Nialh makgas Elisabet nakgalhi kskgata. María akgtutu papaʼ tatamakgxtakga. Pero la uku xlitaspitat kxchik chu makgat xlitlawanat xlakata nachan kNazaret, xnorte Judea. Akgchaxan papaʼ tsankga xla na nakgalhi kskgata.

Akxni nina makgas anit María, lakachin kskgata Elisabet, xla chu kskgata lu tlan wilakgo. Elisabet chu Zacarías lu paxuwamakgo. Akxni xla kamasiyani aktsu xkgawasa xfamilia chu xtalakatsu, putum paxuwakgo.

Xlimapakgsin Dios xwan pi laktsu lakgkgawasan xkapuakstilichukunika xlikgawasakan xliʼakgtsayan kilhtamaku lata xlakachinkgonit chu uma kilhtamaku na xkawilinikan xtukuwanikan (Levítico 12:2, 3). Makgapitsi limapakuwiputunkgo aktsu kgawasa Zacarías, chuna la xtlat, pero Elisabet wan: «¡Ni!, nawanikan Juan» (Lucas 1:60). Kalakapastakti pi ángel Gabriel wa pi skgata xʼamaka wanikan Juan.

Xfamilia chu xtalakatsu ni lakgatikgo uma tukuwani, chu wankgo: «Ni tiku xalak mifamilia chuna wanikan» (Lucas 1:61). Kgalhskinkgo Zacarías la lakaskin nawanikan xkgawasa. Zacarías skin niku tlan natsokgnan chu tsokgwili: «Xtukuwani Juan» (Lucas 1:63).

Ama kilhtamaku Zacarías tsukupara chuwinan. Akxilhwi pi kgokgolh xlakata ni kanajlalh pi Elisabet xʼama kgalhi skgata chuna la xwaninit ángel. Wa xlakata, xtalakatsunin kaks lilakawankgo pi la uku tlan chuwinan chu akstu kakgalhskinkan: «¿Tuku nalitaxtu uma aktsu kgawasa?» (Lucas 1:66). Akxilhkgo pi wa Dios wilininit xtukuwani Juan.

Ama kilhtamaku, Zacarías makglhtinan espíritu santo chu wan: «Kamalankika Jehová, xDios Israel, xlakata kalakgalhamanit xkachikin chu kalimininit lakgtaxtut. Xla malakatsukinit chatum tliwakga kilakgmaxtunakan kxchik David kskujni»  (Lucas 1:68, 69). Uma “tliwakga lakgmaxtuna” wa kilhchanima Jesús, nema nina lakachin. Zacarías na wan pi Dios nakalakgmaxtu xkachikin xlakgstipan xtalamakgasitsin chu alistalh nakamaxki talakaskin “pi ni xatapekua nakakninanikgo, ni namakgxtakgkgo chu natlawakgo tuku xaʼakgstitum” putum kxlatamatkan (Lucas 1:74, 75).

Alistalh Zacarías lichuwinan tuku natlawa xkgawasa: «Wix, aktsu kgawasa, nawanikana xpalakachuwina Tiku xala talhman, xlakata kxlakatin Jehová napina chu nakaxtlawanitilhaya xtiji, xlakata Dios nakatapati xtalakgalhinkan chu chuna nakalakgmaxtu, xlakata xtalakgalhaman Dios, naʼakxilhaw xkgakganat kʼakgapun nema namakgskgo chuna la akxni aku xkgakgama xlakata nakalimini xkgakganat tiku wilakgolh niku kapukswa chu tiku wilakgolh niku xmastilenkg linin kaʼakgchipanit chu nakinkamasiyaniyan tuku kilitlawatkan xlakata tlan nakgalhiyaw takaksni» (Lucas 1:76-79). ¡Uma lu tlan mamakgkatsininan!

La uku María chanita kxchik, kNazaret. Xlakata nina tamakgaxtokga, ¿tuku nala akxni latamanin nakatsikgo pi ama kgalhi skgata?