TAKGALHTAWAKGA 18
¿La tlan nakatsiyaw tiku xaxlikana kstalaninanin Cristo?
Lhuwa latamanin wankgo pi kstalaninanin Cristo, pero ni watiya tuku kanajlakgo chu ni putum lilatamakgo xtastakyaw Dios. Wa xlakata, ¿tuku nakinkamakgtayayan nakatsiyaw tiku xaxlikana kstalaninanin Cristo?
1. ¿Tuku wamputun xaxlikana kstalanina Cristo litaxtukan?
Kstalaninanin Cristo wa xtamakgalhtawakgen Jesucristo (kalikgalhtawakga Hechos 11:26). ¿La limasiyakgo pi xlikana stalanimakgo? Jesús wa: «Komo kgalhakgaxpatatit kintachuwin, xlikana kistalaninanin litaxtuyatit» (Juan 8:31). Uma wamputun pi xaxlikana kstalaninanin Cristo xlikgalhakgaxmatatkan tuku Jesús masiyalh. Xaxlikana kstalaninanin Cristo kBiblia kilhtiyakgo tuku masiyakgo, chuna la tlawalh Jesús (kalikgalhtawakga Lucas 24:27).
2. ¿La limasiyakgo tapaxkit xaxlikana kstalaninanin Cristo?
Jesús kawanilh xtamakgalhtawakgen tuku xlitlawatkan: «Nalapaxkiyatit minchatunukan chuna la akit kkapaxkinitan» (Juan 15:12). ¿La limasiyalh Jesús pi xkapaxki xtamakgalhtawakgen? Kalimaxtunilh kilhtamaku, kamakgpuwantinilh, kamakgtayalh chu asta mastalh xlatamat xpalakatakan (1 Juan 3:16). Chuna la tlawalh Jesús, xaxlikana kstalaninanin Cristo ni kajwatiya lichuwinankgo tapaxkit, wata limasiyakgo.
3. ¿Tuku lu liskujkgo xaxlikana kstalaninanin Cristo?
Jesús kalakgayawalh akgtum taskujut xtamakgalhtawakgen, «kamalakgachalh xlakata nalichuwinankgo xTamapakgsin Dios» (Lucas 9:2). Xapulana kstalaninanin Cristo ni kajwatiya xlichuwinankgo Dios niku xtamakxtumikgo, na xʼankgo lichuwinankgo niku xwilakgo lhuwa latamanin chu kxchikkan latamanin (kalikgalhtawakga Hechos 5:42; 17:17). La uku, xaxlikana kstalaninanin Cristo na ankgo lichuwinankgo tuku wan Biblia kaxanikawa niku wilakgo latamanin. Xlakata kapaxkikgo latamanin, xatapaxuwan maklakaskinkgo xkilhtamakujkan chu xlitliwakgakan xlakata nakalitachuwinankgo takgalhkgalhin nema masta Biblia (Marcos 12:31).
TLAKG KALAKPUTSANANIW
Kaʼakxilhwi pi xaxlikana kstalaninanin Cristo ni xtachuna la latamanin tiku ni stalanikgo xliʼakxilhtit chu xtamasiy Jesús.
4. Putsakgo tuku xaxlikana masiya Biblia
Xapulana kstalaninanin Cristo xlakaskinka xliʼakxilhkgo xTachuwin Dios
Ni putum tiku wankgo pi kstalaninanin Cristo litaxtukgo xlakaskinka liʼakxilhkgo xtamasiy Biblia. Kaʼakxilhtit VIDEO chu kalichuwinantit uma:
-
Maski makgapitsi pusikulan xwankgo pi kstalaninanin Cristo xlitaxtukgo, ¿tuku tlawakgolh xlakata ni xlakgapaska xtamasiy Jesús?
Jesús masiyalh xaxlikana nema min kxTachuwin Dios. Kalikgalhtawakgatit Juan 18:37 chu kalichuwinantit uma:
-
Chuna la wa Jesús, ¿tuku nakalilakgapasaw tiku tatayakgo tuku xaxlikana?
5. Lichuwinankgo tuku xaxlikana masiya Biblia
Xapulana kstalaninanin Cristo xlichuwinankgo Dios
Akxni Jesús nina xʼan kʼakgapun, kalakgayawalh xtamakgalhtawakgen lu xlakaskinka taskujut nema asta la uku tlawamaka. Kalikgalhtawakgatit Mateo 28:19, 20 chu Hechos 1:8 chu kalichuwinantit uma:
-
¿Asta niku xʼamaka lichuwinankan Dios chu asta tuku kilhtamaku?
6. Lilatamakgo tuku lichuwinankgo
¿Tuku xlakata Tom liwana xkatsi pi xkatekgsnit xaxlikana kstalaninanin Cristo? Kaʼakxilhtit VIDEO chu kalichuwinantit uma:
-
¿Tuku xlakata Tom lilipuwa tuku akxilhli kmakgapitsi takanajla?
-
¿Tuku xlakata la uku kanajla pi tekgsnit xaxlikana?
Tuku tlawayaw tlakg xlakaskinka nixawa tuku wanaw. Kalikgalhtawakgatit Mateo 7:21 chu kalichuwinantit uma:
-
¿Tuku tlakg xlakaskinka akxilha Jesús: tuku wanaw pi kanajlayaw, o tuku tlawayaw?
7. Lapaxkikgo
Xapulana kstalaninanin Cristo xlapaxkikgo
¿Namakamasta xlatamat chatum kstalanina Cristo xlakata nalilakgmaxtu xtala? Kaʼakxilhtit VIDEO chu kalichuwinantit uma:
-
¿Tuku xlakata tala Lloyd xmakamastaputun xlatamat xpalakata tala Johansson?
-
¿Lakpuwana wix pi tala Lloyd limasiyalh pi xaxlikana kstalanina Cristo xlitaxtu?
Kalikgalhtawakgatit Juan 13:34, 35 chu kalichuwinantit uma:
-
¿La xkalikatsinikgolh xaxlikana xtamakgalhtawakgen Jesús amakgapitsi latamanin tiku tanu xcolorkan o xkachikinkan?
-
Chu ¿la xʼamakgo makgantaxtikgo uma akxni xʼanalh guerra?
MAKGAPITSIN WANKGO: «Ni xlakaskinka tuku takanajla o religión kgalhiyaw, tuku tlakg xlakaskinka wa pi kaj chatum Dios kakninaniyaw».
-
¿Tuku texto xmaklakaskinti xlakata xlimasiya pi xaxlikana kskujnin Dios wi tuku xlimakgantaxtitkan?
TUKU KATSINIW
Xaxlikana kstalaninanin Cristo lilatamakgo tuku wan Biblia, lhuwa tuku tlawakgo xlakata kapaxkikgo amakgapitsin chu lichuwinankgo tuku xaxlikana masiya Biblia.
¿Tuku xkgalhtinanti?
-
¿Niku kilhtiyakgo tuku kanajlakgo xaxlikana kstalaninanin Cristo?
-
¿Tuku tayat litalakgapaskgo xaxlikana kstalaninanin Cristo?
-
¿Chu tuku taskujut tlawakgo?
TLAKG KAKATSINI
Tlakg kakalakgapasti tiku stalanikgo xliʼakxilhtit Jesús chu xtamasiy.
Kaʼakxilhti la chatum puskat tiku monja xlitaxtu tekgsli akgtum xaxlikana familia.
«Kilikgalhtikgolh Biblia putum takgalhskinin nema xakkgalhi» (Makatsinina, 1 xla abril kata 2014)
Kaʼakxilhti la xaxlikana kstalaninanin Cristo kalimasiyanikgo tapaxkit xnatalankan akxni maklakaskinkgo tamakgtay.
Kamakgtayayaw kinatalankan akxni wi tuku masputunan (kaj aktsu) (3:57)
Jesús lichuwinalh tuku tayat xʼamakgo kgalhikgo kstalaninanin. Kaʼakxilhti la xapulana kstalaninanin Cristo chu xaxlikana kstalaninanin Cristo xala uku limasiyakgo uma tayat.
«¿Tuku kalilakgapaskan xaxlikana kstalaninanin Cristo?» (Makatsinina, 1 xla mayo kata 2012)
Max na nalakgatiya uma
TAKGALHSKININ NEMA TLAKG TLAWAKAN
¿La kmakgalhtawakgenanaw?
Ktakgalhtawakga nema mastakgo xtatayananin Jehová, wix tlan namaklakaskina Biblia nema kgalhiya. Na tlan natawilakgo mifamilia chu mi amigos akxni namakgalhtawakgekana.
