Xlakata Jesús ni xkgalhi talakgalhin, ni titaxtulh taʼakglhuwit chu talakgaputsit nema akinin kgalhiyaw. Maski chuna, xlikana kalilakgaputsalh latamanin chu lu liskujli xpalakatakan. Ni kajwatiya tlawalh tuku xtalakaskin, wata tlakg lhuwa tuku tlawalh. Xlikana, xlakata Jesús xkalakgalhaman latamanin kamakgtayalh. Tlan naʼakxilhaw makgapitsi liʼakxilhtit kcapítulos 32, 37, 57 chu 99.

Putum latamanin, tiku laktsu chu laklankata, xtalakatsuwinikgo Jesús xlakata ni tlankajwa xwanit chu tlan xkalikatsini. Akxni xʼakxilhkgo pi xkalilakgaputsa chatunu chatunu, tlan xmakgkatsikgo. Kaʼakxilhwi la limasiyalh pi xkalimaxtuni kilhtamaku kcapítulos 25, 27 chu 95.

Jesús ankgalhin xtlawa oración, akxni xʼakstu xwi chu akxni xwilakgo tiku na xkakninanikgo Dios. Makglhuwa xtlawa oración, ni kajwatiya akxni xwayan. Akxni xtlawa xʼoración xmaxki paxtikatsinit chu xmalanki xTlat chu kskini xtapulalit akxni wi tuku xlakaskinka xʼama laksaka. Kaʼakxilhwi tuku lichuwinan capítulos 24, 34, 91, 122 chu 123.

Milh kilhtamaku, maski Jesús xlijaxat xwanit nichuna tlawalh xlakata tlan xkamakgtayalh amakgapitsin. Ni xʼakstu paxkika. Jesús kinkawilinin lu tlan liʼakxilhtit nema kilistalanitkan. Kaʼakxilhwi la limasiyalh uma tayat kcapítulos 19, 41 chu 52.

Jesús ni kajwatiya masiyalh pi xlakaskinka nalatapatiyaw, wata na kinkawilinin liʼakxilhtit xlakata la kalikatsinilh xtamakgalhtawakgen chu amakgapitsi latamanin. Kaʼakxilhwi la kalikatsinilh kcapítulos 26, 40, 64, 85 chu 131.

Palakachuwinanin xwankgonit pi lhuwa judíos xʼamakgo lakgmakgankgo Mesías chu xtalamakgasitsin xʼamakgo makgnikgo. Jesús tlan ni lhuwa tuku xtlawalh xlakata namakgantaxti tuku xlakgaya. Pero lu liskujli xlakata namasiya xaxlikana takaknin. Akxni chuna tlawalh kinkawilinin tlan liʼakxilhtit putum kstalaninanin xlakata tuku natlawayaw akxni niti kinkakgaxmatniputunan o kinkaputsastalanikanan. Kalilakpuwaw tuku lichuwinan capítulos 16, 72 chu 103.

Xlakata Jesús ni xkgalhi talakgalhin ni xtachuna xwanit la latamanin, akgtum liʼakxilhtit, Jesús tlakg lhuwa tuku xkatsi chu tlakg skgalala xwanit. Ni xkgalhi talakgalhin, wa xlakata ni xʼanan tiku xtachuna xwanit la xtasiya chu la xlakapastaknan. Maski chuna, taktujulh chu kaskujnanilh amakgapitsin. Tlan nakatsiniyaw xlakata xtaktujut kcapítulos 10, 62, 66, 94 chu 116.

Akxni apóstoles chu amakgapitsi latamanin ni kstalanikgo xliʼakxilhtit Jesús o ni xlilatamakgo xtastakyaw, xla ni lakapala xkasitsini. Xkawanipara tuku xlakaskin pi xkatsinikgolh xlakata tlan xtalakatsuwinikgolh Jehová. Kaʼakxilhwi makgapitsi la Jesús limasiyalh pi ni lakapala ksitsi kcapítulos 74, 98, 118 chu 135.