Jesús kamaxkinit laktlan tastakyaw xtamakgalhtawakgen xlakata la namaklakaskinkgo tuku lhuwa xtapalh. Pero ni kajwatiya xlakan kgaxmatkgonit, na anta wilakgo fariseos, tiku kuenta xlitlawatkan umakgolh tastakyaw xlakata paxkikgo tumin. Pero akxni kgaxmatkgo xtachuwin Jesús, nitlan tsukukgo lichuwinankgo (Lucas 15:2; 16:13, 14).

Jesús ni pekuan, wata kawani: «Wixin tiku miʼakstukan xaʼakgstitum kalimaxtukanatit kxlakatin latamanin, pero Dios lakgapasa minakujkan. Xlakata tuku latamanin lakpuwankgo pi kgalhi kakni, Dios xalixkajni akxilha» (Lucas 16:15).

Lata makgasa, latamanin lu xlakaskinka kaliʼakxilhkgo fariseos, pero chinit kilhtamaku xlakata uma natalakgpali. Tiku xlakaskinka litaxtukgo xlakata kgalhikgo tumin chu tlan katalalinkgo tiku kgalhikgo limapakgsin ktakanajla chu ktamapakgsin, nakamaktujukan. Pero tiku liwana katsikgo pi tlakg xlikatsinitkan xlakata Dios, nakamalankikan. Jesús liwana wan pi talakatsuwinita tuku natalakgpali:

«Xtatsokgnikan Palakachuwinanin chu Limapakgsin lichuwinankgolh asta kxkilhtamaku Juan. Lata ama kilhtamaku, xatlan tamakatsinin xlakata xTamapakgsin Dios lichuwinamaka, chu putum latamanin lu liskujkgo xlakata natanukgo. Xlikana, tlakg [ni tuwa pi akgapun chu katiyatni natitaxtukgo nixawa] pi ni nakgantaxtu tuku litatakgatsi letra xla Limapakgsin» (Lucas 3:18; 16:16, 17). ¿La limasiya umakgolh tachuwin pi wi tuku ama talakgpali?

Xpulalinanin takanajla laktlankajwa chu wankgo pi makgantaxtimakgo xLimapakgsin Moisés. Kalakapastakwi pi akxni Jesús xwi kJerusalén chu tlawalh pi chatum chixku tlan xlakawanampa, fariseos tsukukgolh wankgo: «Akinin xtamakgalhtawakgen Moisés. Akinin kkatsiyaw pi Dios tachuwinanit Moisés» (Juan 9:13, 28, 29). Pulaktum tuku xʼama tlawa xLimapakgsin Moisés, wa pi xkamakgtayalh tiku ni laktlankajwa xkatsikgolh tiku Mesías, uma kilhchanima, Jesús. Juan Mununa lichuwinalh uma akxni limapakuwilh Jesús xBorrego Dios (Juan 1:29-34). Lata akxni Juan tsukulh lichuwinan Dios, judíos tiku ni laktlankajwa, liwaka lakglimaxkgenin, kgaxmatkgonit tamakatsin xla «xTamapakgsin Dios». Chuna, anan «tlan tamakatsinin» xpalakata tiku lakaskinkgo pi xTamapakgsin Dios kakamapakgsilh chu lipaxuwaputunkgo tasikulunalin nema nalimin.

Limapakgsin nema maxkika Moisés makgantaxtinita tuku lilakkaxwilika: kamakgtayanit judíos nalakgapaskgo Mesías. Chu nialh makgas namapanukan. Akgtum liʼakxilhtit, Limapakgsin xmasta talakaskin pi tlan kaxatukawa tuku xlilakxtlawaka tamakgaxtokgat, pero la uku Jesús wan pi putum «tiku lakxtlawa xtamakgaxtokgat, chu tatamakgaxtokga atanu puskat, tlawama talakgxtumit nema ni xlitatlawat» (Lucas 16:18). Uma tachuwin lu kamakgasitsi fariseos, xlakata xlakan kajwatiya kuentajtlawakgo tuku wan Limapakgsin.

 La uku, Jesús lichuwinan akgtum liʼakxilhtit nema masiya pi wi tuku talakgpalima. Lichuwinan chatiy lakchixkuwin chu wan la talakgpali xlatamatkan. Kalichuwinaw uma chu kalakapastakwi pi na kgaxmatmakgo fariseos tiku lu paxkikgo tumin chu lu kamalankikan.

Jesús wan: «Xwi chatum chixku tiku lhuwa tuku xkgalhi chu xlismani xlilhakganan [xamantajwa] lhakgat [chu lino], chu chali chali xlipaxuwa tuku laktlan xkgalhi. Pero kxmalakcha xwilikan chatum tiku kskiwayan xwanikan Lázaro, uma chixku [...] xmaktsitsin chu lu xwaputun tuku xtakta kxmesa chixku tiku lhuwa tuku xkgalhi. Chuna, asta chichi xlakgminkgo chu kslipinikgo [o ksnekgenikgo] xtsitsi» (Lucas 16:19-21).

Tiku kgalhi lhuwa tumin wa kakilhchanima fariseos, xlakata lu lakgatikgo tumin. Uma xpulalinanin judíos na lakgatikgo xatapalaxla chu xastlan lhakgat. Maski lhuwa o ni lhuwa tuku kgalhikgo, tasiya pi ni lakglimaxkgenin xlakata kgalhikgo lhuwa talakgatay chu tipalhuwa la tlan skujnanikgo Dios. Xlakata nalimasiyakan pi tlan la wi xlatamatkan kalichuwinankan la chixku nema lilhakganan xamantajwa lhakgat, color nema xlilhakganankgo mapakgsinanin. Nachuna, xasnapapa lino limasiya pi xaʼakgstitum xkamakgkatsikan (Daniel 5:7).

¿Tuku kalakpuwanikgo latamanin umakgolh pulalinanin tiku kgalhikgo lhuwa tumin chu laktlankajwa? Kamaktujukgo chu kalimapakuwikgo ʽam haʼárets, o latamanin xalak katiyatni nema ni lakgapaskgo Limapakgsin chu ni kalakgchan  nalakgapaskgo (Juan 7:49). Uma tamalakxtumikan tuku titaxtu Lázaro, «chixku tiku skiwayan», chu kgalhpuwan tuku tamokgosa kxmesa tiku kgalhi lhuwa tumin. Chuna la Lázaro nema litsama tsitsi, fariseos lakpuwankgo pi latamanin tatatlakgo kxtakanajlakan chu kalakgmakgankgo.

Maski uma tuku nitlan makgasa chuna wi, Jesús katsi pi chinita kilhtamaku xlakata wi tuku natalakgpali xpalakatakan tiku litaxtukgo la chixku tiku lhuwa tuku kgalhi chu tiku litaxtukgo la Lázaro.

Jesús wan pi xlatamatkan umakgolh lakchixkuwin lu talakgpali: «Titaxtulh kilhtamaku, nilh chixku tiku kskiwayan chu ángeles linkgolh kxpaxtun Abrahán. Nachuna, nilh chixku tiku lhuwa tuku xkgalhi chu maknuka. Chu akxni xwilacha kPutaknun chu xpatinama, talakayawalh chu lakgamakgat akxilhli Abrahán chu kxpaxtun xya Lázaro» (Lucas 16:22, 23).

Tiku kgaxmatnimakgo Jesús katsikgo pi Abrahán makgasata ninit chu wi kPutaknun. Biblia liwana wan pi putum tiku wilakgo kPutaknun o kSeol nialhla akxilhkgo chu nialhla chuwinankgo, uma wamputun pi Abrahán na nialhtu katsi (Eclesiastés 9:5, 10). Wa xlakata, ¿tuku akgatekgskgo xpulalinanin takanajla xlakata uma liʼakxilhtit? ¿Tuku max xmasiyama Jesús xpalakata latamanin chu xpalakata xpulalinanin takanajla nema lu paxkikgo tumin?

Jesús aku lichuwinalh tuku talakgpalinit akxni wa pi «xtatsokgnikan Palakachuwinanin chu Limapakgsin lichuwinankgolh asta kxkilhtamaku Juan» chu «lata ama kilhtamaku, xatlan tamakatsinin xlakata xTamapakgsin Dios lichuwinamaka». Xlakata Jesús chu Juan lichuwinankgo Dios, Lázaro chu tiku xkgalhi lhuwa tumin nikgo, uma wamputun pi xlatamatkan talakgpali, chu talakgpali la Dios kaʼakxilha.

Tiku ni laktlankajwa chu ni kgalhikgo tumin, lhuwata kilhtamaku niti kuentajtlawanit xtakanajlakan. Pero la uku makglhtinankgo tamakgtay xlakata kgaxmatkgo tamakatsin xla Tamapakgsin nema pulana lichuwinalh Juan Mununa chu alistalh Jesús. Asta la uku kajwatiya xlilamakgo «tuku xtakta kxmesa» xpulalinanin takanajla. Pero la uku liwana kamawimaka xlakata kamasiyanimaka tuku pulana min kTatsokgni, liwaka tuku Jesús masiyama. Wa xlakata la uku tlan wilakgo kxlakatin Dios.

Pero xpulalinanin takanajla tiku lhuwa tuku kgalhikgo chu kgalhikgo limapakgsin, lakgmakgankgo tamakatsin xla Tamapakgsin nema Juan lichuwinalh chu nema Jesús lichuwinama kxlikalanka Israel (Mateo 3:1, 2; 4:17). Asta uma tamakatsin kamakgasitsi, chu uma limasiya pi Dios nakamalakgaxokge (Mateo 3:7-12). Xpulalinanin takanajla lu tlan xmakgkatsikgolh komo Jesús chu xtamakgalhtawakgen nialh xlichuwinankgolh Dios. Umakgolh xpulalinanin takanajla xtachunakan chixku  nema lhuwa tuku xkgalhi chu wan: «Tlat Abrahán, kakilakgalhamanti chu kamalakgacha Lázaro xlakata namakgankgaju aktsu xmakan kchuchut chu namaskgawiwi kisimakgat, xlakata lu kpatinama kʼuma lhkuyat nema lakgpasama» (Lucas 16:24).

Pero uma ni chuna katilalh, xlakata lhuwa xpulalinanin takanajla ni katitalakgpalikgolh, ni kgaxmatniputunkgonit Moisés chu Palakachuwinanin. Tuku xlakan tsokgkgolh xlitlawat xwanit pi xlakan xmakgamakglhtinankgolh Jesús la Mesías chu Mapakgsina nema Dios xwanit pi namin (Lucas 16:29, 31; Gálatas 3:24). Umakgolh pulalinanin na ni taktujukgo chu ni kakanajlaniputunkgo tiku kgaxmatnikgo Jesús chu la uku kgalhikgo xlitlan Dios. Xtamakgalhtawakgen Jesús nila nialh nalichuwinankgo Dios chu nalakgpalikgo tuku xaxlikana kaj xlakata nakamakgapaxuwakgo xpulalinanin takanajla o kaj xlakata tlan namakgkatsikgo. Kliʼakxilhtit, Jesús lichuwinalh tuku lama akxni wan tuku «Abrahán» wani chixku tiku lhuwa tuku xkgalhi:

«Kinkgawasa, kalakapastakti pi kmilatamat lipaxuwa putum tuku tlan, pero Lázaro makglhtinalh tuku nitlan. Pero uku, xla tlan mamakgkatsinimaka unu, chu wix patinampat. Chu nachuna, pulhman tapapitsinit tiyat nema kinkamapapitsiyan [...], wa xlakata tiku kalakgamputunachan nila kalakganachan, chu wantiku kinkalakgmimputunan nila kinkalakgminan» (Lucas 16:25, 26).

Xlilat pi lanit uma talakgpalit. La uku, latamanin tiku taktujukgo chu makglhtinankgo takgoxamixit chu kamatliwakglhnikan xtakanajlakan, tawilakgo xlakgxokgo xpulalinanin takanajla tiku laktlankajwa chu umakgolh pulalinanin tawilakgo xlakgxokgo latamanin (Mateo 11:28-30). Uma talakgpalit tlakg natasiya alistalh, akxni xasasti talakkaxlan natawila xlakgxokgo talakkaxlan xla Limapakgsin (Jeremías 31:31-33; Colosenses 2:14; Hebreos 8:7-13). Akxni Dios namakamin xʼespíritu santo kPentecostés kkata 33, liwana natasiya pi tiku kgalhikgo xlitlan Dios ni wa fariseos nipara xpulalinanin takanajla tiku tatayakgo, wata wa xtamakgalhtawakgen Jesús.