Max wix lakgatiya kgaxpata xatlan tamakatsin. ¿Xkatsiya pi Jehová, xMalakatsukina putum tuku anan, waniputunan tlan tamakatsin wix chu mifamilia?

Uma tamakatsin wi kBiblia, tuku Jehová matsokgninalh makgasa, uma tlakg talichuwinan kmaktati libros nema kgalhikgo xtukuwanikan tiku tsokgkgolh: Mateo, Marcos, Lucas chu Juan. Uma likgalhtawakga tlakg lichuwinan tuku min kʼuma maktati libros.

Lhuwa tiku limapakuwikgo uma la maktati Evangelios. Evangelio wamputun «xatlan tamakatsin», chu uma maktati libro lichuwinan xatlan tamakatsin xlakata Jesús. ¿Tuku tamakatsin? Wa pi Dios namaklakaskin Jesús xlakata nakinkalakgmaxtuyan chu xlakata Jesús Mapakgsina kxTamapakgsin Dios, nakalimini tasikulunalin nema nikxni sputa putum tiku nakanajlanikgo (Marcos 10:17, 30; 13:13).

Max akstu nakinkakgalhskinkanan tuku xlakata Dios malakpuwaninalh natsokgkan maktati libro nema lichuwinan xlatamat chu xtamasiy Jesús.

Lu tlan pi chuna tlawalh. Akgtum liʼakxilhtit. Kalilakpuwaw kgalhtati lakchixkuwin nema yakgo kxlakatin lu xlakaskinka makgalhtawakgena. Tiku ya kxlakatin makgalhtawakgena, xmatajina lilakgaxokgon. Tiku ya kxpakgkana o kxpakgastakat, makuchina. Tiku ya kxpakgxwiki o kxpakgxuki, skitina chu lu tlan talalin. Chu xlikgalhtati tiku ya kxchakgen, tlakg kgawasaku nixawa amakgapitsin. Xkgalhtatikan tlan naku kgalhikgo pero wi tuku lilakgaputsakgo chu tanu tanu tuku lakpuwankgo. Komo xchatunukan natsokgkgo xtamasiy chu xtaskujut makgalhtawakgena, max tanu tanu tuku natsokgkgo. Komo kuenta natlawayaw tuku tanu tanu xlakpuwankgo tiku tsokgkgolh uma maktati  libro, nakinkamakgtayayan nakatsiyaw tuku makgalhtawakgena wa chu tlawalh. Xtachuna tlan kitaxtu pi kgalhiyaw maktati libro nema lichuwinan xlatamat Jesús, xaTlan Makgalhtawakgena.

Chuntiya kalichuwinaw liʼakxilhtit. Kalakpuwaw pi xmatajina lilakgaxokgon kalakgchamputun tiku judíos, wa xlakata lichuwinan makgapitsi tamasiy chu tuku lanit xlakata nakamakgtaya. Pero makuchina, tlakg lichuwinan la kamapaksaka tiku xtatatlakgo chu tiku nila xtlawankgo. Wa xlakata ni lichuwinan tuku lichuwinan xmatajina lilakgaxokgon, o max tanu la lichuwinan. Pero xʼamigo makgalhtawakgena tlakg lichuwinan xtayat chu tuku makgkatsi makgalhtawakgena, chu tiku tlakg kgawasaku ni lhuwa tuku lichuwinan. Maski chuna, putum tuku lichuwinankgo xaxlikana. Nachuna kitaxtu xlakata Evangelios: xlakata wilakgo pulaktati tuku lichuwinan xlatamat Jesús, kinkamakgtayayan tlan liwana naʼakgatekgsaw tuku tlawalh, tuku masiyalh chu la likatsilh.

Latamanin lismanikgonit wankgo «Evangelio xla Mateo» o «Evangelio xla Juan». Uma xlikana, xlakata pulakatunu lichuwinan «xatlan tamakatsinin xpalakata Jesucristo» (Marcos 1:1). Pero kaj pulaktum evangelio anan, nema tanu tanu tiku tsokgkgonit.

Lhuwa tiku putsanankgo malakxtumikgonit chu kaxwilikgonit chuna la latilhalh tuku lichuwinan Evangelio xla Mateo, Marcos, Lucas chu Juan. Wa uma tuku tlawalh Taciano, tsokgna xalak Siria, tiku wa pi uma maktati libros xlikana tuku lichuwinankgo chu wa Dios matsokgninalh. Max kkata 170 tsokgli libro Diatessaron, uma lichuwinan xlatamat chu xtaskujut Jesús.

Uma libro, nema wanikan Jesús: wa tiji, xaxlikana chu latamat, xtachuna tuku tlawalh Taciano, pero uma tlakg liwana tlawaka chu xatakgatsin. Tlan chuna tlawaka xlakata kkinkilhtamakujkan tlakg liwana taʼakgatekgsa liʼakxilhtit nema lichuwinalh Jesús chu la kgantaxtulh tuku xwankanit pi xʼama lay. Uma tlawa pi tlakg liwana naʼakgatekgsaw tuku tlawalh chu tuku lichuwinalh Jesús, chu la latilhalh tuku talichuwinan. Nachuna, tuku tekgskgonit arqueólogos kinkamakgtayayan naʼakgatekgsaw xtapuwankan tiku tsokgkgolh. Maski nila liwana katsiyaw la latilhalh tuku tsokgkanit, uma libro lichuwinan chuna la ni tuwa naʼakgatekgskan chu chuna la max latilhalh.

Akxni nalikgalhtawakgayaw uma libro, kuenta katlawaw tuku kinkamasiyaniputunan. Kalakapastakwi tuku Jesucristo wanilh apóstol Tomás: «Akit tiji chu xaxlikana chu latamat. Kaj kimpalakata tlan lakgankan xaTlat» (Juan 14:6).

Uma libro nakinkamakgtayayan naʼakgatekgsaw tuku xlakata Jesús wa «tiji». Kaj xpalakata Jesús tlan tlawaniyaw oración Jehová, tlan talalinaw chu kgalhiyaw xtamakgtay (Juan 16:23; Romanos 5:8).

Jesús na «xaxlikana». Ankgalhin wa chu lilatamalh tuku xaxlikana. Nachuna, lhuwa tuku xlichuwinankanit pi xʼama lay «kgantaxtukgonit xpalakata Jesús», uma kinkamakgtayayan naʼakgatekgsaw pi lu xlakaskinka tuku Jesús lakgaya xlakata nakgantaxtu xtalakaskin Dios (2 Corintios 1:20; Juan 1:14; Apocalipsis 19:10).

Chu Jesucristo na «latamat». Xlakata makamastalh xlatamat nema ni xkgalhi talakgalhin chu stajtamakgalh xkgalhi, kinkamaxkin takgalhkgalhin pi nakgalhiyaw «latamat nema ni kgalhi xlisputni» (1 Timoteo 6:12, 19; Efesios 1:7; 1 Juan 1:7). Jesús na latamat nalitaxtu xpalakata tiku nikgonita nema nalakastakwanankgo chu tlan nalatamakgo putum kilhtamaku kParaíso (Juan 5:28, 29).

Putum kiliʼakgatekgsatkan chu xlakaskinka kiliʼakxilhatkan tuku lakgayawakanit Jesús xlakata nakgantaxtu xtalakaskin Dios. Xlikana pi lu nalipaxuwayaw lhuwa tuku nakatsiniyaw xlakata Jesús, tiku litaxtu “tiji, xaxlikana chu latamat”.