¿Tuku tlawaya akxni wi tuku makgapekuanan?... Max skiniya mintse o mintlat kamakgtayan. Pero wi atanu tiku na tlan namakgtayanan. Xla tlakg tliwakga nixawa amakgapitsin. ¿Katsiya tiku?... Xlikana, wa Jehová, putum kilhtamaku tlan naskiniya kamakgtayan. Chuna tlawalh David. Xlakata xlipawan Jehová nitu xlipekuan. Uma kgawasa talichuwinan kBiblia.

Akxni David skgataku xwanit, xnatlatni masiyanikgolh napaxki Jehová. Wa xlakata ni xpekuan. Maski titaxtulh tuku lu lipekua. David xkatsi pi Jehová xʼamigo xwanit chu tlan xmakgtayalh. Akgtum kilhtamaku, akxni xkuentajtlawama xborregos ¡milh tantum lanka león chu chipalh tantum borrego! ¿Katsiya tuku tlawalh David? ¡Stalanilh león chu max xmakan limakgnilh! Chu alistalh akxni tantum oso na xwaputun xborregos, David na makgnilh. ¿Tiku makgtayalh David ni napekuan?... Chuna, wa Jehová.

Atanu kilhtamaku David na limasiyalh pi ni xpekuan. Israelitas xtatlawamakgolh guerra latamanin nema xkawanikan filisteos. Chatum soldado filisteo lu lanka xwanit, chalhman, xwanikan Goliat, ¡lu lanka chixku! Xkalikgalhkgamanama soldados xalak Israel chu Jehová. Xkawani: «Tiku kintalachipaputun». Pero putum israelitas xpekuanikgo chu ni xtalachipaputunkgo. Akxni David kgaxmatli tuku Goliat wa, wanilh: «¡Akit naktalachipayan! ¡Jehová nakimakgtaya, chu naktlajayan!». ¿Lakpuwana wix pi David ni xpekuan?... Chuna, ni xpekuan. ¿Chu tuku lalh alistalh?

David tiyalh xlixkgontalatni chu akgkitsis makslipinki chiwix, chu alh talachipa lanka chixku. Akxni Goliat akxilhli pi lu kgawasaku xwanit, tsukulh likgalhkgamanan. Pero David wanilh: «Wix kililakgtampat akgtum espada, ¡pero akit klakgaman kxtukuwani Jehová!». Alistalh wililh chiwix kxlixkgontalatni, lakapala lakgalh Goliat chu talalh. Chiwix laktanulh kxitat kxmun Goliat ¡chu uma lanka chixku lakalh  chu nilh! Akxni filisteos akxilhkgolh tuku lalh, pekuankgolh chu tsalakgolh. Chatum kgawasa la David tlajalh uma lanka chixku. ¿Tuku xlakata?... Xlakata Jehová makgtayalh, ¡chu xla tlakg tliwakga nixawa chatum lanka chixku!

¿Tuku kinkamasiyaniyan tuku titaxtulh David?... Pi ni anan achatum tlakg tliwakga la Jehová. Wa xlakata akxni wi tuku namakgapekuanan kalakapastakti pi Jehová mi amigo chu tlan namakgtayayan ni napekuana.