Akxni Jesús aku tamununit, x’espíritu Dios lin kxdesierto Judea. Xlikana pi lhuwa tuku xlilakpuwanat, xlakata «akgapun talakkilh» akxni tamunulh (Mateo 3:16). Wa xlakata, lata uma kilhtamaku tlan lakapastaka tuku katsinilh chu tlawalh kʼakgapun. Xlikana pi talakaskin nalilakpuwan putum uma.

Jesús tamakgxtakga kdesierto tipuxam kilhtamaku chu tipuxam tsisni. Putum umakgolh kilhtamaku ni wayan, chu wa xlakata lu tsinksma. Akgskgawini maklakaskin uma xlakata naputsanani. Talakatsuwini chu wani: «Komo wix xkgawasa Dios, kakawani umakgolh chiwix kaxtalanchu kawankgolh» (Mateo 4:3). Jesús katsi pi ni xlilat namaklakaskin xlitliwakga xlakata natlawa tuku xla lakaskin, wa xlakata tayani taputsan.

Pero Akgskgawini ni anta tamakgxtakga chu atanu tuku liputsanani. Wani pi kalhkgen taktalh lata niku tlakg talhman ktemplo xlakata ángeles nalakgmaxtukgo. Pero Jesús ni tlawa tuku nalilankan. Wata maklakaskin Tatsokgni xlakata nalimasiya pi nitlan chuna naliʼakxilhkan Dios.

Wa xlakata, Akgskgawini xlimakgtutu putsananipara Jesús. Masiyani «putum tamapakgsin xalak kakilhtamaku chu xlilanka» chu wani: «Putum umakgolh nakmaxkiyan komo natatsokgostaya, chu kaj makgtum nakinkakninaniya». Pero Jesús nipara tsinu lakpuwan chuna natlawa. Chu wani: «¡Kapit Satanás!» (Mateo 4:8-10). Tayanipara taputsan xlakata katsi pi kajwatiya xlitakakninanit Jehová, chu xla lakpuwanit ni namakgxtakga.

¿Tuku kinkamasiyaniyan tuku Akgskgawini liputsananilh Jesús chu tuku xla tlawalh? Uma tuku lalh kinkamasiyaniyan pi xlikana putsananika Jesús chu pi Akgskgawini ni kaj kilhchanima nixatlan tayat, chuna la makgapitsi lakpuwankgo. Maski nila akxilhaw, Akgskgawini xlikana lama. Na kinkamasiyaniyan pi mapakgsinanin xalak kakilhtamaku wa tapakgsinikgo Akgskgawini chu wa kaʼakgchipanit. Komo ni chuna xwa, ¿xlikana akgtum taputsan xlitaxtunilh Jesús akxni Satanás kamalaknunilh tamapakgsin?

Nachuna, Akgskgawini wanilh Jesús pi xʼama maxki putum tamapakgsin xalak kakilhtamaku komo xla kaj makgtum xkakninanilh. Chu la uku na tlan chuna nakinkaputsananiyan, max nakinkamalaknuniyan pi natlajayaw lhuwa tumin, nakgalhiyaw limapakgsin o xlakaskinka nakinkaʼakxilhkanan. Pero kaxatukawa taputsan nema nakinkalakgchinan, tlakg tlan komo nastalaniyaw xliʼakxilhtit Jesús chu ni namakgxtakgaw Dios. Na kalakapastakwi pi Akgskgawini tapanunilh Jesús chu «kgalhkgalhilh atanu kilhtamaku akxni tlan xliʼakxilhpa», chu max nachuna nakinkatlawayan (Lucas 4:13). Wa xlakata, ankgalhin skgalalh kilitawilatkan.