La uku kilhtamaku akxni xananan kJerusalén. Akxni Jesús chu kstalaninanin tlawakgonita Pascua kkata 30, taxtukgo kJerusalén. Pero ni tunkun taspitkgo kxchikkan kʼGalilea. Wata ankgo kJudea chu kamunukgo lhuwa latamanin. Akgtum kata kgalhi la Juan tiku Mununan nachuna tlawama, max anta mununama kxakaxtum niku wi kgalhtuchokgo Jordán, chu makgapitsi kstalaninanin chuntiyaku stalanimakgo.

Jesús ni wa kamunu latamanin. Wa kstalaninanin tiku mununankgo chuna la kawani Jesús. Ama kilhtamaku, Jesús chu Juan kamasiyanimakgo judíos tiku nitlan limakgkatsikgo xlakata lakatsalakgonit Limapakgsin (Hechos 19:4).

Kstalaninanin Juan lakgsitsikgo tuku tlawama Jesús chu wankgo: «Chixku [Jesús] tiku akxtum xtayachan [...] mununama chu putum latamanin lakgamakgolh» (Juan 3:26). Pero Juan ni sitsini Jesús, wata paxuwa pi tlan kitaxtunima chu lakaskin pi kstalaninanin na kalipaxuwakgolh uma. Wa xlakata kamalakapastaka: «Wixin liwana katsiyatit pi ktikawanin: “Akit ni wa Cristo, wata kimalakgachakanit xlakata nakpulani”». Wa xlakata kawilini akgtum liʼakxilhtit xlakata tlan naʼakgatekgskgo: «Litatawilat tsumat wa tapakgsini litatawilat kgawasa. Pero xʼamigo litatawilat kgawasa, akxni lakatsu ya chu kgaxmata xtachuwin lu lipaxuwa xlakata chuwinan litatawilat kgawasa. Wa xlakata akit lu klitsama uma tapaxuwan» (Juan 3:28, 29).

Titaxtunita makgapitsi papaʼ lata Juan kamalakgapasnilh Jesús kstalaninanin, chu Juan, tiku xtachuna xʼamigo litatawilat kgawasa, lu paxuwalh. Makgapitsi kstalaninanin tsukukgolh stalanikgo Jesús chu alistalh xʼamaka kalilaksakkan espíritu santo. Pero Juan lakaskin pi tiku chuntiya stalanikgo, na kastalanikgolh Jesús. Juan xlakgayawanit nalakkaxwili tiji xlakata Cristo xmatsukilh xtaskujut. Wa xlakata, Juan wan: «Xla chuntiya natalhuwitilha xtaskujut, pero akit chuntiya xlitaʼaktsuwitilhat kintaskujut» (Juan 3:30).

Chatum kstalanina Jesús, nema na Juan wanikan, alistalh lichuwinan xkilhtsukut Jesucristo chu tuku xlakaskinka lakgaya xlakata nalakgtaxtukgo latamanin: «Tiku minacha talhman tlakg lanka nixawa amakgapitsin. [...] Wa xaTlat paxki xaKgawasa chu makamaxkinit putum tuku anan. Ama tiku nalimasiya pi kanajlani xaKgawasa kgalhi latamat nema ni kgalhi xlisputni; ama tiku ni kgalhakgaxmatni xaKgawasa ni katikgalhilh latamat, wata xtasitsi Dios nikxni katitapanunilh» (Juan 3:31, 35, 36). Lu xlakaskinka pi latamanin nakatsikgo uma.

Akxni Juan lichuwinanita pi xtaskujut chu tuku lakgayawakanit nataʼaktsuwitilha, mapakgsina Herodes matamaknuninan kpulachin. Chuna tlawa xlakata Juan waninit pi tlawama talakgalhin xlakata tatamakgaxtokgli Herodías, xpuskat xtutala nema wanikan Filipo. Akxni Jesús katsi pi Juan tamaknukan kpulachin, xla taxtu kJudea chu kataʼan kstalaninanin kʼGalilea (Mateo 4:12; Marcos 1:14).