¿Tuwa makgkatsiya nakakgalhakgaxmata mintlat chu mintse?... Min kilhtamaku tuwa. ¿Pero katsiya tuku namakgtayayan nakakgalhakgaxmata? Kuenta natlawaya xliʼakxilhtit Jesús. ¿Katsiya pi Jesús putum kilhtamaku kgalhakgaxmatli Jehová chu xnatlatni?... Tlakg kakatsiw xlakata Jesús.

Akxni Jesús nina xmin kKatiyatni, xtawi xTlat, Jehová, kʼakgapun. Pero akxni latamalh kKatiyatni Jesús na kgalhilh xnatlatni. Xkawanikan José chu María. ¿Katsiputuna la xnatlatni litaxtukgolh?...

Jehová tiyalh xlatamat Jesús anta kʼakgapun chu wililh kxpan María chuna lakachilh Jesús chu latamalh kKatiyatni. ¡Uma akgtum milagro! Jesús stakli kxpan María chuna la amakgapitsin lakgskgatan stakkgo kxpankan xtsekan. Akxni takgatsilh akgnajatsa papaʼ Jesús lakachilh. Chuna María chu José litaxtukgolh xnatlatni Jesús unu kkatiyatni.

Akxni Jesús xkgalhi 12 kata, wi tuku tlawalh nema limasiyalh la xlilhuwa xpaxki xTlat xalak akgapun, Jehová. Chuna lalh akxni Jesús chu xfamilia makgat ankgolh kJerusalén xlakata nakakninankgo Jehová. Chu akxni xtaspitmakgolh, José chu María akxilhkgolh pi Jesús ni xkatamima. ¡Niniku xtekgskgo Jesús! ¿Tuku tlawakgolh José chu María?...

José chu María lakapala taspitkgolh kJerusalén chu lakaxtum putsakgolh Jesús. Akgtutu kilhtamaku putsakgolh, pero nila xtekgskgo. ¡Lu xpekuankgonit! Pero alistalh tekgskgolh. ¿Katsiya niku xwi?... Xwi ktemplo. ¿Katsiyaw tuku xlakata? Xlakata anta tlakg xlakgapasli Jehová. Jesús lu xpaxki xTlat chu lu xmakgapaxuwaputun. Akxni Jesús stakli chuntiyaku kgalhakgaxmatli Jehová. Putum kilhtamaku kgalhakgaxmatli, asta akxni lu tuwa makgkatsilh xlakata latamanin nitlan likatsinikgolh. ¿Na kakgalhakgaxmatli Jesús, José chu María?... Biblia wan pi kakgalhakgaxmatnilh.

¿Akxilhti pi Jesús putum kilhtamaku kgalhakgaxmatninalh?... Uma wi tuku lu xlakaskinka kinkamasiyaniyan: pi maski min kilhtamaku tuwa namakgkatsiya nakakgalhakgaxmata minatlatni chuna militlawat. ¿Chuna natlawaya?...