TAKGALHTAWAKGA 09
Akxni tlawaniya oración Dios talakatsuwiniya
¿Min kilhtamaku maklakaskina pi wi tiku xpulalin kmilatamat? ¿Kgalhiya makgapitsi xlakaskinka takgalhskinin, pero ni tekgsa xatakgalhtin? ¿Maklakaskina pi wi tiku kamatliwakglhni chu tlan kamamakgkatsinin? ¿Tlakg talalipimputuna Jehová? Oración tlan namakgtayayan nakgalhiya putum uma. Pero ¿la natlawaniyaw oración Dios? ¿Kgaxmata putum oraciones? ¿Tuku tlan natlawaya xlakata Dios nakgaxmata mioraciones? Kaʼakxilhwi.
1. ¿Tiku kilitlawanitkan oración chu tuku tlan nawanaw?
Jesús masiyalh pi kajwatiya kinTlatkan xalak akgapun kilitlawanitkan oración. Asta Jesús wa Jehová xtlawani oración. Akgtum kilhtamaku xla wa: «Wixin chuna natlawayatit mioracionkan: “KinTlatkan tiku wilapi kʼakgapun...”» (Mateo 6:9). Akxni tlawaniyaw oración Jehová tlakg tlan talalinaw.
Akxni tlawayaw oración tlan nalitachuwinanaw Dios tuku lakaskinaw, pero kalakapastakwi, komo lakaskinaw pi kakgalhtilh kioracioneskan, nila skiniyaw tuku xla ni lakgati. Biblia wan «pi tlan naskiniyaw kaxatukawa, pero chuna la xtalakaskin chu xla kinkakgaxmatniyan» (1 Juan 5:14). Jesús lichuwinalh makgapitsi tuku tlan nawanaw kkioracionkan (kalikgalhtawakga Mateo 6:9-13). Pero ni kajwatiya nalitachuwinanaw tuku lilakgaputsayaw, na kilipaxtikatsinitkan xlakata tuku tlawanit kimpalakatakan chu naskiniyaw pi kakamakgtayalh amakgapitsi latamanin.
2. ¿La natlawayaw oración?
Biblia wan: «Kawanitit Dios putum tuku lilakgaputsa minakujkan» (Salmo 62:8). Wa xlakata akxni tlawayaw kioracionkan, kawaniw Dios tuku xlikana makgkatsiyaw, tuku wi kkinakujkan. Tlan pixlanka o pixtsu natlawayaw kioracionkan, tlan natayayaw o kaj natawilayaw, tuku tlakg xlakaskinka wa pi nalimasiyaniyaw kakni Jehová. Na tlan natlawayaw kioracionkan kaxatukawa kilhtamaku chu kaxanikawa niku lamaw.
3. ¿La kgalhti Dios kioracioneskan?
Tipalhuwa la kinkakgalhtiyan. Min kilhtamaku maklakaskin xTachuwin, Biblia, xlakata nakinkakgalhtiyan kintakgalhskininkan. Komo nalikgalhtawakgayaw xTachuwin Dios, skgalala nakinkatlawayan (Salmo 19:7; kalikgalhtawakga Santiago 1:5). Chu akxni nakgalhiyaw taʼakglhuwit, Jehová tlan nakinkamakgtayayan nakgalhiyaw takaksni. Nachuna, kamaklakaskin kskujnin xlakata nakinkamakgtayayan akxni maklakaskinaw.
TLAKG KALAKPUTSANANIW
Kaʼakxilhwi la tlan natlawayaw oraciones nema lakgati Dios. Chu na kaʼakxilhwi la oración tlan nakinkamakgtayayan.
4. Dios kinkawaniyan la natlawaniyaw oración
¿La kilitlawatkan oración xlakata Dios nakgaxmata? Kaʼakxilhtit VIDEO.
Jehová lakaskin pi kajwatiya xla natlawaniyaw oración. Kalikgalhtawakgatit Salmo 65:2 chu kalichuwinantit uma:
-
¿Kanajlaya pi Dios tiku «kgaxmata oración» lakaskin pi wix katlawani oración? ¿Tuku xlakata chuna lakpuwana?
Komo lakaskinaw pi Dios nakgaxmata kioracioneskan, talakaskin nalatamayaw chuna la xla lakgati. Kalikgalhtawakgatit Miqueas 3:4 chu 1 Pedro 3:12 chu kalichuwinantit uma:
-
¿Tuku kilitlawatkan xlakata Dios nakgaxmata kioracionkan?
Max soldados xalak tanu tanu kachikinin, naskinikgo Dios pi kakamakgtayalh natlajanankgo kʼguerra. ¿Pero lakpuwana wix pi Dios nakgalhti umakgolh oraciones?
5. Nawaniyaw Dios tuku wi kinakujkan
Lhuwa latamanin kamasiyanikanit pi nakatsinikgo makgapitsi tachuwin chu watiya watiya nawankgo kxʼoracionkan. ¿Pero lakgati Dios umakgolh oraciones? Kalikgalhtawakgatit Mateo 6:7 chu kalichuwinantit uma:
-
¿Tuku tlan natlawayaw xlakata ni «watiya watiya tachuwin» nawanaw kkioracionkan?
Chali chali kalilakpuwanti pulaktum tuku tlan kitaxtuninitan kmilatamat chu alistalh kapaxtikatsini Jehová. Komo chuna natlawaya, akxni natitaxtu akgtum semana naʼakxilha pi pulaktujun tuku litachuwinanitata Jehová chu ni talakaskinit watiya watiya nawaniya.
Chatum xapaxkina tlat lakaskin pi xkgawasa kawanilh tuku xlikana makgkatsi chu tuku wi kxnaku. Jehová na lakaskin pi akxni natlawaniyaw oración, nawaniyaw tuku wi kkinakujkan.
6. Oración akgtum tamaskiwin nema kinkamaxkinitan Dios
¿La kinkamakgtayayan oración nakgalhiyaw litliwakga, liwaka akxni titaxtumaw tuku tuwa? Kaʼakxilhtit VIDEO.
Biblia kinkawaniyan pi oración tlan nakinkamakgtayayan nakgalhiyaw takaksni chu ni lu nalakgaputsayaw. Kalikgalhtawakgatit Filipenses 4:6, 7 chu kalichuwinantit uma:
-
¿La kinkamakgtayayan oración maski ni mapanu putum kintaʼakglhuwitkan?
-
¿Tuku litachuwinamputuna Dios kmioración?
¿Xkatsiyata?
Tachuwin amén kilhchanima «chuna kalalh» o «xlikana». Biblia lichuwinan pi lata makgasa, xwankan «amén» akxni xmakgalhsputukan oración (1 Crónicas 16:36).
7. Kalimaxtu kilhtamaku xlakata natlawaya oración
Min kilhtamaku lu lhuwa taskujut kgalhiyaw chu ni lakapastakaw natlawayaw oración. ¿La xlilakaskinka xʼakxilha Jesús oración? Kalikgalhtawakgatit Mateo 14:23 chu Marcos 1:35 chu kalichuwinantit uma:
-
¿Tuku xtlawa Jesús xlakata xlimaxtulh kilhtamaku natlawa oración?
-
Chu wix, ¿tuku tlan xtlawa xlakata xlimaxtu kilhtamaku natlawaya oración?
MAKGAPITSIN WANKGO: «Dios ni lakapala kgalhti oraciones».
-
¿Tuku lakpuwana wix?
TUKU KATSINIW
Akxni tlawayaw oración chu waniyaw Dios tuku wi kkinakujkan, kinkamakgtayayan tlakg tlan natalalinaw. Na kinkamaxkiyan takaksni chu kinkamaxkiyan litliwakga xlakata tlan natlawayaw tuku Jehová lakaskin pi katlawaw.
¿Tuku xkgalhtinanti?
-
¿Tiku kilitlawanitkan oración?
-
¿La kilitlawatkan oración?
-
¿La kinkamakgtayayan oración?
TLAKG KAKATSINI
Kaʼakxilhti xatakgalhtin makgapitsi takgalhskinin xpalakata oración.
«Pulaktujun takgalhskinin xlakata oración» (Makatsinina, 1 xla noviembre kata 2010)
Kaʼakxilhti tuku xlakata lu xlakaskinka natlawaya mioración chu la tlakg tlan natlawaya.
Kaʼakxilhti tuku masiya Biblia xlakata tiku natlawaniyaw oración.
«¿Xlilat nakatlawaniyaw oración santos?» (Artículo xalak jw.org)
Kaʼakxilhti uma video nema masiya niku tlan natlawayaw oración chu tuku kilhtamaku.
Max na nalakgatiya uma
TAKGALHSKININ NEMA TLAKG TLAWAKAN
¿La kmakgalhtawakgenanaw?
Ktakgalhtawakga nema mastakgo xtatayananin Jehová, wix tlan namaklakaskina Biblia nema kgalhiya. Na tlan natawilakgo mifamilia chu mi amigos akxni namakgalhtawakgekana.
