TAKGALHTAWAKGA 17

¿La likatsi Jesús?

NAMATLAKGNIYA

¿La likatsi Jesús?

Akxni tlakg katsiniyaw tuku Jesús wa chu tlawalh akxni xlama unu kKatiyatni, tlakg katsiyaw la xlikatsi chu uma tlawa pi tlakg natalakatsuwiniyaw chu na natalakatsuwiniyaw xTlat, Jehová. ¿Tuku lu laktlan tayat kgalhi Jesús? ¿Chu tuku tlan natlawayaw xlakata na nakgalhiyaw tayat nema xla kgalhi?

1. ¿Tuku kgalhi Jesús nema na kgalhi xTlat?

Jesús latamanit kʼakgapun lhuwa millones kata, anta chuntiya akxilhma chu katsinima la likatsi xapaxkina xTlat xlakata nachuna natlawa. Wa xlakata lakapastaknan chu makgkatsi chuna la xTlat, chu tlawa tuku tlawa xTlat (kalikgalhtawakga Juan 5:19). Jesús lu liwana limasiya la likatsi xTlat, wa xlakata xla wa: «Putum tiku kiʼakxilhnit akit, na akxilhnit xaTlat» (Juan 14:9). Wa xlakata, komo wix nalakgapasa Jesús, tlakg nalakgapasa Jehová. Akgtum liʼakxilhtit, talakgalhaman nema Jesús kalimasiyanilh latamanin limasiya pi Jehová na lakgalhamanan.

2. ¿La limasiyalh Jesús pi paxki xTlat?

Jesús wa: «Xlakata kakilhtamaku nakatsi pi kpaxki xaTlat, ktlawama chuna la xaTlat kilimapakgsinit pi naktlawa» (Juan 14:31). Akxni Jesús xlama kKatiyatni, limasiyalh pi lu xpaxki xTlat xlakata putum kilhtamaku kgalhakgaxmatli asta maski lu tuwa tuku titaxtulh. Jesús na lu xlakgati xlichuwinan xTlat chu kamakgtayalh amakgapitsin xlakata xʼamigos Dios xlitaxtukgolh (Juan 14:23).

3. ¿La limasiyanit Jesús pi kapaxki latamanin?

Biblia wan pi Jesús lu “kapaxki latamanin” (Proverbios 8:31). Limasiyalh uma tapaxkit akxni kamakgtayalh chu tlan kamamakgkatsinilh latamanin, maski xkatsi pi xlakan nila xmaspitnikgolh tuku xtlawama xpalakatakan. Milagros nema tlawalh ni kajwatiya limasiyalh pi xkgalhi litliwakga, wata limasiyalh pi xlakgalhamanan (Marcos 1:40-42). Jesús lu tlan xlikatsi chu ni xlaksakpaxkinan. Xtachuwin tlan xkamamakgkatsini putum latamanin tiku tlan naku xkgalhikgo chu xkgaxmatnikgo. Nachuna, patinalh chu makamastalh xlatamat xlakata xkapaxki putum latamanin, pero tlakg kapaxki tiku tlawakgo tuku xla masiyalh (kalikgalhtawakga Juan 15:13, 14).

TLAKG KALAKPUTSANANIW

Tlakg kakatsiniw la xlikatsi Jesús chu kaʼakxilhwi la tlan nalimasiyayaw tapaxkit chu nakamakgtayayaw amakgapitsin.

4. Jesús paxki xTlat

Jesús kinkamasiyanin la tlan nalimasiyaniyaw Dios pi paxkiyaw. Kalikgalhtawakgatit Lucas 6:12 chu nachuna Juan 15:10 chu 17:26. Akxni likgalhtawakganitantita akgatunu texto kalichuwinantit uma:

¿La nalimasiyaniyaw Jehová pi paxkiyaw chuna la tlawalh Jesús?

Jesús xpaxki xTlat xalak akgapun chu putum kilhtamaku xtlawani oración

5. Jesús kalilakgaputsa tiku maklakaskinkgo tamakgtay

Jesús tlakg xkalilakgaputsa amakgapitsin chu ni xʼakstu xlilakgaputsakan. Asta akxni lu xtlakgwanit xlimaxtu xkilhtamaku chu xlitliwakga xlakata nakamakgtaya amakgapitsin. Kalikgalhtawakgatit Marcos 6:30-44 chu kalichuwinantit uma:

Chuna la wan umakgolh versículos, ¿la limasiyalh Jesús pi xkalilakgaputsa amakgapitsin? (Kaʼakxilhtit versículos 31, 34, 41 chu 42).
¿Tuku xlakata Jesús kamakgtayalh umakgolh latamanin? (Kaʼakxilhtit versículo 34).
Xlakata Jesús chuna likatsi la likatsi xTlat, ¿tuku masiyaniyan uma xlakata Jehová?
¿La nalimasiyayaw pi kalilakgaputsayaw amakgapitsin chuna la xtlawa Jesús?

6. Jesús lhuwa tuku masta

Maski Jesús ni lhuwa tuku xkgalhi, lhuwa tuku kalimakgtayalh latamanin chu xla kinkamakgpuwantiniyan nachuna natlawayaw. Kalikgalhtawakgatit Hechos 20:35 chu kalichuwinantit uma:

Chuna la wa Jesús, ¿tuku kinkamakgapaxuwayan?

Kaʼakxilhtit VIDEO chu kalichuwinantit uma:

VIDEO: «Tlakg anan tapaxuwan akxni mastakan» (kaj aktsu) (4:00)

¿La tlan wi tuku namastayaw maski ni lhuwa tuku kgalhiyaw?

¿Xkatsiyata?

Biblia masiya pi wa Jehová tiku natlawaniyaw oración chu tuku naskiniyaw naliskinaw kxtukuwani Jesús (kalikgalhtawakgatit Juan 16:23, 24). Akxni chuna tlawayaw limasiyayaw pi lu xtapalh liʼakxilhaw tuku Jesús tlawanit xlakata tlan natalalinaw Jehová.

MAKGAPITSIN WANKGO: «Latamanin patinankgo xlakata Dios kaliʼakxilha o kaliputsanani».