Jesús masiyalh pi tiku kstalanina Cristo litaxtuputun xlitamunut (kalikgalhtawakga Mateo 28:19, 20). ¿Pero tuku wamputun tamunut? ¿Chu tuku xlitlawat chatum lataman xlakata tlan natamunu?

1. ¿Tuku wamputun tamunut?

Tachuwin mununankan nema takilhtinit ktachuwin xagriego wamputun «makgtsinankan» kchuchut. Akxni Jesús tamunulh, makgtsika kkgalhtuchokgo Jordán, chu alistalh «takutli» (Marcos 1:9, 10). Akxni xaxlikana kstalaninanin Cristo tamunukgo, na putuminika kamakgtsikan kchuchut.

2. ¿Tuku limasiya chatum lataman akxni tamunu?

Akxni chatum lataman tamunu limasiya pi tamakamastaninita Jehová. ¿Chu tuku kilitlawatkan xlakata natamakamastaniyaw Jehová? Kilitlawanitkan oración chu nawaniyaw pi skujnaniputunaw putum kilhtamaku. Uma oración kilitlawatkan akxni nina tamunuyaw. Kʼuma oración, tiku tamakamastanima Jehová, malaknuni pi kajwatiya xla nakakninani chu wa natlawa tuku xla lakaskin. Nachuna, “x’akstu lakgmakgankan, chu chuntiya stalani” Jesús, tlawa tuku xla tlawalh chu masiyalh (Mateo 16:24). Akxni chatum lataman tamakamastani Jehová chu tamunu, tlan tsuku talalin chu na tlan katalalin tiku kakninanikgo Jehová.

3. ¿Tuku xlitlawat chatum lataman xlakata tlan natamunu?

Komo wix tamunuputuna, pulana mililakgapasat Jehová chu milikanajlanit (kalikgalhtawakga Hebreos 11:6). Akxni tlakg nalakgapasa Jehová chu nakanajlaniya, tlakg napaxkiya. Chu uma natlawa pi wix nakalitachuwinamputuna amakgapitsin tuku katsinipat chu nalilatapaputuna xtastakyaw Biblia (2 Timoteo 4:2; 1 Juan 5:3). Akxni chatum lataman tlawa «chuna la lakaskin Jehová» xlakata namakgapaxuwa, tlan natamakamastani chu natamunu (Colosenses 1:9, 10). a

 TLAKG KALAKPUTSANANIW

4. ¿Tuku kinkamasiyaniyan xtamunut Jesús?

Kalikgalhtawakgatit Mateo 3:13-17 niku lichuwinan xlakata xtamunut Jesús. Alistalh kalichuwinantit uma:

• Akxni Jesús tamunulh, ¿skgataku xwanit?

• ¿Kaj tsinu akmawakaka chuchut? ¿La munuka Jesús?

Akxni Jesús tamunulh, matsukilh lu xlakaskinka taskujut nema Dios xlakgayawanit. Kalikgalhtawakgatit Lucas 3:21-23 chu Juan 6:38 chu kalichuwinantit uma:

• Akxni Jesús xtamununita, ¿tuku tsukulh tlawa?

5. Wix tlan natamunuya

Max namakgapekuanan tsinu akxni nalilakpuwana pi natamakamastaniya Dios chu natamunuya. Pero komo chuntiya nakatsiniya xlakata Jehová chu tlakg nalakgapasa, tlakg ni tuwa katimakgkatsi natamunuya. Xlakata nakalakgapasa makgapitsi latamanin tiku liskujkgolh xlakata tlan xtamunukgolh, kaʼakxilhtit VIDEO.

Kalikgalhtawakgatit Juan 17:3 chu Santiago 1:5 chu kalichuwinantit uma:

• ¿Tuku namakgtaya chatum lataman xlakata tlan natamunu?

1. Tamakamastaniyaw Jehová akxni waniyaw pi skujnaniputunaw putum kilhtamaku

2. Akxni tamunuyaw, limasiyayaw kxlakatin amakgapitsin pi tamakamastaninitaw Dios

 6. Akxni chatum lataman tamunu makgtapakgsi kxfamilia Jehová

Akxni wi tiku tamunu, makgtapakgsi kʼakgtum lanka familia nema makxtum wilakgo kxlikalanka katiyatni. Maski tanu tanu kinkilhtsukutkan o tanu tanu tuku ktitaxtunitaw, putum watiya tuku kkanajlayaw chu watiya tastakyaw xalak Biblia klilatamayaw. Kalikgalhtawakgatit Salmo 25:14 chu 1 Pedro 2:17 chu kalichuwinantit uma:

• Chuna la akxilhwi kʼumakgolh versículos, ¿tuku tlan kitaxtu akxni chatum lataman tamunu?

 TUKU KATSINIW

Jesús wa pi tiku kstalanina Cristo litaxtuputun xlitamunut. Chu xlakata chatum lataman tlan natamunu, talakaskin nakanajlani Jehová, nalilatama xlimapakgsin chu natamakamastani.

¿Tuku xkgalhtinanti?

• ¿Tuku wamputun tamunut chu tuku xlakata lu xlakaskinka?

• ¿Tuku limasiya tamunut?

• ¿Tuku xlitlawat chatum lataman akxni nina tamakamastani Dios chu nina tamunu?