Jesús aku masiyakgonita tuku lu xlakaskinka akxni xwi kxchik chatum xpulalinakan fariseos. La uku an kJerusalén chu lhuwa latamanin stalanikgo. ¿Tuku xlakata? ¿Xlikana stalaniputunkgo maski kaxatukawa tuku nakalakgmin?

Ktiji, Jesús kawani tuku kaks kamalakawani makgapitsin: «Komo wi tiku kilakgmin pero tlakg paxki xtlat chu xtse chu xpuskat chu xkamanan chu xnatalan lakgkgawasan chu xnatalan laktsumajan, chuna, chu asta xlatamat, nila kistalanina nawan» (Lucas 14:26). ¿Tuku wamputun uma?

Ni wamputun pi kstalaninanin nialh nakaʼakxilhputunkgo xfamiliajkan. Wata wamputun pi tlakg xlipaxkitkan Jesús nixawa xfamiliajkan. Ni xlitlawatkan la chixku tiku lichuwinalh Jesús nema lakgmakgalh lu xlakaskinka invitación xlakata aku xtamakgaxtokgnit (Lucas 14:20). Biblia wan pi Jacob ni xʼakxilhputun Lea chu tlakg xpaxki Raquel. Uma wamputun pi ni lu xpaxki Lea (Génesis 29:31).

Jesús na lichuwinan pi tiku xaxlikana xtamakgalhtawakgen xlilakgmakgat «asta xlatamat», uma wamputun pi tlakg xlipaxkit Jesús nixawa xlatamat. Asta komo natalakaskin nani xpalakata Cristo. Xlikana, xtamakgalhtawakgen Cristo litaxtukan, ni kaj takgaman. Ni kaj lakapala chuna xlitalaksakat. Wa xlakata, talakaskin liwana nalilakpuwanaw.

Max natalakaskin pi xtamakgalhtawakgen Jesús natitaxtukgo tuku tuwa chu nakaputsastalanikan, xlakata Jesús wan: «Komo wi tiku kistalaniputun, xlikukat xkiwi nema makgapatinan chu kakistalanilh. Komo ni chuna natlawa, nila kistalanina nalitaxtu» (Lucas 14:27). Wa xlakata, xaxlikana xtamakgalhtawakgen Cristo xatapaxuwan natayani chuna la xla tayanilh. Chu asta Jesús wanit, pi xtalatlawananin namakgnikgo.

Wa xlakata tiku taʼankgo liwana xlilakpuwanatkan tuku kilhchanima xtamakgalhtawakgen nawankgo. Jesús maklakaskin akgtum liʼakxilhtit xlakata nalichuwinan uma: «¿Tiku wixin komo tlawaputun akgtum chiki ni pulana tawila chu akxilha komo naʼakchani xtumin xlakata namasputu? Komo ni chuna xtlawalh, max kaj xmamilh niku namakilhtsuki, pero nila xmasputulh xchik, chu putum tiku xʼakxilhkgolh xtsukukgolh likgalhkgamanankgo» (Lucas 14:28, 29). Wa xlakata, akxni nina xtamakgalhtawakgen Jesús litaxtukgo, tiku taʼamakgo Jesús kJerusalén xlikatsitkan tuku nakakitaxtuni chu xlimakgamakglhtinatkan uma talakgatay. Xlakata liwana nakamaʼakgatekgsni, Jesús lichuwinampara atanu liʼakxilhtit:

«Komo chatum mapakgsina tiku kgalhi akgkaw mil soldados amputun talatlawa achatum mapakgsina tiku kgalhi akgpuxam mil soldados, xla pulana natawila chu nakakgalhskin amakgapitsin xlakata naʼakxilha komo tlan natlajanan, ¿o nichuna? Xlikana, komo nila tlajanan, akxni achatum mapakgsina makgatku minacha malakgachani xlakskujnin xlakata nawani pi  ni katatlawalh guerra». ¿Tuku kinkamasiyaniyan? Jesús wan: «Komo wixin ni makgxtakgatit putum tuku katapakgsiniyan, nila kistalaninanin nalitaxtuyatit» (Lucas 14:31-33).

Xlikana, tuku wan Jesús ni kajwatiya kakilhchanima tiku taʼamakgo. Putum tiku lakgapaskgo, talakaskin natlawakgo tuku aku kgaxmatkgolh: namakgxtakgkgo putum tuku kgalhikgo, asta xlatamatkan, xlakata xtamakgalhtawakgen nalitaxtukgo. Talakaskin nalilakpuwankan uma chu natlawakan oración.

Alistalh, Jesús wan tuku xlichuwinanita kTaʼakgchuwin xalak Sipi akxni wa pi xtamakgalhtawakgen «matsat xalak katiyatni» litaxtukgo (Mateo 5:13). Max xwamputun pi chuna la matsat tlawa pi liwat ni lakapala nalakla, xtamakgalhtawakgen kamakgtayakgo latamanin tlan natalalinkgo Dios chu nakgalhikgo lakwan tayat. Chu xlakata amaja sputa xtaskujut, Jesús wan: «Xlikana, matsat lu tlan. Pero komo matsat namakgatsankga xliskgokgo, ¿tuku nalimaspitniparakan xliskgokgo?» (Lucas 14:34). Tiku kgaxmatnimakgo Jesús katsikgo pi ni putuminika matsat xatlan, xlakata wi matsat nema atanu tuku tatalakgwilhanit chu nialh limakwan.

Tuku Jesús masiyaputun wa pi tiku xtamakgalhtawakgen litaxtukgo lata makgasa ni xlimastatkan talakaskin wi tuku natlawa pi nialh nastalaniputunkgo. Komo chuna xlalh, nialhtu xlitaxtukgolh, xtachuna la matsat nema makgatsankga xlitliwakga. Kakilhtamaku tlan xkalikgalhkgamanalh chu tuku tlakg nitlan, xmakgatsankgakgolh xlitlan Dios chu xmaxkajwikgolh xtukuwani. Ni kilimastatkan talakaskin pi chuna nakinkaʼakgspulayan. Wa xlakata, Jesús limasputulh uma tachuwin: «Tiku tlan kgaxmata, kakgaxmatli» (Lucas 14:35).