TAKGALHTAWAKGA 07
¿La likatsi Dios?
Akxni lilakpuwana Jehová, ¿la lakpuwana pi tasiya? ¿Lakpuwana pi lanka xlakatsukut, pero lu makgat kinkawilanin chuna la akgtum staku nema lu makgat wilacha? O ¿lakpuwana pi Dios chatum tiku kgalhi lhuwa litliwakga la akgtum tliwakga unisen, pero ni paxkinan? ¿Tuku nakinkamakgtayayan xlakata nakatsiyaw la likatsi Jehová? Anta kxTachuwin, Biblia, Jehová kinkamasiyaniyan makgapitsi tayat nema xla kgalhi. Chu na lichuwinan pi xla kinkalilakgaputsayan.
1. ¿Tuku xlakata nila akxilhaw Dios?
«Dios chatum espíritu» (Juan 4:24). Jehová ni kgalhi xmakni chuna la akinin. Xla chatum espíritu nema lama kʼakgapun, anta niku na nila lakachanaw.
2. ¿Tuku tayat kgalhi Jehová?
Maski nila akxilhaw Jehová, akxni lakgapasaw, paxkiyaw xlakata katsiyaw pi xlikana lama chu kgalhi lu laktlan tayat. Biblia wan: «Jehová paxki tuku xaʼakgstitum chu ni katikamakgxtakgli tiku ni makgxtakgkgo» (Salmo 37:28). Nachuna, lu kapaxki chu kalakgalhaman latamanin, liwaka tiku patinamakgo (Santiago 5:11). «Jehová lakatsu katawi tiku lu lipuwamakgolh; chu kalakgmaxtu tiku makgkatsikgo pi katlajama xtaʼakglhuwitkan» (Salmo 34:18). ¿Chu xkatsiya pi tuku tlawayaw tlan namakgalipuwan o namakgapaxuwa Jehová? Tiku tlawa tuku nitlan lu makgalipuwan chu nitlan mamakgkatsini (Salmo 78:40, 41). Pero tiku tlawa tuku tlan lu makgapaxuwa (kalikgalhtawakga Proverbios 27:11).
3. ¿La limasiya Jehová pi kinkapaxkiyan?
Tayat nema tlakg xlakaskinka kgalhi Jehová wa tapaxkit. Asta Biblia wan pi «Dios tapaxkit» (1 Juan 4:8). Jehová kinkalimasiyaniyan xtapaxkit xlakata kinkamaxkin Biblia chu xlakata lhuwa tuku malakatsukilh (kalikgalhtawakga Hechos 14:17). Kalilakpuwanti la kinkatlawan, tlan akxilhaw lhuwa colores, kgaxmataw tatlakgni chu tlan kgalhwananaw tipalhuwa lakgkgama liwat. Xla lakaskin pi kalipaxuwaw latamat.
TLAKG KALAKPUTSANANIW
Kaʼakxilhwi tuku maklakaskin Jehová akxni wi tuku tlawa. Chu alistalh naʼakxilhaw la limasiya xalaktlan xtayat.
4. Espíritu santo: xlitliwakga Dios nema maklakaskin
Akinin maklakaskinaw kimakankan xlakata naskujaw, pero Jehová maklakaskin xʼespíritu santo. Biblia ni wan pi espíritu santo chatum Dios, wata wan pi wa litliwakga nema Dios maklakaskin akxni wi tuku tlawa. Kalikgalhtawakgatit Lucas 11:13 chu Hechos 2:17 chu kalichuwinantit uma:
-
Dios nakamaxki xʼespíritu santo tiku naskinikgo. Wa xlakata, ¿lakpuwana pi espíritu santo chatum Dios, o wa xlitliwakga Dios nema maklakaskin akxni wi tuku tlawa? ¿Tuku xlakata chuna lakpuwana?
Jehová maklakaskin xlitliwakga xlakata lhuwa tuku natlawa. Kalikgalhtawakgatit Salmo 33:6 chu 2 Pedro 1:20, 21 chu kalichuwinantit uma:
-
¿La maklakaskinit Jehová xʼespíritu santo?
5. Jehová kgalhi xalaktlan tayat
Maski Moisés makgasata kskujnanima Dios, xla tlakg xlakgapasputun xMalakatsukina. Wa xlakata wanilh: «Kakimasiyani mintiji xlakata tlan naklakgapasan» (Éxodo 33:13). Jehová kgalhtilh akxni litachuwinalh makgapitsi xtayat. Kalikgalhtawakgatit Éxodo 34:4-6 chu kalichuwinantit uma:
-
Akxni Jehová tachuwinalh Moisés, ¿tuku tayat litachuwinalh?
-
¿Tuku xtayat Jehová tlakg lakgatiya wix?
6. Jehová kalilakgaputsa latamanin
Xkachikin Dios xala makgasa skujnin xlitaxtukgo kʼEgipto. ¿Tuku xmakgkatsi Jehová akxni xʼakxilha pi xpatinama xkachikin? Kakgaxpattit GRABACIÓN o wixin kalikgalhtawakgatit, Éxodo 3:1-10. Alistalh kalichuwinantit umakgolh takgalhskinin:
-
¿Tuku masiyaniyan uma xlakata tuku makgkatsi Jehová akxni akxilha pi latamanin patinamakgo? (Kaʼakxilhtit versículos 7 chu 8).
-
¿Lakpuwana pi Jehová xlikana kamakgtayaputun latamanin? ¿Lakpuwana pi tlan chuna natlawa? ¿Tuku xlakata chuna lakpuwana?
7. Akxilhaw xtayat Jehová kxtamalakatsukin
Tuku tlawanit Jehová kinkamasiyaniyan la likatsi. Kaʼakxilhtit VIDEO. Alistalh kalikgalhtawakgatit Romanos 1:20 chu kalichuwinantit uma takgalhskinin.
-
Akxni wix akxilha tamalakatsukin, ¿tuku masiyaniyan xlakata Jehová?
MAKGAPITSIN WANKGO: «Dios nila lakgapaskan chu nila talakatsuwinikan».
-
¿Tuku lakpuwana wix?
-
¿Tuku xlakata chuna lakpuwana?
TUKU KATSINIW
Jehová chatum espíritu, wa xlakata nila akxilhaw. Kgalhi laktlan tayat chu tuku tlakg litalakgapasa wa tapaxkit.
¿Tuku xkgalhtinanti?
-
¿Tuku xlakata nila akxilhaw Jehová?
-
¿Tuku espíritu santo?
-
¿Tuku tayat kgalhi Jehová?
TLAKG KAKATSINI
Kalakputsanani akgtati tayat nema kgalhi Jehová, chu uma namakgtayayan tlakg nalakgapasa.
Kaʼakxilhti tuku limasiya pi Jehová ni kaxanikawa niku wi.
“¿Está Dios en todas partes? ¿Es omnipresente?” (Artículo xalak jw.org)
Kaʼakxilhti tuku xlakata Biblia wan pi espíritu santo xtachuna litaxtu la xmakan Dios.
Chatum lakgaxokgo nila xkanajla pi Dios xlilakgaputsa. Kaʼakxilhti tuku makgtayalh nalakgpali xtapuwan.
«La uku kmakgkatsi pi tlan kamakgtaya amakgapitsin» (Makatsinina, 1 xla octubre kata 2015)
Max na nalakgatiya uma
TAKGALHSKININ NEMA TLAKG TLAWAKAN
¿La kmakgalhtawakgenanaw?
Ktakgalhtawakga nema mastakgo xtatayananin Jehová, wix tlan namaklakaskina Biblia nema kgalhiya. Na tlan natawilakgo mifamilia chu mi amigos akxni namakgalhtawakgekana.
