TAKGALHTAWAKGA 16
¿Tuku tlawalh Jesús akxni xlama kKatiyatni?
Akxni latamanin lakapastakkgo Jesús, lakpuwankgo pi kaj chatum skgata nema nila tuku tlawa, chatum xaskgalala palakachuwina o chatum chixku tiku xtokgowakakanit. Pero komo tlakg nalakputsaniyaw tuku tlawalh akxni xlama unu kKatiyatni, tlakg nalakgapasaw. Kʼuma takgalhtawakga nalichuwinanaw makgapitsi tuku tlakg xlakaskinka tlawalh Jesús chu la nalitamakgtayaya tuku xla tlawalh.
1. ¿Tuku tlakg xlakaskinka taskujut tlawalh Jesús?
Tuku tlakg liskujli Jesús wa nalichuwinan «xatlan tamakatsinin xla xTamapakgsin Dios» (kalikgalhtawakga Lucas 4:43). Lichuwinalh pi Dios xʼama wili akgtum Tamapakgsin nema xʼama masputu putum taʼakglhuwit nema kgalhikgo latamanin. a Jesús lu liskujli xlakata nalichuwinan uma tamakatsinin akgtutu kata aitat (Mateo 9:35).
2. ¿Tuku limasiyalh milagros nema tlawalh Jesús?
Biblia lichuwinan pi Dios «limaklakaskilh [Jesús] xlakata natlawa milagros chu tuku kaks malakawaninan» (Hechos 2:22). Xlakata Jesús xkgalhi xlitliwakga Dios, tlan makaksalh unisen, kamawilh lhuwa latamanin, kakuchilh tatatlanin chu asta kamalakastakwanilh makgapitsi tiku xnikgonita (Mateo 8:23-27; 14:15-21; Marcos 6:56; Lucas 7:11-17). Xmilagros Jesús limasiyalh pi Dios xmalakgachanit. Nachuna, limasiyalh pi Jehová kgalhi litliwakga xlakata namasputu putum kintaʼakglhuwitkan.
3. ¿Tuku kinkamasiyaniyan chuna la latamalh Jesús?
Jesús kgalhakgaxmatli Jehová putum kilhtamaku (kalikgalhtawakga Juan 8:29). Jesús nikxni makgxtakglhli xTlat maski makgnika chu tlawalh tuku xlimakaminkanit maski lhuwa tiku ni xlakgatikgo pi chuna xtlawalh. Limasiyalh pi akinin tlan naskujnaniyaw Dios maski natitaxtuyaw tuku tuwa. Akxni chuna tlawalh, Jesús kawilinilh liʼakxilhtit kstalaninanin “xlakata liwana kstalanikgolh xtatukit” (1 Pedro 2:21).
TLAKG KALAKPUTSANANIW
Kaʼakxilhwi la Jesús xlichuwinan xatlan tamakatsinin chu xtlawa milagros.
4. Jesús lichuwinalh xatlan tamakatsinin
Jesús lu makgat tlawalh xlakata xkalitachuwinalh lhuwa latamanin xatlan tamakatsinin. Kalikgalhtawakgatit Lucas 8:1 chu kalichuwinantit uma:
-
¿Kajwatiya xkalitachuwinan Dios tiku xʼankgo kgaxmatnikgo?
-
¿Tuku tlawalh Jesús xlakata xkatekgsli latamanin?
Dios makatsininalh pi Mesías xʼama lichuwinan xatlan tamakatsinin. Kalikgalhtawakgatit Isaías 61:1, 2 chu kalichuwinantit uma:
-
¿La makgantaxtilh Jesús uma tuku xlichuwinankanit?
-
¿Lakpuwana wix pi la uku latamanin na maklakaskinkgo uma xatlan tamakatsinin?
5. Jesús masiyalh tuku lu kinkamakgtayayan
Jesús ni kajwatiya lichuwinalh xatlan tamakatsinin xla xTamapakgsin Dios, wata na masiyalh tuku lu nakinkamakgtayayan kkilatamatkan. Kaʼakxilhwi makgapitsi tuku masiyalh kxTaʼakgchuwin xalak Sipi. Kalikgalhtawakgatit Mateo 6:14, 34 chu 7:12 chu kalichuwinantit uma:
-
¿Tuku lu tlan tastakyaw lichuwinalh Jesús kʼumakgolh texto?
-
¿Lakpuwana wix pi umakgolh tastakyaw makgtayanan la uku?
6. Jesús tlawalh milagros
Jehová maxkilh Jesús litliwakga xlakata xtlawalh lhuwa milagros. Xlakata natekgsatit akgtum liʼakxilhtit, kalikgalhtawakgatit Marcos 5:25-34 o kaʼakxilhtit VIDEO. Alistalh kalichuwinantit uma:
-
Chuna la akxilhwi kvideo, ¿tuku liwana xkatsi puskat tiku xtatatla?
-
¿Tuku tlakg lakgati wix xla uma milagro?
Kalikgalhtawakgatit Juan 5:36 chu kalichuwinantit uma:
-
¿Tuku «limasiyakgo» milagros nema tlawalh Jesús?
¿Xkatsiyata?
Lhuwa tuku katsiyaw xlakata Jesús anta talichuwinan kmaktati libros xalak Biblia nema lilakgapaskan Evangelios. Tiku tsokgwilikgolh maktati Evangelios: Mateo, Marcos, Lucas chu Juan, ni watiya tuku lichuwinankgolh xlakata Jesús, pero tuku lichuwinalh chatum tatakgatsi tuku lichuwinalh achatum chu uma kinkamakgtayayan tlakg naʼakgatekgsaw la xwanit xlatamat Jesús.
-
MATEO
wa tsokgwililh xapulana libro xla Evangelios. Xlibro tlakg lichuwinan tuku masiyalh Jesús xlakata xTamapakgsin Dios.
-
MARCOS
wa tsokgwililh tlakg xaʼaktsu Evangelio. Lichuwinan tuku tlawalh Jesús nema kaks malakawaninan.
-
LUCAS
lichuwinan pi oración lu xlakaskinka chu na lichuwinan pi Jesús lu tlan kalikatsinilh lakpuskatin.
-
JUAN
tlakg lichuwinan la xlikatsi Jesús, makglhuwa lichuwinan la xkatalalin xʼamigos chu amakgapitsi latamanin.
MAKGAPITSIN WANKGO: «Jesús wa Dios tiku kgalhi putum litliwakga».
-
¿Tuku lakpuwana wix?
TUKU KATSINIW
Jesús lichuwinalh xTamapakgsin Dios, tlawalh milagros chu putum kilhtamaku kgalhakgaxmatli Jehová.
¿Tuku xkgalhtinanti?
-
¿Tuku tlakg xliskuja Jesús akxni xlama unu kKatiyatni?
-
¿Tuku limasiyalh xmilagros Jesús?
-
¿Tuku masiyalh Jesús nema lu kinkamakgtayayan?
TLAKG KAKATSINI
¿Tuku tlakg xlichuwinan Jesús?
«¿Tuku xlakata Jesús xlakaskinka akxilha xTamapakgsin Dios?» (Makatsinina, 1 xla octubre kata 2014)
Kaʼakxilhti tuku xlakata liwana katsiyaw pi milagros nema tlawalh Jesús xaxlikana.
“Los milagros de Jesús: ¿qué puede aprender de ellos?” (La Atalaya, 15 xla julio kata 2004)
Kaʼakxilhti la lakgpalilh xlatamat chatum chixku akxni katsilh pi Jesús ni xʼakstu lilakgaputsaka.
«Tlakg xlakaskinka xakakxilha kilatamat» (Makatsinina, 1 xla octubre kata 2014)
Kaʼakxilhti la latilhalh tuku tlakg xlakaskinka kxlatamat Jesús.
«Xlatamat Jesús kKatiyatni» (Tuku liputsananikan xTachuwin Dios, página 20)
a Ktakgalhtawakga 31 asta 33 tlakg lichuwinan tuku xTamapakgsin Dios.
You May Also Like
TAKGALHSKININ NEMA TLAKG TLAWAKAN
¿La kmakgalhtawakgenanaw?
Ktakgalhtawakga nema mastakgo xtatayananin Jehová, wix tlan namaklakaskina Biblia nema kgalhiya. Na tlan natawilakgo mifamilia chu mi amigos akxni namakgalhtawakgekana.
