Max akgchaxan papaʼ lata Juan tiku Mununan lichuwinama Dios akxni Jesús, tiku kgalhi 30 kata, an putsa kkgalhtuchokgo Jordán. Jesús ni an xlakata nakgalhskin lantla wi o la kitaxtunima xtaskujut. An putsa xlakata nawani pi kamunulh.

Pero Juan lakpuwan pi ni chuna xlitlawat, wa xlakata wani: «Akit klakaskin wix nakimunuya, ¿chu wata wix kilakgtanita?» (Mateo 3:14). Juan katsi pi Jesús wa xKgawasa Dios. Xtse, Elisabet, waninit pi xla paxuwalh chu tatsuwilh kxpan akxni María kilakgapaxialhnalh chu xla na xʼama kgalhi skgata. Nachuna, max Juan katsilh pi chatum ángel makatsininalh pi xlakachinit Jesús chu pi makgapitsi ángeles katasiyanikgolh tiku xkuentajtlawamakgo borrego katsisni akxni lakachilh Jesús.

Juan katsi pi xla kamunu latamanin tiku nitlan limakgkatsikgo xtalakgalhinkan, pero Jesús ni tlawanit talakgalhin. Maski xapulana Juan ni lakaskin, Jesús wani: «Kamasta talakaskin, xlilat chuna nala xlakata namakgantaxtiyaw uma tuku xaʼakgstitum» (Mateo 3:15).

¿Tuku xlakata xlitamunut Jesús? Ni wa xlakata nalimasiya pi nitlan limakgkatsi xtalakgalhin, wata tamunu xlakata nalimasiya pi natlawa xtalakaskin xTlat (Hebreos 10:5-7). Asta uma kilhtamaku, Jesús xwakna litaxtu, pero chinit kilhtamaku xlakata namatsuki taskujut nema limakaminit xTlat xalak kʼakgapun. ¿Kgalhkgalhi Juan pi wi tuku nala akxni namunu Jesús?

Wa uma tuku Juan lichuwinan alistalh: «Tiku kimalakgachalh nakmununan kchuchut, kiwanilh: “Akxni wix naʼakxilha pi espíritu santo taktama chu tawila kxakpun chatum lataman kakatsi pi wa uma tiku limununan espíritu santo”» (Juan 1:33). Wa xlakata Juan kgalhkgalhi pi xʼespíritu Dios natakta kxʼakgspun chatum lataman tiku namunu. Wa xlakata, akxni Jesús takutli kchuchut, max Juan ni kaks lilakawan akxni akxilha pi «xʼespíritu Dios lakgmilh Jesús la tantum paloma» (Mateo 3:16).

Pero wi atanu tuku lay: akgapun talakki. ¿Tuku wamputun uma? Max wamputun pi ama kilhtamaku, Jesús lakapastaka la xlamacha kʼakgapun  akxni chatum espíritu xwanit chu xKgawasa Jehová xlitaxtu, na lakapastakli xaxlikana tuku Dios masiyanilh akxni nina xmin kKatiyatni.

Nachuna, akxni tamunu, takgaxmata akgtum tachuwin kʼakgapun: «Uma kinKgawasa, tiku lu kpaxki, chu lu tlan kimamakgkatsini» (Mateo 3:17). ¿Tiku chuwinama? Ni wa Jesús, xlakata xla anta tawi Juan. Wa Dios chuwinama, chu uma limasiya pi Jesús ni wa Dios, wata xKgawasa Dios.

Akxni xlama kKatiyatni, Jesús xKgawasa Dios xlitaxtu, pero lataman xwanit chuna la Adán. Akxni Lucas lichuwinanita xtamunut Jesús, wampara: «Akxni Jesús tsukulh lichuwinan Dios, xkgalhi max puxamakaw kata, xlakpuwankgokan pi wa xtlat xwanit José, xkgawasa Helí, [...] xkgawasa David, [...] xkgawasa Abrahán, [...] xkgawasa Noé, [...] xkgawasa Adán, [...] xkgawasa Dios» (Lucas 3:23-38).

Jesús xKgawasa Dios nema chatum lataman litaxtu chuna la xwanit Adán. Pero akxni Jesús tamunu, na xKgawasa Dios litaxtu nema nalatama kʼakgapun. Wa xlakata, lata uma kilhtamaku lu tlan talalin xTlat. Uma wamputun pi la uku tlan nalichuwinan tuku xaxlikana xlakata Dios chu namasiya tiji nema linan klatamat. Akxni tamunu, matsuki tuku ama tlawa pi namakamasta xlatamat xpalakata latamanin nema kgalhikgo talakgalhin.