¿MAKGKATSIYA la Linda, tiku lu xlipuwan xlakata tuku tlawanikgolh tiku na kanajlakgo la xla? Lu nitlan pero makgapitsi nitlan limakgkatsikgo xlakata xtayatkan amakgapitsin chu tlawa pi nialh naskujnanikgo Dios. ¿Nachuna akgspulanitan?

Xlikana, max tuwa namakgkatsiyaw natapatiyaw chatum tala tiku kinkatlawaninitan tuku nitlan. Pero kstalaninanin Cristo talakaskin nalapaxkikgo (Juan 13:34, 35). Akxni tiku na kanajla la akinin kinkatlawaniyan tuku nitlan, lu katsan chu lu nitlan litamakgkatsi (Salmo 55:12).

Xlikana, Biblia wan pi min kilhtamaku chatum kstalanina Cristo «natlawani[...] wantu nitlan» achatum (Colosenses 3:13, Hua Xasasti Talaccaxlan, 1999). Pero akxni chuna kinkaʼakgspulayan max tuwa namakgkatsiyaw natayaniyaw. ¿Wi tuku tlan nakinkamakgtayayan? Kaʼakxilhwi pulaktutu tastakyaw xalak Biblia:

KinTlatkan xalak akgapun putum akxilhma. Jehová akxilhma putum tuku lama, asta putum tuku nitlan kinkatlawanikanan chu tapatin nema titaxtuyaw (Hebreos 4:13). Pero Jehová nitlan limakgkatsi akxni wi tuku lipatinanaw (Isaías 63:9). Xla nikxni katimastalh talakaskin pi «ntakatsanajwa», taputsastalanit o atanu, nipara achatum xlakskujnin, natlawa pi «nakinkama[...]panuyan kxtapaxkit Dios» (Romanos 8:35, 38, 39). ¿Ni kinkamalakpuwaniyan nachuna natlawayaw la Jehová, chu ni namastayaw talakaskin pi nituku chu nitiku natlawa pi natamakgatliniyaw?

Tapatinankan ni wamputun pi nitu tlawanika. Akxni katapatiyaw tiku kinkatlawanikgon tuku nitlan, ni wamputun pi nitu kinkatlawanikan o tlan tuku tlawakgolh. Kalakapastakti pi Jehová putum kilhtamaku nitlan akxilha talakgalhin, pero tapatinan komo akxilha pi xlilat chuna natlawa (Salmo 103:12, 13; Habacuc 1:13). Akxni xla kinkawaniyan pi kakatapatiw amakgapitsin, kinkaskiniman na kalikatsiw la xla. Jehová ni «kinkasitsiniyan [putum] kilhtamaku» (Salmo 103:9; Mateo 6:14).

Tlan kinkakitaxtuniyan akxni tapatinanaw. ¿Tuku xlakata? Kalilakpuwanti uma. Wix tamakgxpastonkgnita chu chipanita akgtum chiwix nema ni lu tsinka. Max nituku katimakgkatsi komo kaj tsinu kilhtamaku nachaxa. ¿Pero tuku nala komo nachaxa tlakg lhuwa kilhtamaku? ¿La xlimakgas natayaniya, kaj puntsu, akgtum hora, o tlakg lhuwa kilhtamaku? Xlikana pi natsukuya makxpakatsana. Ni talakgpalima la xlitsinka chiwix. Pero xlakata tlakg lhuwa kilhtamaku titaxtunit lata chipanita chiwix, uma natlawa pi tlakg tsinka namakgkatsiya. Nachuna la akxni ni tapatinanaw. Maski ni lu sitsinitaw,  chuna la xlimakgas natitaxtu kilhtamaku tlakg kinkatlawaniyan tuku nitlan. Wa xlakata Jehová kinkawaniyan pi katapatinaw. Chu tlan kinkakitaxtuniyan akxni tapatinanaw (Proverbios 11:17).

¿Tuku makgtayalh Linda xlakata nialh ksitsilh, maski nitlan tuku xtlawaninit tiku na xkanajla la xla? Pulaktum tuku tlawalh, wa pi lilakpuwa textos xalak Biblia niku wan tuku xlakata natapatinanaw (Salmo 130:3, 4). Linda lu makgtayalh natapatinan akxni katsilh pi akxni tapatinanaw, Jehová na kinkatapatiyan (Efesios 4:32–5:2). Akxni lilakapastaka la nitlan xlimakgkatsi uma, wan: «Kmakgkatsilh pi Jehová xkintachuwinama».

Titaxtulh kilhtamaku, Linda nialh sitsinilh tala. Xliputum xnaku tapatilh chu la uku lu tlan latalalinkgo. Linda tsukupa skujnani Jehová. Liwana kakatsi pi Jehová makgtayaputunan nachuna natlawaya.