José mastakwani María xlakata nawani tuku lu xlakaskinka. Chatum xʼángel Jehová tasiyaninit kxtamanixni chu waninit: «Katakaxti, kakatatsala kʼEgipto aktsu kgawasa chu xtse, chu anta katamakgxtakgti asta akxni nakwaniyan, xlakata nialh makgas Herodes namakgniputun aktsu kgawasa» (Mateo 2:13).

Wa xlakata, José, María chu Jesús tsalakgo uma tsisni. Lu tlan pi tsalakgo, xlakata Herodes katsi pi astrólogos akgskgawikgonit. Xla xkawaninit pi xminkgolh makatsinikgo xlakata aktsu kgawasa, pero xlakan tanks ankgolh kxkachikinkan. Herodes lu sitsi. Xlakata namakgni Jesús, limapakgsinan pi kakamakgnika putum laktsu lakgkgawasan tiku akgtiy kata kgalhikgo o tiku tlakg laktsujku tiku lamakgo kBelén chu tiku lakatsu lamakgo. Xlakata tuku wanikgolh astrólogos lilakpuwan la akglit kata max kgalhi Jesús.

Lu nitlan tuku limapakgsinan Herodes. Ni katsiyaw la xlilhuwa laktsu lakgkgawasan kamakgnikan pero xtalipuwankan chu xtatasakan natsitni makgantaxtilh tuku xwanit palakachuwina Jeremías (Jeremías 31:15).

Akxni nina xla uma, José chu xfamilia tsalakgo kʼEgipto chu anta latamakgo. Akxni titaxtunita kilhtamaku, chatum xʼángel Jehová tasiyanipara José kxtamanixni chu wani: «Katakaxti, kakatapi aktsu kgawasa chu xtse kxtiyat Israel, xlakata nikgonita tiku xmakglhtiputunkgo xlatamat aktsu kgawasa» (Mateo 2:20). Xlakata nialh kalipekua wilakgo, José katataspita xfamilia kxkachikin. Uma makgantaxti apulaktu tuku xwankanit, tuku wan pi Dios xʼama tasani xkgawasa anta kʼEgipto (Oseas 11:1).

José katataspitputun xfamilia kJudea, max lakatsu kBelén, xlakata anta xlamakgo akxni nina xtsalakgo kʼEgipto. Pero makatsinikan pi xkgawasa  Herodes, Arquelao, tiku lixkajnit likatsi wa mapakgsinama kJudea. Nachuna, kʼatanu tamanixni, Dios makatsini José pi nitlan komo naʼan latama anta. Wa xlakata José chu xfamilia ankgo kxnorte kachikin chu latamakgo kkachikin Nazaret nema tapakgsi kʼGalilea. Jesús staka kʼuma kachikin chu makgantaxti uma tuku xlichuwinankanit: «Nalilakgapaskan Nazareno» (Mateo 2:23).