La uku primavera, kata 29. Titaxtunita akgkutujun kata lata Jesús xwi ktemplo chu xkatlawanima takgalhskinin makgalhtawakgenanin. La uku lhuwa tiku lichuwinamakgo Juan, xtalilakgapasni Jesús, tiku lichuwinama Dios kxʼoeste kgalhtuchokgo Jordán.

Juan kaks kamalakawani latamanin xlakata la tasiya chu la chuwinan. Xlhakgat litatlawanit xchixit camello chu litatampulakgchinit xuwa. Xtaway wa ksakgsi cera chu xtuki. Na lichuwinan uma: «Kamakgxtakgtit mintalakgalhinkan, xlakata Tamapakgsin xalak akgapun talakatsuwinit» (Mateo 3:2).

Xtamakatsin Juan kalakgchan xnakujkan tiku talakatsuwikgo chu kgaxmatnikgo. Lhuwa akxilhkgo pi talakaskin namakgxtakgkgo nixatlan xtapuwankan chu xtayatkan, chu nalakgmakgankgo la xlimakgo xlatamatkan. Minkgo akxilhkgo «latamanin xalak Jerusalén chu putum xalak Judea chu kachikinin nema xwilakgo kxkilhtun Jordán» (Mateo 3:5). Lhuwa tiku nitlan limakgkatsikgo xtalakgalhinkan chu Juan kamunu akxni kamatsankge kkgalhtuchokgo Jordán. ¿Tuku xlakata kamunu?

Juan kamunu xlakata nalitasiya pi xlikana nitlan limakgkatsikgo xlakata ni makgantaxtikgonit xLimapakgsin Dios (Hechos 19:4). Pero ni putum makgantaxtikgo tuku taskin xlakata nakamunukan. Akxni makgapitsi fariseos chu saduceos talakatsuwinikgo Juan, xla kalimapakuwi «xkamanan luwa» chu kawani: «Katlawatit tuku nalitasiya pi makgxtakgpatit mintalakgalhinkan. Nipara tsinu kalakpuwantit kminakujkan: “Kintlatkan wa Abrahán”. Xlakata kkawaniyan pi Dios, tlan natlawa pi umakgolh chiwix nalitaxtukgo xkamanan Abrahán. Hacha antiya wi kxtantun kiwi. Putum kiwi nema ni masta xatlan xtawakat nakakan chu namakankan klhkuyat» (Mateo 3:7-10).

Putum latamanin lichuwinamakgo Juan. Nachuna, lichuwinama akgtum lu xlakaskinka tamakatsin chu kamunuma latamanin. Wa xlakata, judíos malakgachakgo makgapitsi sacerdotes chu levitas xlakata nakgalhskinkgo: «¿Tiku wix?».

Juan wan: Akit ni Cristo

¿Tiku wix? ¿Wix Elías?

Ni, ni chuna.

Kgalhskinkgo: ¿Wix palakachuwina?, chuna wanikgo xlakata lakapastakmakgo palakachuwina nema Moisés xwanit pi xʼama min (Deuteronomio 18:15, 18).

Juan wa: ¡Ni!

Pero xlakan waniparakgo: «¿Tiku wix? Kakilawaniw xlakata tlan nakkakgalhtiyaw tiku kinkamalakgachanitan. ¿Tuku wana mimpalakata?». Juan kgalhtinan: «Akit wa tiku pixlanka wan kxakaskakni tiyat: “Kamakaxtupitit xtiji Jehová”, chuna la wa palakachuwina Isaías» (Juan 1:19-23).

Xlakan lu katsiputunkgo chu wanikgo: «¿Tuku xlakata mununana komo ni Cristo wix, nipara Elías, nipara Palakachuwina?». Juan kalikgalhti tuku lu xlakaskinka: «Akit kmununan kchuchut. Ya chatum kmilakgstipankan tiku wixin ni lakgapasatit, tiku aku mima, ni kiminini nakxkutni xcorrea xtatunu» (Juan 1:25-27).

Uma tachuwin limasiya pi Juan katsi pi xlilakkaxtlawat tiji, uma wamputun nakamakgtaya latamanin xlakata namakgamakglhtinankgo Mesías nema wankanit pi namin, tiku Mapakgsina nawan. Juan wan xpalakata Mesías: «Tiku aku mima tlakg tliwakga nixawa akit, chu ni kiminini nakmatuxtu xtatunu» (Mateo 3:11). Chu wampara: «Tiku aku mima, kimpulaninit xlakata lama lata akxni akit nina xaklama» (Juan 1:15).

Xlikana, xtamakatsin Juan: «Kamakgxtakgtit mintalakgalhinkan, xlakata Tamapakgsin xalak akgapun talakatsuwinit», lu xlakaskinka, xlakata makatsininan pi ama tsuku xtaskujut Jesús, tiku Mapakgsina ama litaxtu (Mateo 3:2).