Jesús wijku kPerea, aku lichuwinanit pi «lhuwa tiku xapulana, xaʼawatiya nawankgo, chu tiku xaʼawatiya, xapulana nawankgo» (Mateo 19:30). Xlakata tlakg nalichuwinan uma, kalichuwinan tiku skujkgo niku chankanit uva.

«Tamapakgsin xalak akgapun xtachuna chatum xmalana chiki, tiku lu tsisa taxtulh xlakata nakaputsa tasakua tiku kskujkgolh niku xchanit xʼuvas. Akxni xkawaninita xtasakua pi komo tantaku kskujkgolh xʼama kaxokgoni okgxtum denario, kamalakgachalh niku xchanit xʼuvas. Akxni taxtupa max kamakgnajatsa hora tsisa, kaʼakxilhpa anta kplaza niku stanankan amakgapitsi tiku nitu xkgalhikgo xtaskujutkan; chu kawanilh: “Wixin na kapitit niku kchanit uvas chu nakkaxokgoniyan chuna la xlilat”. Wa xlakata xlakan na ankgolh. Amakgtum taxtupa max tastunut, chu max kamakgtutu hora kakgotanun, chu chuna tlawapa. Xaʼawatiya, taxtulh max kamakgkitsis hora kakgotanun chu katekgsli amakgapitsi tiku na anta xyakgolh, chu kawanilh: “¿Tuku xlakata tantaku unu yatit chu nitu skujpatit?”. Xlakan kgalhtinankgolh: “Xlakata niti kinkasakuanitan”. Xla kawanilh: “Wixin na kapitit niku kchanit uvas”» (Mateo 20:1-7).

Akxni kgaxmatkgo tachuwin «Tamapakgsin xalak akgapun» chu «xmalana chiki», max lilakpuwankgo Jehová. Tatsokgni lichuwinankan Jehová la xmalana niku chankanit uva nema kilhchanima kachikin Israel (Salmo 80:8, 9; Isaías 5:3, 4). Tiku tapakgsinikgo talakkaxlan xla Limapakgsin xtachuna tiku skujkgo niku chankanit uva. Pero Jesús ni lichuwinama tuku lanita, wata lichuwinama tuku lama akxni tlawama xtaskujut kKatiyatni.

Tlan nawanaw pi xpulalinanin takanajla skujnanikgo Dios putum kilhtamaku, uma na kakilhchanima fariseos tiku nina makgas putsananikgolh Jesús akxni kgalhskinkgolh komo tlan lakxtlawakan tamakgaxtokgat. Xlakan xtachuna skujnin tiku tantaku skujkgo niku chankanit uva chu kgalhkgalhikgo nakamaxkikan okgxtum denario, tuku kaxokgonikan tiku tantaku skujkgo.

Sacerdotes chu xpulalinanin takanajla lakpuwankgo pi amakgapitsi judíos ni lhuwa skujnikgo Dios la xlakan, xtachuna la kaj itat kilhtamaku kskujkgolh niku chankanit uva. Wa uma skujnin tiku kalichuwinankan pi kasakuakan «kamakgnajatsa hora tsisa» o tlakg kakgotanun: «max tastunut», «max kamakgtutu hora kakgotanun», chu xaʼawatiya «kamakgkitsis hora kakgotanun».

Lakchixkuwin chu lakpuskatin tiku stalanikgo Jesús kalilakgapaskan la tiku «Dios nitlan kaʼakxilha» (Juan 7:49). Maklakaskinkgonit xlatamatkan xlakata naskitinankgo o natlawakgo atanu taskujut. Pero max octubre kkata 29, «xmalana niku xchankanit uvas» malakgachalh Jesús xlakata xkatasanilh tiku taktujukgo xlakata kskujnikgolh Dios chu xtamakgalhtawakgen Cristo xlitaxtukgolh. Wa xaʼawatiya skujni tiku kasakuakan «kamakgkitsis hora kakgotanun».

Jesús wan tuku lay ksputat uma kilhtamaku: «Akxni xtsiswamaja, xmalana niku xchankanit uvas wanilh tiku xlakgayawanit xtaskujut: “Kakatasani skujnin chu kakamaskgawi, kalimatsuki xaʼawatiya chu kalimasputu xapulana skujni”. Akxni minkgolh lakchixkuwin tiku kskujkgonit lata kamakgkitsis hora kakgotanun, xchatunukan makgamakglhtinankgolh okgxtum denario. Wa xlakata akxni minkgolh tiku tantaku kskujkgonit, lakpuwankgolh pi tlakg lhuwa xʼamaka kamaskgawikan, pero xlakan na kamaskgawika okgxtum denario. Akxni makglhtinankgolh, tsukukgolh nitlan lichuwinankgo xmalana chiki chu wanikgolh: “¡Umakgolh xaʼawatiya skujnin kaj akgtum hora skujkgolh; pero nachuna kalikatsini la akinin tiku palha kskujwi tantaku kkachichini!”. Pero xla kgalhtilh chatum tiku chuna xwanima: “Amigo, ni ktlawaniman tuku nitlan. ¿Ni xlakkaxlanitaw  pi xakaman maskgawiyan okgxtum denario? Katiya tuku lakgchanan chu kapit. Na kmaskgawiputun uma tiku awatiya milh chuna la kmaskgawin. ¿Ni xlilat nakmaklakaskin tuku kkgalhi chuna la klakaskin? ¿O lakgkatsaninan milakgastapu kaj xlakata akit tlan klikatsi?”. Wa xlakata, tiku xaʼawatiya, xapulana nawankgo, chu tiku xapulana, xaʼawatiya nawankgo» (Mateo 20:8-16).

Max xtamakgalhtawakgen Jesús akstu kakgalhskinkan tuku wamputun tuku xaʼawatiya kalitachuwinankan. ¿Tuku kilhchanima pi xpulalinanin takanajla «xaʼawatiya» nalitaxtukgo maski lakpuwankgo pi xlakan «xapulana»? ¿Chu tuku xlakata xtamakgalhtawakgen Jesús wa tiku «xapulana» nalitaxtukgo?

Xtamakgalhtawakgen Jesús, nema xpulalinanin takanajla lakpuwankgo pi «xaʼawatiya» litaxtukgo, wa tiku «xapulana» namakglhtinankgo xtatlajakan. Akxni Jesús nani, Dios nalakgmakgan kachikin Israel chu nalaksaka xasasti xkachikin, «xʼIsrael Dios» (Gálatas 6:16; Mateo 23:38). Juan Mununa lichuwinalh tiku xʼamakgo makgtapakgsikgo uma kachikin akxni wa pi kilhtamaku nema aku mima xʼamaka limununankan espíritu santo. Tiku «xaʼawatiya» litaxtukgo wa xapulana nakalimunukan espíritu santo chu nakgalhikgo talakgalhaman pi xtatayananin Jesús nawankgo «kxlikalanka katiyatni» (Hechos 1:5, 8; Mateo 3:11). Maski xtamakgalhtawakgen ni liwana akgatekgskgo talakgpalit nema kalitachuwinama Jesús, max akxilhkgo pi xpulalinanin takanajla amakgo kaputsastalanikgo xlakata «xaʼawatiya» amakgo litaxtukgo.