TAKGALHTAWAKGA 21
¿La lichuwinamaka xatlan tamakatsinin?
Nialh makgas Jehová namaklakaskin xTamapakgsin xlakata namasputu putum xtaʼakglhuwitkan latamanin. ¡Chu xlikana pi lu kalitachuwinamputunaw uma xatlan tamakatsinin amakgapitsi latamanin! Jesús xlakaskin pi kstalaninanin xlichuwinankgolh uma tamakatsinin kxlikalanka katiyatni (Mateo 28:19, 20). ¿Tuku tlawakgonit xtatayananin Jehová xlakata namakgantaxtikgo uma xlimapakgsin Jesús?
1. ¿La kgantaxtuma la uku Mateo 24:14?
Jesús lichuwinalh: «Xatlan tamakatsinin xla Tamapakgsin natalichuwinan kxlilakgatum katiyatni» (Mateo 24:14). Xtatayananin Jehová lu xatapaxuwan kmakgtlawayaw uma lu xlakaskinka taskujut. Klichuwinanaw xatlan tamakatsinin kxlikalanka katiyatni kliwaka 1,000 tanu tanu tachuwin. Talakaskin lu naliskujkan chu liwana nalakkaxwilikan xlakata natlawakan uma lu lanka taskujut. Nila xaktlawaw uma taskujut komo ni wa Jehová xkinkamakgtayan.
2. ¿Tuku ktlawayaw xlakata nakkalitachuwinanaw latamanin xatlan tamakatsinin?
Klichuwinanaw xatlan tamakatsinin kaxanikawa niku wilakgo latamanin. Nachuna, ktlawayaw la xtlawakgo kstalaninanin Cristo kxapulana siglo, kanaw «kʼakgatunu akgatunu chiki» (Hechos 5:42). Uma tuku lakkaxwilikanit makgtayanan nakalitachuwinankan xatlan tamakatsinin lhuwa latamanin akgatunu kata. Pero na klichuwinanaw xatlan tamakatsinin niku lamakgo lhuwa latamanin, xlakata min kilhtamaku ni kkatekgsaw kxchikkan. Ankgalhin klakputsayaw la nakkalitachuwinanaw latamanin xlakata Jehová chu tuku ama tlawa.
3. ¿Tiku kalakgchan nalichuwinankgo xatlan tamakatsinin?
Putum xaxlikana kstalaninanin Cristo xlichuwinatkan xatlan tamakatsinin. Akinin lu xlakaskinka kliʼakxilhaw naktlawayaw uma taskujut. Lu kliskujaw naklichuwinanaw xatlan tamakatsinin xlakata kkatsiyaw pi kalipekua wilakgo latamanin (kalikgalhtawakga 1 Timoteo 4:16). Ni kinkaxokgonikanan akxni ktlawayaw uma taskujut xlakata Biblia wan: «Kaj xachunata makglhtinantit; kaj xachunata kamastatit» (Mateo 10:7, 8). Chu maski ni putum latamanin kgaxmatputunkgo, chuntiya klichuwinanaw xatlan tamakatsinin xlakata chuna kkakninaniyaw Jehová chu kmakgapaxuwayaw.
TLAKG KALAKPUTSANANIW
Kaʼakxilhwi tuku ktlawamaw xtatayananin Jehová xlakata naklichuwinanaw xatlan tamakatsinin kxlikalanka katiyatni chu la Jehová kinkamakgtayaman.
Klichuwinanaw Dios kxlikalanka katiyatni: A) Costa Rica; B) Estados Unidos; C) Benín; D) Tailandia; E) Yap (Micronesia); F) Suecia
4. Kkalitachuwinanaw xatlan tamakatsinin putum latamanin
Xtatayananin Jehová lu kliskujaw xlakata nakkalitachuwinanaw latamanin xatlan tamakatsinin kaxanikawa niku wilakgolh. Kaʼakxilhtit VIDEO chu kalichuwinantit uma:
-
Xliputum tuku ktlawayaw xlakata naklichuwinanaw Dios, ¿tuku tlakg lakgatiya?
Kalikgalhtawakgatit Mateo 22:39 chu Romanos 10:13-15 chu kalichuwinantit uma:
-
¿La limasiya pi kkapaxkiyaw latamanin akxni klichuwinanaw xatlan tamakatsinin?
-
¿Tuku lakpuwan Jehová xlakata tiku lichuwinankgo xatlan tamakatsinin? (Kaʼakxilhtit versículo 15).
5. Akxtum ktaskujaw Dios
Lhuwa tuku limasiya pi wa Jehová tiku kinkapulalinan akxni klichuwinanaw xatlan tamakatsinin. Kaʼakxilhwi tuku lalh kNueva Zelanda. Akgtum kilhtamaku, chatum xtatayana Jehová tiku wanikan Paul alh lichuwinan Dios kʼakgatunu chiki chu tekgsli chatum puskat. Watiya uma kilhtamaku, tsisa, uma puskat xtlawaninit oración Dios chu xlimapakuwinit xtukuwani, Jehová, chu kskininit pi wi tiku xlakgapaxialhnalh. Paul wan: «Akgtutu hora alistalh, akit xaklakgatlakgma xmalakcha».
Kalikgalhtawakgatit 1 Corintios 3:9 chu kalichuwinantit uma:
-
¿La limasiya uma tuku aku lichuwinaw pi wa Jehová tiku kinkapulalinan akxni klichuwinanaw xatlan tamakatsinin?
Kalikgalhtawakgatit Hechos 1:8 chu kalichuwinantit uma:
-
¿Tuku xlakata klakaskinaw pi Jehová kakinkamakgtayan akxni klichuwinanaw xatlan tamakatsinin?
¿Xkatsiyata?
Kkintamakxtumitkan nema ktlawayaw kxitat semana, kinkamasiyanikanan la naklichuwinanaw Dios. Komo kilanitata kkintamakxtumitkan, ¿tuku lakpuwana xlakata la kinkamasiyanikanan?
6. Akxni klichuwinanaw xatlan tamakatsinin kkgalhakgaxmatmaw tuku Dios kinkalimapakgsinitan
Kxapulana siglo, lhuwa latamanin ni xlakaskinkgo pi kstalaninanin Jesús xlichuwinankgolh xatlan tamakatsinin. Umakgolh kstalaninanin Cristo “maklakaskinkgolh limapakgsin xlakata xkgalhmakgtayakgolh xatlan tamakatsinin” (Filipenses 1:7). La uku, xtatayananin Jehová nachuna ktlawayaw. a
Kalikgalhtawakgatit Hechos 5:27-42 chu kalichuwinantit uma:
-
¿Tuku xlakata chuntiya naklichuwinanaw xatlan tamakatsinin? (Kaʼakxilhtit versículos 29, 38 chu 39).
MAKGAPITSIN KGALHSKININANKGO: «¿Tuku xlakata xtatayananin Jehová ankgo kʼakgatunu chiki?».
-
¿Tuku xwanti wix?
TUKU KATSINIW
Jesús kalimapakgsilh kstalaninanin pi xlichuwinankgolh xatlan tamakatsinin kxlikalanka katiyatni. Jehová kamakgtayama xlakskujnin xlakata natlawakgo uma taskujut.
¿Tuku xkgalhtinanti?
-
¿La lichuwinamaka xatlan tamakatsinin kxlikalanka katiyatni?
-
¿La limasiya pi kkapaxkiyaw latamanin akxni klichuwinanaw xatlan tamakatsinin?
-
¿Lakpuwana wix pi komo nalichuwinanaw xatlan tamakatsinin napaxuwayaw? ¿Tuku xlakata chuna lakpuwana?
TLAKG KAKATSINI
Kaʼakxilhti la xtatayananin Jehová lichuwinankgo xatlan tamakatsinin klaklanka kachikinin.
Lichuwinankan Dios kParís anta niku titaxtukgo lhuwa latamanin (5:11)
¿Tuku tlawakgonit xtatayananin Jehová xlakata tlan nakalitachuwinankgo Dios tiku tsalataxtukgonit kxpaiskan?
Kkalitachuwinanaw Dios tiku tsalataxtukgonit kxpaiskan (5:59)
Kaʼakxilhti tapaxuwan nema makgkatsi chatum puskat tiku putum kilhtamaku lichuwinan Dios.
Kaʼakxilhti tuku tlan kitaxtunit xlakata kgalhmakgtayakanit xatlan tamakatsinin kxlakatinkan mapakgsinanin.
a Wa Dios kinkalimapakgsiyan naklichuwinanaw xatlan tamakatsinin. Wa xlakata xtatayananin Jehová ni kkgalhkgalhiyaw pi mapakgsinanin nakinkamaxkikgoyan talakaskin xlakata chuna naktlawayaw.
Max na nalakgatiya uma
TAKGALHSKININ NEMA TLAKG TLAWAKAN
¿La kmakgalhtawakgenanaw?
Ktakgalhtawakga nema mastakgo xtatayananin Jehová, wix tlan namaklakaskina Biblia nema kgalhiya. Na tlan natawilakgo mifamilia chu mi amigos akxni namakgalhtawakgekana.
