Maski Jesús amputun kJerusalén, max antiyaku katawi kstalaninanin kxchik Zaqueo. Xlakan kanajlakgo pi Jesús nialh makgas natsuku mapakgsinan “kxTamapakgsin Dios” (Lucas 19:11). Xlakata ni akgatekgskgo uma chu na ni akgatekgskgo pi Jesús xlinit, xla lichuwinan akgtum liʼakxilhtit xlakata nakamaʼakgatekgsni pi lhuwaku tsankga xlakata nachin Tamapakgsin.

Kawani: «Chatum xkgawasa mapakgsina alh kʼakgtum makgat kachikin xlakata namakglhtinan limapakgsin chu alistalh xʼama taspita» (Lucas 19:12). Ankan niku makgat lhuwa kilhtamaku lin. Liwana tasiya pi Jesús wa «xkgawasa mapakgsina» nema an «kʼakgtum makgat kachikin», uma wamputun kʼakgapun, niku xTlat, Mapakgsina nalimaxtu.

Kliʼakxilhtit, akxni nina an “kgawasa mapakgsina” katasani kgalhakaw skujnin chu chatunu kamaxki akgtum mina xaplata. Chu kawani: «Kaliskujtit uma tumin asta akxni nakmin» (Lucas 19:13). Akgtum mina xaplata, lhuwa tumin, xlakata wa xtaskgaw chanana tiku liwaka akgtutu papaʼ skujnit.

Max xtamakgalhtawakgen akgatekgskgo pi xlakan xtachuna kgalhakaw skujnin, xlakata xapulana Jesús katamalakxtumilh la tiku makikgo tachanan (Mateo 9:35-38). Jesús ni kawani pi kamakikgolh tachanan xla akgtum talhtsi. Wata lakaskin pi kakamakgtayakgolh latamanin kstalaninanin Cristo nalitaxtukgo xlakata namakgtapakgsikgo kxTamapakgsin Dios. Wa xlakata, xtamakgalhtawakgen maklakaskinkgo xkilhtamakujkan, xlitliwakgakan chu tuku kgalhikgo.

¿Tuku atanu masiyapara Jesús kʼuma liʼakxilhtit? Kawani pi latamanin xalak país ni xʼakxilhputunkgo xkgawasa mapakgsina «chu malakgachakgolh makatsininanin anta niku alh xkgawasa mapakgsina xlakata nawankgo: “Ni klakaskinaw pi uma chixku kimapakgsinakan nawan”» (Lucas 19:14). Xtamakgalhtawakgen Jesús katsikgo pi judíos ni akxilhputunkgo Jesús chu pi makgapitsi asta makgniputunkgo. Akxni Jesús naniy chu nataspita kʼakgapun, lhuwa judíos nakaputsastalanikgo xtamakgalhtawakgen, chu chuna nalimasiyakgo tuku lakpuwankgo xpalakata. Umakgolh xtalamakgasitsin Jesús liwana nalimasiyakgo pi ni liʼakxilhkgo la xMapakgsinakan (Juan 19:15, 16; Hechos 4:13-18; 5:40).

¿La maklakaskinkgo minas uma kgalhakaw skujnin asta akxni uma kgawasa mapakgsina limaxtukan chu taspita? Jesús wan: «Titaxtulh kilhtamaku, xla taspitli akxni mapakgsina xlitaxtuya chu kamatasaninalh xlakskujnin tiku xkamaxkinit xtumin, xlakata nakatsi tuku xlitlajakgonit xtaskujutkan. Wa xlakata xapulana talakatsuwilh chu wa: “Malana, mintumin makgkaw talhuwilh”. Xla wanilh: “¡Lu tlan tlawa, xatlan skujni! Xlakata limasiya pi tlan lipawankana maski kaj tuku ni lhuwa, kakamapakgsi akgkaw kachikinin”. Alistalh milh xlichatiy chu wa: “Malana, mintumin makgkitsis talhuwilh”. Chu uma na wanilh: “Nachuna wix, kakamapakgsi akgkitsis kachikinin”» (Lucas 19:15-19).

Komo xtamakgalhtawakgen akxilhkgo pi xlakan xtachuna la skujnin tiku maklakaskinkgo tuku kgalhikgo xlakata nakamakgtayakgo latamanin kstalaninanin Cristo nalitaxtukgo, tlan nalipawankgo pi Jesús nalipaxuwa tuku tlawakgo chu nakamaxki xtatlajakan. Xlikana pi ni putum tlan watiya tuku tlawakgo chu ni lakxtum wi xlatamatkan. Pero komo nakamakgtayakgo latamanin kstalaninanin Cristo nalitaxtukgo, Jesús, tiku «namakglhtinan limapakgsin», nalakapastaka tuku natlawakgo chu nakasikulunatlawa (Mateo 28:19, 20).

Kaʼakxilhwi tuku litalakgpali tuku xaʼawatiya lichuwinan Jesús: «Pero milh achatum, chu wanilh:  “Malana, uwi mintumin nema xaklimakgchinit lhakgat chu xakmatsekgnit. Kaʼakxilhti, akit kpekuaniyan, xlakata wix chixku tiku lhuwa tuku skin; maxtuya tumin niku ni makgmakinanita chu makiya tamakgalan niku ni chanananita”. Mapakgsina wanilh: “Wa tuku wanti naklimalakgaxokgeyan, xalixkajni skujni. ¿Xkatsiyata pi akit lhuwa tuku kskin, pi ktiya tumin niku ni kmakgmakinit chu kmaki tamakgalan niku ni kchanananit? Komo chuna, ¿tuku xlakata ni wili kintumin kbanco? Akxni xakmilh, xaktitamakglhtinalh xaskgata”. Wa xlakata, kawanilh tiku anta xyakgolh: “Kamakglhtitit tumin chu kamaxkitit tiku makgkaw malhuwilh tumin”» (Lucas 19:20-24).

Uma skujni makgatsankga xmina xlakata ni liskuja namatlaji xmalana. Apóstoles lakaskinkgo pi Jesús Mapakgsina kalitaxtulh kxTamapakgsin Dios. Wa xlakata, akxni kgaxmatkgo xlakata uma xaʼawatiya skujni, max akgatekgskgo pi komo ni palha naskujkgo, ni katimakgtapakgsikgolh kxTamapakgsin Dios.

Xlikana pi tuku wan Jesús max kamaʼakgpuwantini xtamakgalhtawakgen tlakg naskujkgo. Wa xlakata kawani: «Putum tiku kgalhi, tlakg namaxkikan, pero tiku nitu kgalhi, asta tuku kgalhi namakglhtikan». Alistalh wampara pi xtalatlawananin, tiku ni lakaskinkgo pi wa «kakamapakgsilh», nakamasputukan. Alistalh Jesús an kJerusalén (Lucas 19:26-28).