TAKGALHTAWAKGA 22

¿La tlan nalichuwinana xatlan tamakatsinin?

NAMATLAKGNIYA

Max akxni nakatsiya tuku xaxlikana masiya Biblia nalakpuwana: «¡Putum latamanin xlikatsitkan uma!». Chu xlikana tuku lakpuwana; putum latamanin xlikatsitkan uma. Pero max pekuana tsinu akxni lilakpuwana pi nakalitachuwinana amakgapitsin tuku katsinipat. Kaʼakxilhwi tuku tlan natlawaya xlakata nialh napekuana chu tlan nalimakgkatsiya akxni nakalitachuwinana amakgapitsin xatlan tamakatsinin nema lichuwinan Biblia.

1. ¿La tlan nakalitachuwinana tuku katsinipat tiku kalakgapasa?

Xtamakgalhtawakgen Jesús wankgolh: «Nila nialh naklichuwinanaw tuku kakxilhnitaw chu kkgaxmatnitaw» (Hechos 4:20). Lu xtapalh xʼakxilhkgo xaxlikana, wa xlakata xkalitachuwinamputunkgo putum latamanin. ¿Na lu xtapalh akxilha xaxlikana? Komo chuna, kalakputsa la nakalitachuwinana mifamilia chu miʼamigos tuku katsinipat (kalikgalhtawakga Colosenses 4:6).

Makgapitsi tuku tlan natlawaya

Xlakata tlan nalitachuwinana chatum tiku xalak mifamilia tuku masiya Biblia, max tlan nawaniya: «Lu tlan tuku kkatsinilh uma semana».
Akxni chatum miʼamigo tatatla o lakgaputsama, kamasiyani akgtum texto xalak Biblia nema tlan namamakgkatsini.
Akxni tiku kataskuja nakgalhskinkgoyan la kitaxtunin ksputat semana, kakalitachuwinanti tuku katsini kmintakgalhtawakga o tuku katsini ktamakxtumit xalak congregación.
Kakamasiyani miʼamigos sitio xla Internet jw.org.
Kakawani amakgapitsin pi na katawilakgolh akxni limakgalhtawakgekana Biblia o kakamasiyani la tlan naskinkgo akgtum takgalhtawakga xalak Biblia anta ksitio jw.org.

2. ¿Tuku tlan nakitaxtu komo akxtum nakatalichuwinana Dios congregación?

Xtamakgalhtawakgen Jesús ni kajwatiya kalitachuwinankgolh xatlan tamakatsinin tiku xkalakgapaskgo. Jesús «lichatiyun kamalakgachalh kʼakgatunu laklanka kachikinin» xlakata na xlichuwinankgolh anta (Lucas 10:1). Uma makgtayanalh xlakata tlakg lhuwa latamanin xkgaxmatkgolh xatlan tamakatsinin. Nachuna, xtamakgalhtawakgen Jesús lu paxuwakgolh xlakata akxtum xlichuwinamakgo Dios (Lucas 10:17). ¿Na tlan xliskujti xlakata akxtum xkatalichuwinanti Dios congregación?

TLAKG KALAKPUTSANANIW

Kaʼakxilhwi tuku tlan namakgtayayan nialh napekuana chu napaxuwaya akxni nalichuwinana xatlan tamakatsinin.

3. Jehová namakgtayayan

Makgapitsi latamanin tiku lichuwinamputunkgo xatlan tamakatsinin, lilakgaputsakgo tuku nakalakpuwanikan o tuku nawankgo amakgapitsin.

Chu wix, ¿pekuana akxni lilakpuwana pi nakalitachuwinana amakgapitsin tuku katsinipat? ¿Tuku xlakata?

Kaʼakxilhtit VIDEO chu kalichuwinantit uma:

VIDEO: Kskinilh Jehová pi xkimakgtayalh (4:05)

¿Tuku kamakgtayalh umakgolh kamanan nialh napekuankgo?

Kalikgalhtawakgatit Isaías 41:10 chu kalichuwinantit uma:

¿Tuku xlakata talakaskin natlawaya oración komo pekuana nalichuwinana xatlan tamakatsinin?

¿Xkatsiyata?

Lhuwa tiku la uku xtatayananin Jehová litaxtukgo, xlakpuwankgo pi nikxni la xʼamakgo lichuwinankgo Dios. Chuna xlakpuwan Sergey, xla xmakgkatsi pi nitu xlitaxtu chu lu tuwa xmakgkatsi nakatachuwinan amakgapitsin. Pero akgtum kilhtamaku tsukulh likgalhtawakga Biblia. Xla wan: «Maski xakpekuan, ktsukulh kalitachuwinan amakgapitsin tuku xakkatsinima. Uma kimakgtayalh nakakxilha pi xtapalh xaklitaxtu chu na kimakgtayalh nakmaki kkinaku tuku xakkatsinima xalak Biblia».

4. Kalimasiya kakni

Akxni wi tiku nalitachuwinana xatlan tamakatsinin, ni kajwatiya kalilakpuwanti tuku nawaniya, na kalilakpuwanti la nawaniya. Kalikgalhtawakgatit 2 Timoteo 2:24 chu 1 Pedro 3:15 chu kalichuwinantit uma:

Akxni nakalitachuwinana amakgapitsin tuku wan Biblia, ¿la namakgantaxtiya tuku wankgo umakgolh texto?
Max makgapitsi tiku xalak mifamilia o miʼamigos ni katilakgatikgolh tuku wix nakawaniya. ¿Tuku tlan natlawaya? ¿Chu tuku ni militlawat?
¿Tuku xlakata tlakg tlan nakitaxtu lakatitum nakatachuwinana nixawa nakawaniya tuku xlikanajlatkan?

5. Kinkamakgapaxuwayan akxni lichuwinanaw xatlan tamakatsinin

Jehová lakgayawalh Jesús nalichuwinan xatlan tamakatsinin. ¿La xʼakxilha Jesús uma taskujut? Kalikgalhtawakgatit Juan 4:34 chu kalichuwinantit uma:

Akxni liwana wayanaw, kinkamakgtayayan napaxuwayaw chu tlan nalatamayaw. ¿Tuku xlakata Jesús wa pi tlawakan xtalakaskin Dios, uma na kilhchanima lichuwinankan xatlan tamakatsinin, xtachuna kiliwatkan?
¿La lakpuwana wix pi namakgkatsiya komo nalichuwinana xatlan tamakatsinin?

Tuku tlan natlawaya

Ktamakxtumit nema tlawakan kxitat semana, kuenta katlawa liʼakxilhtit niku kinkamasiyanikanan la nakatachuwinanaw latamanin.
Katachuwinanti mimakgalhtawakgena xlakata nakatsiya tuku militlawat xlakata na tlan wi tuku namatitaxtiya ktamakxtumit nema tlawakan kxitat semana. Tuku namatlawikana namakgtayayan tlakg tlan nakalitachuwinana amakgapitsin tuku katsinipat.
Kamaklakaskinti secciones «Makgapitsin wankgo» chu «Makgapitsin kgalhskininankgo» nema min kʼuma likgalhtawakga xlakata nakatsiya la nakakgalhtiya tuku wankgo o tuku kgalhskininankgo makgapitsin latamanin.

MAKGAPITSIN KGALHSKININANKGO: «Tlen, makgasa ni xakakxilhan, ¿la kitaxtuniman?».

Komo wi tiku chuna xkgalhskin, ¿la tlan xtsuku litachuwinana tuku katsinipat xalak Biblia?

TUKU KATSINIW

Lu paxuwayaw akxni lichuwinanaw xatlan tamakatsinin. Chu maski wix tuwa makgkatsiya, tlan chuna natlawaya.

¿Tuku xkgalhtinanti?

¿Tuku namakgtayayan nakalitachuwinamputuna amakgapitsin xatlan tamakatsinin?
¿La tlan nalimasiyaya kakni akxni nalichuwinana xatlan tamakatsinin?
¿Tuku tlan natlawaya xlakata nialh napekuana?

Akxni masputu uma takgalhtawakga:

Katlawa uma:

Kalilakpuwanti chatum tiku litachuwinamputuna xatlan tamakatsinin. Alistalh kalilakpuwanti tuku nawaniya, la nawaniya chu tuku kilhtamaku chuna natlawaya.

Na tlan natlawaya uma:

Atanu tuku na tlan natlawaya