Titaxtunita tipuxam kilhtamaku lata Jesús alh kdesierto chu la uku taspitputun kʼGalilea. Pero akxni nina taspita, ampara akxilha Juan, tiku mununit. Akxni Juan akxilha pi talakatsuwima, limakan xmakan chu pixlanka wan: «¡Kaʼakxilhti, xBorrego Dios, tiku xapa xtalakgalhinkan latamanin! Wa uma tiku kwa xpalakata: “Chixku tiku kistalanima, kimpulaninit xlakata lama lata akxni akit nina xaklama”» (Juan 1:29, 30). Maski Juan tsinu tlakg lanka nixawa Jesús, xla katsi pi akxni xla nina xlakachin, Jesús xlatamanita kʼakgapun.

Nina lhuwa semana xtitaxtunit, akxni Jesús lakgalh Juan xlakata xmunulh, Juan ni liwana xkatsi pi Jesús wa Mesías xwanit, xlakata Juan wan: «Nipara akit xaklakgapasa, pero akit kmununama kchuchut xlakata Israel tlan xlakgapasli» (Juan 1:31).

Alistalh Juan kawani tiku kgaxmatnikgo tuku lalh akxni munulh Jesús: «Kakxilhli pi espíritu taktachi la paloma kʼakgapun, chu tamakgxtakgli kxakpun. Nipara akit xaklakgapasa pero Tiku kimalakgachalh nakmununan kchuchut, kiwanilh: “Akxni wix naʼakxilha pi espíritu santo taktama chu tawila kxakpun chatum lataman kakatsi pi wa uma tiku limununan espíritu santo”. Chu akit kakxilhnit, chu klichuwinanit pi wa uma xKgawasa Dios» (Juan 1:32-34).

Lichali, Juan tiku Mununan katawi chatiy xlimakgalhtawakget akxni Jesús talakatsuwinipara. Akxni akxilha Juan pixlanka wampara: «¡Kaʼakxilhtit, xBorrego Dios!» (Juan 1:36). Umakgolh chatiy kstalaninanin Juan, tsukukgo stalanikgo Jesús. Chatum wanikan Andrés, chu achatum max wa tiku tsokgli uma tuku xlama, wanikan Juan. Uma max wa xtapuxnimat Jesús, xlakata Zebedeo wa xtlat chu Salomé wa xtse, tiku max xtala María.

Jesús talakgaspita, chu akxni akxilha pi Andrés chu Juan stalanimakgo, kawani: «¿Tuku putsapatit?». Xlakan kgalhskinkgo:

«Rabí ¿niku tamakgxtakgpat?». Jesús kawani:

«Katantit chu naʼakxilhatit» (Juan 1:37-39).

Max kamakgtati kakgotanun xwanit, Andrés chu Juan tatamakgxtakgkgo Jesús. Andrés lu paxuwa, pi akxni akxilha xtala, Simón nema na wanikan Pedro, wani pi tekgskgonit Mesías chu lin niku xla wi (Juan 1:41). Maski Juan ni tsokgwililh, pero tuku lalh alistalh kinkamalakpuwaniyan pi xla na litachuwinan xtala, Santiago, chu malakgapasni Jesús.

Lichali, Jesús tatanokglha Felipe, tiku xalak Betsaida. Andrés chu Pedro na anta tapakgsikgo kʼuma kachikin nema wi kxnorte pupunu Galilea. Akxni Jesús akxilha Felipe, wani: «Kistalanina kawanti» (Juan 1:43).

 Alistalh Felipe tatanokglha Natanael, tiku na wanikan Bartolomé, chu wani: «Ktekgsnitaw Jesús, xla xkgawasa José xalak Nazaret. Xlimapakgsin Moisés chu xtatsokgnikan Palakachuwinanin lichuwinankgolh». Pero Natanael nila kanajla chu wani: «¿Wi tuku xatlan nataxtuyacha kNazaret?».

Felipe wani: «Katat chu kaʼakxilhti». Akxni Jesús akxilha pi Natanael chin, wani: «Kaʼakxilhtit, xlikana pi chatum israelita tiku ni akgsaninan».

Natanael kgalhskin: «¿La kilakgapasa?».

Jesús kgalhti: «Akxni nina xtasaniyan Felipe, kakxilhni xwila xtampin kxakiwi higo». Natanael kaks lilakawan chu kgalhtinan:

«Rabí, wix xKgawasa Dios, wix xMapakgsina Israel».

Pero Jesús kgalhskin: «¿Kanajlaya xlakata kwanin pi kakxilhni xwila xtampin kxakiwi higo? Naʼakxilha tuku tlakg kaks malakawaninan». Chu kawani tiku anta wilakgo: «Xlikana kkawaniyan pi naʼakxilhatit pi akgapun talakkinit chu xʼángeles Dios lakgmimakgolh xKgawasa chixku chu amaparakgolh» (Juan 1:45-51).

Akxni nina makgas lanit uma, Jesús chu xasasti kstalaninanin taxtukgo kxakaxtum kJordán chu ankgo kʼGalilea.