TAKGALHTAWAKGA 10
¿Tuku xlakata lu xlakaskinka napina kxtamakxtumitkan xtatayananin Jehová?
¿Minit kilhtamaku wanikanita pi kakatatamakxtumi xtatayananin Jehová? Komo nikxni pinita max pekuana tsinu akxni lilakpuwana pi xlimakgtumku napina. Max akstu nakgalhskinkana: «¿Tuku tlawakgo xtatayananin Jehová kxtamakxtumitkan? ¿Tuku xlakata lu xlakaskinka liʼakxilhkgo? ¿Na talakaskin nakan?». Uma takgalhtawakga namasiyaniyan pi tamakxtumit, namakgtayayan tlakg tlan natalalipina Dios chu na namakgtayayan kmilatamat.
1. ¿Tuku xlakata tamakxtumikgo xtatayananin Jehová?
Chatum tiku tsokgli Biblia lichuwinalh tuku xlakata lu xlakaskinka tamakxtumikan: «Nakmalanki Jehová niku lhuwa wilaka» (Salmo 26:12). La uku, xtatayananin Jehová na tamakxtumikgo chu uma lu kamakgapaxuwa. Xlikalanka katiyatni, akgatunu semana tamakxtumikgo xlakata nakakninanikgo Dios, nakilhtlinikgo chu natlawanikgo oración. Chu min kilhtamaku, tlakg lilhuwa tamakxtumikgo makgapitsi kilhtamaku akgatunu kata.
2. ¿Tuku nakatsiniya kkintamakxtumitkan?
Ktamakxtumit lichuwinankan tuku wan xTachuwin Dios, chu liwana kinkalitachuwinankanan tuku wamputun (kalikgalhtawakga Nehemías 8:8). Komo napina ktamakxtumit tlakg nalakgapasa Jehová chu tuku tayat kgalhi. Akxni tlakg nakatsiya pi xla lu paxkiyan, xʼamigo nalitaxtuputuna. Na nakatsiniya la Jehová namakgtayayan nakgalhiya xatapaxuwan latamat (Isaías 48:17, 18).
3. ¿La namakgtayakgoyan latamanin tiku nakalakgapasa ktamakxtumit?
Jehová kinkawaniyan pi «kalalilakgaputsaw chatunu chatunu xlakata tlakg naʼanan tapaxkit chu xalaktlan tatlaw, ni namakgxtakgaw chuna la tamakxtumiyaw» (Hebreos 10:24, 25). Kkintamakxtumitkan nakalakgapasa latamanin tiku xlikana lapaxki chu na tlakg lakgapasputunkgo Dios chuna la wix. Ktamakxtumit nakgaxpata tuku wan Biblia nema lu namatliwakglhan (kalikgalhtawakga Romanos 1:11, 12). Na tlan nakatachuwinana tanu tanu latamanin tiku paxuwakgo maski tipalhuwa taʼakglhuwit kgalhikgo. Uma kaj makgapitsi tuku tlan kitaxtu akxni anaw ktamakxtumit. Wa xlakata, Jehová lakaskin pi ankgalhin katamakxtumiw.
TLAKG KALAKPUTSANANIW
Kaʼakxilhwi la tlawakgo xtamakxtumitkan xtatayananin Jehová chu tuku xlakata nalitamakgtayaya komo napina.
4. Xtamakxtumitkan xtatayananin Jehová
Kxapulana siglo kstalaninanin Cristo xtamakxtumikgo xlakata xkakninanikgolh Jehová (Romanos 16:3-5). Kalikgalhtawakgatit Colosenses 3:16 chu kalichuwinantit uma:
-
¿Tuku xtlawakgo xapulana kstalaninanin Cristo akxni xkakninanikgo Jehová?
La uku xtatayananin Jehová na tamakxtumikgo kxPukgalhtawakgakan. Xlakata nakatsiya la tlawakgo xtamakxtumitkan, kaʼakxilhtit VIDEO. Alistalh kaʼakxilhtit akgtum dibujo niku tasiya la tamakxtumikan chu kalichuwinantit uma:
-
¿La tatalakxtumi tuku wan Colosenses 3:16 tuku tlawakan kxPukgalhtawakgakan xtatayananin Jehová?
-
Chuna la akxilhti kvideo o chuna la tasiya kdibujo, ¿tuku tlakg lakgati nema tlawakan kkintamakxtumitkan?
Kalikgalhtawakgatit 2 Corintios 9:7, chu kalichuwinantit uma:
-
¿Tuku xlakata ni pukikan tumin kxtamakxtumitkan xtatayananin Jehová?
Kawani mimakgalhtawakgena pi kamasiyanin tuku natalikgalhtawakga ktamakxtumit xla uma semana.
-
Xliputum tuku naʼakxilhkan ktamakxtumit, ¿tuku tlakg lakgati o tuku lakpuwana pi namakgtayayan?
¿Xkatsiyata?
Ksitio jw.org, tlan natekgsa tuku kilhtamaku chu niku tlawakan kintamakxtumitkan ktanu tanu kachikinin.
-
Kkintamakxtumitkan matitaxtikan taʼakgchuwin, liʼakxilhtit chu videos. Akgatunu tamakxtumit limatsukikan chu limasputukan akgtum takilhtlin chu oración.
-
Na lakgchan kilhtamaku akxni tiku wilakgo anta tlan namastakgo xtakgalhtinkan.
-
Putum latamanin tlan naminkgo: lakchixkuwin chu lakpuskatin, tiku linkgoya kata chu laktsu kamanan...
-
Kxtamakxtumitkan xtatayananin Jehová ni pukikan tumin chu ni katixokgo xlakata natanuya.
5. Kaliskujti napina ktamakxtumit
Kalilakpuwaw xfamilia Jesús. Xlakan xlamakgo kNazaret chu akgatunu kata xtlawankgo akgtutu kilhtamaku kkasipijni xlakata xʼankgolh ktemplo nema xwi kJerusalén. Kalikgalhtawakgatit Lucas 2:39-42 chu kalichuwinantit uma:
-
¿Lakpuwana pi tuwa o ni tuwa xʼankan kJerusalén?
-
Chu mimpalakata, ¿tuku max tlawa pi nila napina ktamakxtumit, pero tuku tlan natlawaya xlakata napina?
-
¿Lakpuwana pi nalitamakgtayaya komo napina ktamakxtumit maski tuwa namakgkatsiya? ¿Tuku xlakata chuna lakpuwana?
Biblia masiya pi lu xlakaskinka natamakxtumiyaw xlakata nakakninaniyaw Jehová. Kalikgalhtawakgatit Hebreos 10:24, 25 chu kalichuwinantit uma:
-
¿Tuku xlakata ankgalhin kiliʼanatkan ktamakxtumit?
MAKGAPITSIN WANKGO: «Ni talakaskin nakatatamakxtumiya amakgapitsin xlakata nakakninaniya Dios. Wa tuku xlakaskinka wa pi nalakapastaka Dios».
-
¿Tuku texto xalak Biblia masiya tuku Jehová lakaskin pi katlawaw?
TUKU KATSINIW
Komo napina ktamakxtumit, namakgtayayan tlakg nakatsiniya xlakata Jehová, tlakg tlan natalalipina chu na tlan nakatakakninaniya amakgapitsi latamanin.
¿Tuku xkgalhtinanti?
-
¿Tuku xlakata Jehová kinkawaniyan pi kaʼaw ktamakxtumit?
-
¿Tuku nakatsiniya komo napina kxtamakxtumitkan xtatayananin Jehová?
-
¿Tuku atanu tlan nakitaxtuniyan komo napina ktamakxtumit?
TLAKG KAKATSINI
¿Pekuana akxni lilakpuwana pi napina ktamakxtumit? Chatum chixku chuna xmakgkatsi, pero akxni alh lakgatilh. Kaʼakxilhti tuku xlakata.
¡Putum kilhtamaku naklakapastakaw la kinkamakgamakglhtinankan! (4:16)
Kalakgapasti chatum kgawasa tiku lu xlakgati tamakxtumit chu kaʼakxilhti tuku tlawalh xlakata chuntiya tlan xʼalh.
Kaʼakxilhti tuku lakpuwankgo amakgapitsin xpalakata tamakxtumit.
«¿Tuku xlakata kiliʼanat ktamakxtumit kPukgalhtawakga?» (Artículo xalak jw.org)
Kaʼakxilhti la chatum chixku tiku lu xaluku xwanit, tsukulh lakgpali xlatamat akxni alh kxtamakxtumitkan xtatayananin Jehová.
«Putum kilhtamaku xaktalatama pistola» (Makatsinina, 1 xla julio kata 2014)
You May Also Like
TAKGALHSKININ NEMA TLAKG TLAWAKAN
¿La kmakgalhtawakgenanaw?
Ktakgalhtawakga nema mastakgo xtatayananin Jehová, wix tlan namaklakaskina Biblia nema kgalhiya. Na tlan natawilakgo mifamilia chu mi amigos akxni namakgalhtawakgekana.
