TAKGALHTAWAKGA 05
Biblia wi tuku kinkamakatsiniyan
Jehová kinkamaxkinitan akgtum lu tlan tamaskiwin: 66 libros nema litakgatsi Biblia. Pero max nakgalhskinkana: «¿Niku mincha Biblia? ¿Tiku matlawinalh?». Xlakata nakgalhtiyaw umakgolh takgalhskinin, kaʼakxilhwi la kinkalakgchinitan Biblia.
1. Komo lakchixkuwin tsokgwilikgolh Biblia, ¿tuku xlakata wanaw pi xTachuwin Dios?
Tipuxam lakchixkuwin tiku tanu tanu xtaskujutkan xkgalhikgo, tsokgwilikgolh Biblia. Tsukuka tsokgwilikan kkata 1513 akxni nina xmin Jesús chu masputuka kkata 98 akxni xminita Jesús. Wa xlakata, max 1,600 kata litsokgwilikgoka. Maski chuna, putuminika Biblia watiya tuku lichuwinan. ¿Tuku xlakata? Xlakata wa Dios matsokgninalh (kalikgalhtawakga 1 Tesalonicenses 2:13). Umakgolh lakchixkuwin ni wa wilikgolh xtalakapastaknikan, wata «palakachuwinankgolh Dios akxni kapulalilh xʼespíritu santo» a (2 Pedro 1:21). Dios maklakaskilh xʼespíritu santo xlakata xtlawalh pi umakgolh lakchixkuwin xtsokgwilikgolh xtalakapastakni (2 Timoteo 3:16).
2. ¿Tiku tlan nakgalhi maktum Biblia?
Putum latamanin «xliputum laklanka kachikinin, laklanka familias, tiku chuwinankgo tipalhuwa tachuwin chu kachikinin», tlan nalitamakgtayakgo tamakatsinin nema min kBiblia (kalikgalhtawakga Apocalipsis 14:6). Dios tlawanit pi namatitaxtikan ktipalhuwa tachuwin. Wa uma libro nema tlakg matitaxtikanit ktanu tanu tachuwin. Atsinu ni putum latamanin tlan nakatsinikgo tuku wan Biblia, maski tanu tanu xtachuwinkan o xkachikinkan.
3. ¿Tuku tlawalh Jehová xlakata ni xmasputuka Biblia?
Akxni tsokgwilika Biblia, maklakaskinka tuku lakapala xlakxla, la kxuwa animales chu papiro. Pero lakchixkuwin tiku xpaxkikgo Biblia, kamakan tsokgxtukgolh umakgolh tatsokgni. Maski lhuwa latamanin tiku xkgalhikgo limapakgsin xmalakgsputuputunkgo Biblia, na xwilakgo amakgapitsi tiku asta kalimakgnika xlakata nitu xtlawanika Biblia. Jehová ni mastanit talakaskin pi nipara chatum lataman o atanu, natlawa pi nila nakinkatachuwinanan. Biblia wan: «Xtachuwin kiDioskan putum kilhtamaku namakgapala» (Isaías 40:8).
TLAKG KALAKPUTSANANIW
Tlakg kakatsiw tuku tlawalh Dios xlakata makgapitsi lakchixkuwin xtsokgwilikgolh Biblia. Na kaʼakxilhwi tuku tlawanit Dios xlakata ni namalakgsputukan Biblia chu xlakata latamanin nakgalhikgo.
4. Biblia kinkawaniyan tiku matsokgninalh
Kaʼakxilhtit VIDEO. Alistalh kalikgalhtawakgatit 2 Timoteo 3:16, chu kalichuwinantit uma:
-
¿Tuku xlakata wankan pi Biblia xTachuwin Dios komo kaj lakchixkuwin tsokgwilikgolh?
-
¿Xlilat nakanajlayaw pi Dios kamalakpuwanilh lakchixkuwin xlakata natsokgwilikgo xTachuwin? ¿Tuku xlakata chuna lakpuwana?
Secretario tsokgwili carta, pero tamakatsinin wa xla xmalana, xlakata wa wanima tuku natsokgwili. Nachuna tlawaka Biblia: lakchixkuwin tsokgwilikgolh, pero tamakatsinin wa xla Dios.
5. Biblia wi asta la uku maski xmalakgsputuputunkan
Komo Biblia wa xTachuwin Dios, xla xlikuentajtlawat. Lata makgasa, lhuwa mapakgsinanin xmalakgsputuputunkgo Biblia, lhuwa xpulalinanin takanajla na ni xlakaskinkgo pi xlikgalhtawakgaka. Pero maski lhuwa tiku ni xlakaskinkgo, na xwilakgo tiku ni xpekuankgo chu kuentajtlawakgolh Biblia maski kalimakgnika. Xlakata nalakgapasatit chatum tiku chuna tlawalh, kaʼakxilhtit VIDEO chu kalichuwinantit uma:
-
Xlakata katsipat pi lhuwa latamanin kalimakgnika xpalakata Biblia, ¿lakpuwana pi xlakaskinka nalikgalhtawakgayaw? ¿Tuku xlakata chuna lakpuwana?
Kalikgalhtawakgatit Salmo 119:97 chu kalichuwinantit uma:
-
¿Tuku xlakata lhuwa latamanin ni pekuankgolh maski xkalimakgnika kaj xlakata xmatitaxtikgolh Biblia kʼatanu tachuwin chu xmalakgatumikgolh?
6. Maktum libro nema tlan nakgalhikgo putum latamanin
Biblia wa libro nema tlakg matitaxtikanit kʼatanu tachuwin chu tlakg makgpitsikanit nixawa atanu libro. Kalikgalhtawakgatit Hechos 10:34, 35 chu kalichuwinantit uma:
-
¿Tuku xlakata Dios lakaskin pi kamatitaxtika Biblia ktipalhuwa tachuwin chu kamalakgatumika klakalhuwa kachikinin?
-
Xliputum tuku katsininitaw kʼuma takgalhtawakga xlakata Biblia, ¿tuku tlakg lakgatiya?
Atsinu ni kgatsi
100%
latamanin kxlikalanka katiyatni
tlan likgalhtawakgakgo Biblia ktachuwin nema akgatekgskgo
Wi kliwaka
3,000
tanu tanu tachuwin
xamaktuminika o ni xamaktuminika
5,000 millones
Xlilhuwa la imprimirlikanit Biblia.
Wa libro nema tlakg imprimirlikanit nixawa atanu libro
MAKGAPITSIN WANKGO: «Biblia kaj maktum xamakgan libro nema kaj lakchixkuwin tsokgwilikgolh».
-
¿Tuku lakpuwana wix?
-
¿Tuku limasiya pi Biblia xTachuwin Dios?
TUKU KATSINIW
Biblia wa xTachuwin Dios chu Dios lhuwa tuku tlawanit xlakata putum latamanin nakgalhikgo Biblia.
¿Tuku xkgalhtinanti?
-
¿Tuku kilhchanima pi Dios kamalakpuwanilh lakchixkuwin xlakata xtsokgwilikgolh Biblia?
-
¿Tuku tlakg lakgatiya xlakata la matitaxtikanit Biblia kʼatanu tachuwin chu malakgatumikanit maski xmalakgsputuputunkan?
-
¿La makgkatsiya akxni lilakpuwana putum tuku tlawanit Dios xlakata natachuwinanan?
TLAKG KAKATSINI
Tlakg kakatsini xlakata Biblia, lata akxni xapulana tsokgwilika asta la matitaxtikanit ktanu tanu tachuwin kkinkilhtamakujkan.
“Cómo nos llegó la Biblia” (¡Despertad!, xla noviembre kata 2007)
Kalikgalhtawakga chu kaʼakxilhti pulaktutu tuku xlaktlawaputun Biblia.
“La Biblia. Una historia de supervivencia” (La Atalaya núm. 4 kata 2016)
Kaʼakxilhti tuku titaxtukgolh makgapitsi latamanin xlakata tlan xmatitaxtikgolh Biblia kʼatanu tachuwin.
Xlakata anan lhuwa copias xla Biblia chu matitaxtikanit ktipalhuwa tachuwin, ¿la nakatsiya pi ni talakgpalinit xtamakatsinin Dios?
a Espíritu santo wa xlimakgatliwakga Dios, chuna la talichuwinan ktakgalhtawakga 07.
Max na nalakgatiya uma
TAKGALHSKININ NEMA TLAKG TLAWAKAN
¿La kmakgalhtawakgenanaw?
Ktakgalhtawakga nema mastakgo xtatayananin Jehová, wix tlan namaklakaskina Biblia nema kgalhiya. Na tlan natawilakgo mifamilia chu mi amigos akxni namakgalhtawakgekana.
