxtakga xtlat chu xtse chu akxtum natatawila xpuskat, chu xchatiykan akgtum makni nalitaxtukgo”? Wa xlakata nialh chatiy, wata akgtum makni. Wa xlakata tuku Dios makxtum tlawalh, ni kamapapitsilh chixku» (Mateo 19:4-6). Akxni Dios kamamakgaxtokgli Adán chu Eva, liwana masiyalh pi niti xlilakxtlawat uma.

Pero fariseos ni lakgatikgo uma takgalhtin chu kgalhskinkgo: «Pero ¿tuku xlakata Moisés limapakgsinalh pi xtlawaka kapsnat niku xwa tuku xlakata lakxtlawama xtamakgaxtokgat chu xmaxkilh xpuskat?» (Mateo 19:7). Jesús kakgalhti: «Xlakata wixin lu palha minakujkan, Moisés kamaxkin talakaskin tlan nalakxtlawayatit mintamakgaxtokgatkan. Pero Dios nichuna kalimalakatsukilh xapulana chixku chu xapulana puskat» (Mateo 19:8). Tachuwin «nichuna kalimalakatsukilh» ni xkilhchanima xkilhtamaku Moisés, wata xkilhchanima akxni Dios malakatsukilh tamakgaxtokgat kʼEdén.

Alistalh Jesús kawani tuku lu xlakaskinka: «Akit kkawaniyan pi komo chatum chixku lakxtlawa xtamakgaxtokgat, pero xpuskat nitu tlawanit talakgxtumit nema ni xlitatlawat [kxagriego pornéia], chu natatamakgaxtokga atanu, akgskgawima tiku tamakgaxtokga» (Mateo 19:9). Wa xlakata, kajwatiya talakgxtumit nema ni xlitatlawat tlan nalakxtlawa tamakgaxtokgat.

Akxni xtamakgalhtawakgen kgaxmatkgo uma, wankgo: «Komo chuna kakitaxtuni chixku chu xpuskat, tlakg tlan ni natamakgaxtokgkan» (Mateo 19:10). Xlikana, komo wi tiku lakpuwama natamakgaxtokga, xlilakpuwanat pi tamakgaxtokgat xlimakgapalat putum kilhtamaku.

Alistalh, Jesús kalichuwinan tiku ni tamakgaxtokgkgonit chu wan pi makgapitsi eunucos chuna lakachinkgo, uma wamputun pi nila talakgxtumikgo. Amakgapitsi, eunucos katlawakan chu nialhla talakgxtumikgo. Chu makgapitsi machokgokgo tuku makgkatsikgo maski talakgxtumiputunkgo xlakata tlakg naskujnanikgo Dios. Akxni kawanikgonita uma, wan: «Tiku tlan matlani [ni natamakgaxtokga], chuna katlawalh» (Mateo 19:12).

Ama kilhtamaku latamanin linkgo xkamanankan niku wi Jesús. Pero xtamakgalhtawakgen kakilhnikgo, max xlakata ni lakaskinkgo pi kamaʼakglhuwika. Pero akxni Jesús akxilha, sitsi chu kawani: «Kakamaxkitit talakaskin laktsu kamanan kakilakgminkgolh, ni kakamachokgotit, xlakata Tamapakgsin xalak akgapun nakalakgchan tiku likatsikgo chuna la umakgolh laktsu kamanan. Xlikana kkawaniyan, pi komo wi tiku ni namakgamakglhtinan xTamapakgsin Dios xtachuna la laktsu kamanan, nikxni katitanulh» (Marcos 10:14, 15; Lucas 18:15).

 ¡Lu tlan tuku kinkamasiyaniyan! Xlakata namakgamakglhtinanaw tasikulunalin nema nalimin xTamapakgsin Dios, kilitaktujutkan chu kilimastatkan talakaskin nakinkamasiyanikanan la laktsu kamanan. Jesús kachaxa laktsu kamanan chu kasikulunatlawa, chu chuna limasiya pi kapaxki. Jesús kapaxki putum tiku likatsikgo la laktsu kamanan chu makgamakglhtinankgo xTamapakgsin Dios (Lucas 18:17).