La uku primavera, uma kilhtamaku xfamilia José, xʼamigos chu xtalilakgapasni akxtum ankgo kJerusalén. Akgatunu kata ankgo xlakata natlawakgo Pascua chuna la wan Limapakgsin (Deuteronomio 16:16). Max 120 kilómetros xlimakgat wi Jerusalén lata kNazaret. Xputumkan lu xatapaxuwan takaxmakgo. Jesús kgalhi 12 kata, lu amputun kfiesta chu tawilaputun lakatsu ktemplo.

Jesús chu xfamilia akglhuwa kilhtamaku tamakgxtakgkgo kJerusalén. Akxni titaxtunit Pascua, tlawakan Fiesta xla Kaxtalanchu nema ni kgalhi Limaxkutin, nema makgapala akgtujun kilhtamaku (Marcos 14:1). Uma fiesta na anta xmakgtanuma akxni xtlawakan Pascua. Max akgtiy semana titaxtu lata taxtukgo kNazaret asta akxni taspitkgo. Pero uma kata tlakg tamakgapalikgo xpalakata Jesús chu ktiji akxilhkgo tuku lama.

Akxni amakgo knorte, José chu María lakpuwankgo pi Jesús anta katamima xfamilia chu xʼamigos. Pero akxni tachokgokgo xlakata nalakgtankuwikgo ni akxilhkgo Jesús. Putsakgo kxlakgstipan tiku lakxtum kataminkgo, pero ni tekgskgo. ¡Jesús ni anta katamin! Wa xlakata José chu María taspitkgo kJerusalén xlakata naputsakgo.

Akgtiy kilhtamaku tantaku putsakgo pero ni tekgskgo. Xliʼakgtutu kilhtamaku tekgskgo ktemplo, nema lhuwa salas kgalhi. Wi kxlakgstipan makgalhtawakgenanin judíos, kakgaxmatnima chu katlawanima takgalhskinin. Makgalhtawakgenanin lu kaks lilakawankgo xlakata lu tlan akgatekgsa tuku xla Dios.

Akxni María akxilha, wani: «Kinkgawasa, ¿tuku xlakata chuna kilatlawaw? Mintlat chu akit lu kkaputsaman chu lu klilakgaputsamaw» (Lucas 2:48).

Jesús kaks lilakawan pi xnatlatni ni xkatsikgo niku xtatekgsa. Wa xlakata kawani: «¿Tuku xlakata xkimputsapatit? ¿Ni xkatsiyatit pi kilitawilat kxchik kinTlat?» (Lucas 2:49).

Alistalh, Jesús katataspita José chu María anta kNazaret chu chuntiya kakgalhakgaxmata chu kamaxki kakni. Chuntiya staka chu skgalala wan, chu Dios chu latamanin tlakg paxkikgo. Kamanan xala uku tlan lhuwa tuku nakatsinikgo xlakata Jesús, tiku lata akxni aktsujku xwanit pulana wililh kxlatamat tuku xla Dios chu kamaxkilh kakni xnatlatni.