¿Xlakgati xʼakxilhti tuku tilalh makgasa? Kalakpuwanti pi lapat kkachikin Jericó, uma kachikin wi kxtiyat Canaán. Anta latamanin ni kanajlanikgo Jehová. Pero anta lama chatum puskat tiku tanu likatsi, wanikan Rahab.

Akxni Rahab aktsujku xwanit, xkgaxmatnit xlakata Jehová. Kgaxmatli la Jehová kamakgtayalh Israel natlajakgo tiku ni xkaʼakxilhputunkgo. Akgtum liʼakxilhtit, la Jehová limaklakaskilh Moisés xlakata xkamaxtulh kʼEgipto. ¡Asta la xmapitsinit xaSpinini pupunu xlakata israelitas tlan xpatakutkgolh! ¡La uku Rahab kgaxmatnit pi israelitas lakatsu kJericó wilakgo!

Akgtum katsisni, chatiy israelitas tsekg ankgo skgalakgo Jericó. Xlakan ankgo xchik Rahab chu xla kawani katamakgxtakgkgolh. Katsisni, mapakgsina xla Jericó kgaxmata pi tanukgonit skgalananin kkachikin chu katsi pi wilakgolh kxchik Rahab. Wa xlakata mapakgsina kamalakgacha kskujnin anta. ¿Tuku tlawa Rahab? Kamatsekga chatiy skgalananin xakgstin kxchik chu kawani kskujnin mapakgsina: «Skgalananin taxtukgonita kkachikin. Pero komo nakastalaniyatit la uku, tlan nakachipayatit». ¡Chuna Rahab kamakgtaya israelitas! ¿Katsiya tuku xlakata kamakgtayalh?... Xlakata kanajlani Jehová. Chu katsi pi xʼama kamaxki israelitas Jericó chu xtiyat Canaán.

Akxni israelitas nina xtaxtukgo kxchik Rahab, wanikgolh pi xla chu xfamilia xʼama lakgtaxtukgo akxni Dios xmasputulh Jericó. Pero wi tuku xlitlawat xlakata nalakgtaxtu. ¿Katsiya tuku?... Xlakan wanikgolh: «Kawili uma xaspinini tasiw kmiventana chu kamamakxtumi putum mi familia kminchik». Rahab tlawa chuna la wanikgo skgalananin. ¿Katsiputuna tuku lalh alistalh?...

Ni lhuwa kilhtamaku alistalh, israelitas tlawankgolh xlimakgstili Jericó. Akgchaxan kilhtamaku kaj makgtum tlawankgolh xlimakgstilili kachikin, chu nitu wankgolh. Pero xliʼakgtujun kilhtamaku, makgtujun tlawankgolh xlimakgstilili kachikin chu pixlanka katasakgolh. Kaj xalan wi tuku la, nema nila takanajla: ¡Jehová tlawalh  pi xtatilhkgolh xpatsaps Jericó! Pero ¿tuku akgspula xchik Rahab? Xlakata kgalhi xaspinini tasiw ni tatilhli. ¿Akxilha xaspinini tasiw kdibujo?... ¡Rahab chu xfamilia lakgtaxtukgolh!

¿Akxilhti pi Rahab lakgtaxtulh xlakata kgalhakgaxmatli Jehová?... Rahab xkatsi pi Jehová xʼama kuentajtlawa wa xlakata lipawa. Akxni wanika putum tuku Dios xtlawanit, tsukulh lipawan. Wix na lhuwa katsinipat xlakata tuku tlawanit Jehová. ¿Na lipawana Jehová la tlawalh Rahab?... ¡Katsiyaw pi nalipawana!